👨💼🌧عريس من المطر 🌧👨💼
الحلقة 22
اسراء تحكي: مالبارح وانا فالفراش ماقمت ماكليت ماشربت غير نشوف فالسقف و دموعي على خدي ماحبوش يوقفو حتى عينيا تورمو و ماعدتش قادرة نشوف مليح ولا نفتحهم مليح...كمية الالم لي راهي في قلبي عكستها حالتي...حبي احلامي حياتي تضحيتي كل شي ولا عندو حتى معنى ...كل شي عملتو راح في سطل ما مرمي..متفهمة انو استنى وانو حاول جاو اهلو شحال من مرة يحاولو في بابا وشي ماقبل ما رضى...جا باباه يعتذر اما بابا زاد في جبروتو و رفضو زادة كان كل مرة يعمل شي حتى بعد ما تخطبت...اما وقت اتزوجت افقد الامل لي انا ما فقدتوش...علاء بالنسبة ليا مش مجرد حبيب عديت معاه سنين من عمري كان و مازال نصفي الثاني و طرف من روحي ...كبرت على حبو و احلامي ببيت دافي مليينو ولادنا..اما القدر كان عندو راي اخر...اتقعدت على صوت الباب لي اتفتح ودخلت وئام
وئام: اسراء علاش عاملة في روحك هكذا؟ يا طفلة رحتي تقتلي روحك ماتاكلي ماتشربي(بقيت نشوف فيها بنظرة ضايعة...نفخت وقعدت قدامي)
وئام: شوفي عندي ليك حل نتيا لي ضحيتي على جالو و حبيتيه طول عمرك حاربي على جالو
اسراء: شبيك هبلتي انا كنت نقول نفس الكلام بصح ظهرلي حبها انا لي نعرف علاء
وئام: راه عريس جديد و مخلوع واش وقت تقدام تشوفي اذا صح يحبها ...وزيدي شفتي شحال بهلولة ومتصنعة في بالك مازالت بنات هكذا في وقتنا لاعبتها مطيعة انا ما تخلعنيش و زايد هو شخصيتو قوية توالمو وحدة كيفك...اسراء حاولي حبك سنين ما يمحيهش شهر
اسراء:انا قطعت الأمل كليا منو
وئام: راهي راحت لدارهم اغتنمي الفرصة وحكي معاه ماما ترقد بكري وبابا وقت يرقد ما يفطنش انا نعسلك اطلعي لعندو واعملي فيديو خلي نوروهولها و هكذا هي تبعد (حطيت يدي على فمي )
اسراء: الا ذي حبيتي نخرب بيتها هي واش ذنبها فلي صار باش نعمل معاها هكذا
وئام: هي لي لصقت نهار الخطبة ماراحش تلاقاها و نهار الفيونصاي ماراحش كان خدام انا وحدة في بلاصتها يدخلني الشك هي لالا بقات لاصقة حتى تزوجت ماهي فرصة العمر جاتها طبيب وشباب و دارو وحدو راه جاها #عريس_مالمطر طاح مالسما مع قطرات الشتا بلا ماتعرفو ولا تشوفو قبل
اسراء:ماراحش؟؟ خلعتيني ماكنتش عارفة بصح بلاك صح كان مش قادر و زيدي علاش حتى يتزوج كي واحد ماغصبو
وئام: بلاك باش ينساك برك يا الجايحة اعملي كيف ماراني نقلك ديري عليا اذا ماربحتي والو ماتخسريش ...على الاقل مايبقالكش تأنيب الضمير و تقولي حاولت(خلاتني حايرة بقيت نخمم واش ندير مارانيش حابة نلعب اللعب هذا صحيح نحبو اما مش قادرة ندير شي هكذا مانيش شي.طانة )
وئام: خليها حتى تحمل منو ثماك زيدي اندبي مليح
اسراء: وئام مارانيش متقبلة انو في وحدة داخلة حياتو وراهي عايشة واش كنت حابة نعيش انا زيديلي حكاية الولاد هفففف...خليني تعيشي ماخصنيش
وئام: راني نقلك قبل ما يفوت الفوت.. يما راح تقبلك اكيد ماهو يطلق ونتي مطلقة وماراحش تلقى خير من بنت ختها...انا حابتكم ترجعو كي بكري حرام حبكم يضيع في جرة وحدة لصقة واش فيها كون ماقبلتش وقت ماكانش مهتم بيها
اسراء: راح نحاول نعمل لي قلتي اما اذا ما صلحش واش ندير
وئام: خليه يحمل منك
اسراء: وئام راكي ثابتة واش راكي تحكي؟
وئام: زوجة ثانية خير من والو راني نحكي على جال مصلحتك نتي وقت يتزوج فؤاد وانا نتزوج ماراحش تقبلي تبقاي هنا وزيدي هو ساكن فوق راح تشوفيه وتقابليها دايمن شحال راح تقدري تصبري و تعفسي على قلبك...نعرف كلامي مش ساهل و يبان تاع وحدة مجنونة اما الواقع يقول هكذا والبقاء للاقوى اكيد...استعملي كيدك باش تضمني بقاءك قبل ما تفيق ذيك البهلولة و تدير اللازم وقتها ياتمشي نتي يا هو روحي الخدمة تاعو حكي معاه قابليه برا اعملي اي شي مانعرفش اما ماتبقايش هكذا ...انا من حبي ليك لي راني نحكي لانو ما عندي حتى فايدة فالموضوع حنى لو كانت الفكرة مجنونة اما هذا لي كاين وبقا حل راهم البنات كامل هكذا يطيرو مالمقلة لازم تشطاري ولا خبزتك تتحرق ولا يطيرو بيها
