👨💼🌧عريس من المطر🌧👨💼
الحلقة 29:
اسراء تحكي: حاسة بالذنب لاني رحت عندو يومها مش حابة نصدق اني انا عملت هكذاك..كلو من وئام
وئام : واش بيك سارحة يا لالة جبتلك خبر يهبل ...علاء و مرتو مارهمش متفاهمين عندها 3ايام طلعنا نتي خرجتي تشري لقيناها تبكي ..مااللخر روحي وريلها الفيديو
اسراء: من وئام خليني ديجا راني في حالة من يومها وانا مخي ماشي عندي
وئام: هاتي انا ندي نوريلها ني نقلك ما يحبهاش
اسراء: راح نحاول لاخر مرة اما بعد هاذي نجبد روحي (قمت من بلاصتي قبل ما نغير رايي...)
سمر تحكي:نشوف مالتاقة المطر بدات تطيح و صوت قطراتها ودقاتو على زجاج النافذة زادني هدوء وسكينة...قمت من بلاصتي بعد مدة رتبت الكوزينة اليوم علاء مش فالدار شديت تيليفوني ندور شويا فالفايسبوك ونتفرج على ليفيديو لي كاينين...حسيت بالملل وليت قمت فتحت خزانتي نرتب فالحوايج لي دخلتهم قيل ماتبدا تطيح المطر...ضحكت وانا شادة التيشرت ديالو...فرحانة لاني قدرت نرتاح مالحالة لي كنت فيها و علاقتنا تحسنت على قبل...دق الباب مشيت فتحت لقيتها اسراء
اسراء: نقدر نحكي معاك موضوع مهم؟
سمر: اكيد اتفضلي(دخلت قعدنا فالصالة بقا الصمت سيد الموقف وحنا نتفرجو في بعض قيل ماتنطق
اسراء: سمر صدقيني انا مش من وقاحتي جاية نحكي معاك...ومانيش انسانة شريرة والله (دقات قلبي اتسارعت كاني متوقعة الشي لي راح تقولو ) انا و علاء من بكري نحبو بعض...اما الظروف منعتنا نجتمعو تحت سقف واحد رغم محاولاتو العديدة (جيت نقاطعها حبستني )خلينا نحكو ونفضوها كيف الناس المتحضرة(ضحكت باستهزاء)
سمر: من نيتك تحكي؟ ياخي جاية تحكي على الماضي وحنا فالحاضر...كون يحبك كان خلاني هو و جا ليك ولا زعمة حشم مني؟ ...حتى انا مش وقحة اما راني نلاحظ انو لازم نكون باش نقدر نكمل الحديث هذا معاك...لانو بالهداية شي ماراح يتفض ...وننصحك تخرجي منا لانو كلامك زايد معايا عزيزتي ربي يرزقك جهة أخرى انا و راجلي متفاهمين و ماتحابين عاللخر...(قمت من بلاصتي ضحكت ضحكة استفزتني)
اسراء: طلعتي فيك ما يكفيك وانا نقول مسكينة ما نجرحهاش اما اوكي مادام كاين طريقة باش تفهمي هاكي عندي ليك كادو اعتبريه عربون محبة مني ليك هههههههههه(عقدت حواجبي مستغربة من ثقتها الزايدة في نفسها والطريقة لي تحكي بيها ...قامت من بلاصتها تخرب في تيليفونها ماهي الا ثواني حطاتو في يدي اتفتح الفيديو لحظات تعداو سنين وانا نستنى نشوف شي نفسي اتقطع مالتوتر...وكانت المفاجأة لي عمري فكرت فيها حسيت الدنيا تدور بيا وانا نرا فبها لاصقة تبوس فيه وهو مش مالعاكسين....حسيت الدنيا ظلامت في وجهي رفعت راصي على صوتها مرة اخرى)
اسراء: هاذي يوم رحتي لداركم نظن يكفي اذا كانت عندك كرامة انسحبي افضل...لانو عاجلا أم اجلا عشرة سنين ما تمحيهاش نزوة عابرة يا روحي...ابداي تخملي في قشك حابة نغير ديكور الدار مش عاجبني هههههههه (خرجت وانا ماسمعت شي من كلامها لي قالتو اللخر...مازلت نعاود في نفس الصورة في مخي كاني نحفظ فيها...حنى البكا ماقدرتش نبكي ماعرفتش علاش عمل فيا هكذا و ماخلانيش حنى نحس شحال صعيبة الخيانة وقت تجينا على غفلة ...صحيح من وقت اتصدمت تبدلت اما قبل كنت نعمل جهدي باش نفرحو بقيت فالدار كيف الخديمة المطيعة لي تطيب وتكنس و فالليل تزهيه...منبعد هو واش دار؟ خااااني مانعرفش وقتاش واما مرة رحت فيها لدارنا اما بكل بساطة ماتفكر شي عملتهولو مليح ولا حتى لحظة حب جمعتنا خلاتو يتراجع على لي عملو..ماعرفتش واش راني نحس بالضبط لاني منهارة ...بقيت فيبلاصتي نتفكر كل لحظة عديتها معاه كلشي كان مزيف كنت عايشة كذبة؟ واش ربح كي كذب عليا؟!مشيت لبيتي لميت معايا النيسيسار وخرجت لدارنا اول شي عملتو اني تعديت على بابا قعدت معاه ما ننكرش انو مواجهتو بلي صار كانت صعيبة اما ماعنديش حل...حكيتلو لي صار باختصار رغم اني ما كنتش متاكدة من ردة فعلو بقيت متسمرة في بلاصتي حتى وقف جا مقابلني
الاب: يابنتي مادام باباك عمرك ما توطي راصك ارفعي راصك فوق راكي بنتي خرجتك منا بكرامتك اما وقت تتهاني ويكون وليد سلطان مانخليك عندو...روحي لبيتك و هو وقت يسال عندي ليه كلام مقاسو(سلمت على راصو ودخلت اول مادخلت غرفتي انهرت بالبكا دموعي لي ماكانتش حابة تنزل نزلت في لحظة تضبت الرؤية في عيني انهرت على السرير نبكي ومش عارفة على واش بالضبط نبكي على خيانتو ولا ظني لي خاب ولا وقت عملوني بهلولة و استغباوني وهوما من حولي عاملين رايهم وليت نشوف فيهم الكل نقطة سوداء..كلهم استغلو طيبتي و راح يتحاسبو واحد بواحد مش انا لي باش نحاسبهم اما لي خلقنا هو القادر باش يحاسبهم و يجبر بخاطري زادة
