#عريس_من_المطر
#كرونيك_حصريا_على_chroniquedz
#بقلم_سلمى_bella
⭕ ❌ممنوع نقل بذون اذن❌⭕
👨💼🌧عريس من المطر🌧👨💼
الحلقة الاولى:
...الأقدار هي الشي لي يحكم ويسير حياتنا الكل ..مهما عملنا مش راح نقدرو نهربو من مكتوبنا ولا نقدرو نتجنبو حدوث شي مقدر انو يحدث...
سمر تحكي: ضغط في كل بلاصة فالخدمة فالدار ..اما نقبل ضغط الخدمة ولا ضغط اخر ...لبست حوايجي و خرجت من لاشومبر دو قارد نشوف فالمرضى كل واحد و حكايتو...رسمت ابتسامة على شفافي كيف العادة رغم القلب ماعينو يضحك اما باش تقبل نلبس المأزر الأبيض لازم تتعلم الانسانية اولا..تتعلم تداوي ونتا مجروح..و تسهر ونتا نعسان..تخدم ونتا تعبان..تضحك مع الناس و نتا موجوع لانو كل شخص يجي يكون مجروح كثرك ... يكون يعاني و موجوع في صحتو ولا صحة ناس عزيزة عليه..الصحة لي هي اذا راحت محال ترجع ولو بكنوز الدنيا
الطبيبة: سمر اعملي تحليل للمريض هذا و مديه لوليدو يديه للمخبر..لازم تعرفو كريات الدم البيضاء شحال(عملت كيف ما قالت وانا نحكي مع المريض)
سمر: الحاج ماتخافش لاباس عليك ان شاء الله نعملولك شويا تاع تحاليل. واش واجعك
الشيخ: كرشي
سمر: يدك سخونة عندك الحمة تتقيا؟
الشيخ: ايه ا بنتي
سمر:بالشفا الحاج(بعدت علبه الظاهر عندو التهاب الزائدة الدودية أعراضها هاذو...بعد مدة قصيرة رجعت بالتحليل للطبيبة
الطبيبة؛ كيف ما توقعت لازم نعملولو échographie abdominale باش نشوفو واش كاين و نتاكدو سمر اديه للغرفة وحضريه يعيشك نشوف المريض هذا ونجي
سمر: نعملو مخفف الم؟
الطبيبة: وي احسن شي (توجهت عملت اللازم و خرجت نشوف باقي المرضى..اليوم الاستعجالات كانت معبية و كل واحد ووجعو...في عامين خدمة شفت بزاف وتعلمت بزاف تالمت وتحسرت وقت ماتو ناس قدامي وبكيت مع اهلهم...واجهت ضغط نفسي وقت مريض كان يصارع الموت بين يديا...فرحت لمرا بعد ما فقدت الامل ربي رزقها الذرية وشفت عجائب قدرة ربي فالدومان هذا ...بعد يوم شاق ومتعب ركبت الحافلة متوجهة للدار ..ومخي في واش راح نسمع من عندهم ..هزيت مفاتحي غير دخلتو فالباب اتفتح طلعت راصي نشوف في بابا طالع ويشوف فالساعة اما ما حكا شي ...تسرسبت باش ندخل شدتني ماما
نوال: رواحي يا لالة يا تركية..قريب المغرب عندي راجل فالدار انا ..هم مايجينا حد ويدق بابنا على جالك زيدي مديلهم سبة سمعي جبتلك ما مرقي شربيه وادهني وجهك
سمر: امي والله راني نشربو واش حبيتي نصنع راجل ونجيبو..راني 23سنة لي يشوفك مقلقة يقول راني فالخمسينات
نوال: الخمسينات اذا عشت باش نشوف ادخلي واسكتي مابقاتش نعيمة الخياطة تسمع هدوري مالتواقي (تنهدت بقلة حيلة و دخلت ...صليت وحطيت راصي نخمم واش ندير غدوا ان شاء الله مانخدمش ..قمت وقت سمعت صوتها مالكوزينة خرجت نعاون فيها فالعشا
نوال: غدوا ان شاء الله نروحو لدار خالتك مرام جايينها خطابة
سمر: يااا الف مبروك مسكينة قريب هبلتها خالتي واقيلا الضغط متوارث في عايلتكم ههههه
نوال: هي شاطرة صيداتو كي كانت تقرا نتي دايرين بيك طبا و ممرضين ووالو تروحي تضحكي ونجي تضحكي..اوموا كاش مريض يبان لباس بيه
سمر: ولينا لنفس الموضوع مافهمتش كيفاش تامني بالما المرقي وما تامنيش بالمكتوب ..ماما في بالك طبيب يشوف فيا؟ اصلا يجو متكبرين و يحبو لي كيما هوما فالمستوى الذهني والممرضين الرجال قلال ولي كاينين يا متزوجين يا مصوحبين بقا ندير روحي للبيع وخلاص...مازال مكتوبي ماتحركش برك
نوال: شاطرة في تشراك الفم خلينا نخدمو حبيبات حلوة ندوهم في يدنا نعاونوها شويا
سمر: ماما نشرو لمرام كاش حاجة حالتهم كثرنا مهرودة وخالتي بالحمل..الناس تحب المظاهر تعرفي
نوال: ايه خممت ندي شويا ماعن عندنا سارفيس هذاك الاييض تاع القهوة و نتي شريلها واش ترجع للي يجوها اما واش تلبس عندها
سمر : اوك
#طلعو_ستاتي_خلو_سلمى_تحط_الحلقات
