👨💼🌧عريس من المطر 🌧👨💼
الحلقة الاخيرة:
سمر تحكي:حملت السجادة بعد ما كملت الصلاة لفيت نلقاه شادو في يدو و يشوف فيا بنص عين..شعرو داخل بعضو و رجل تاع السيرفات لي كان لابس طالع على الرجل لخرا
علاء: ولدك مش حاب يسكت...عييت نحاول نلعبها مانيش نسمع اما صوتو تقول بوق
سمر: هههههه جيب عليك ولدي صوتو يهبل نتا برك تغير منو.
علاء: نرجع نرقد شويا ...راني حاس روحي جيت من la garde باش نزيد نخدم ماشي نريح
سمر:ايه نعرف راك تاعب كنت نصلي على ذيك وقت بدا يبكي ماجيتش ثمثم(تبسم ودار باش يمشي وقفتو) علاء الظاهر نسيت وصيتك تشري كي كنت فالطريق وقتلي منبعد ...الحفاظات فضو و ممكن يبكي لانو تقلق(نفخ وراح بلاما يرجعلي )شفت يا حبيب ماماك يا يزن بوك وقت يرقد يسمح فينا ..(ضحك ببراءة كيف ديما شوفتو برك تخلي نهاري يكون اسعد نهار...من يوم جا للدنيا زاد حياتي حلاوة ...كيفاش وانا كنت يائسة ونكابر باش ما نخممش بموضوع الولاد...اما قدرة ربي فاقت كلشي و هو الكريم وقت يمدنا ما يسألناش و وقت ينحيلنا برك باش نعرفو قيمة الشي لي فقدناه...حضرت الحليب ليزن رضعتو شويا و رجع علاء بالحفاظات وقهوة في يدو
سمر: ميرسي عزيزي.
علاء: يسلمك حتى شربت كاسين قهوة كحلة باش صحصحت
سمر: ييي كان ظاهر فيك التعب بصح الله غالب
علاء: لا عادي واجبي
سمر: كانو حليان اليوم؟( شاف فيا بنص عين)
علاء: ترشي فيا
سمر: لازم تفسد اللقطة الرومنسية نتا..نروح نغير ليزن و نرجع(شدني من يدي جبدنا لعندو طبع بوسة خفيفة على شفافي وبعد
علاء: الطعم الوحيد لي مستحيل يتغير ولو تتغير الاطعمة الكل...(غمزني و مشا..بقيت نتحسس اثر البوسة كانو اول مرة يبوسني الظاهر راح نبقى حياتي كلها وكل لمسة منو راح نحسها كانها المرة الاولى لي لمستني فيها..كون جا واحد وحكالي كيفاش راح تكون حياتي بعد الزواج الوقت هذاك ماكنتش راح نصدق ...لاني كنت رافضة فكرة الزواج التقليدي بدون تعارف رغم اني ماكانتش مالبنات لي يحبو يدخلو في علاقات بزاف مي كنت نحب نعرف راجل واحد ونكمل نتزوجو بعد قصة حب اسطورية كنت متجاهلة انو مابني على حرام مارحش يدوم وماراحش ينفعني لقيت فالحلال بنة اخرى وحب خلق بين ليلة ونهار لقيت المودة والرحمة لي يزرعهم ربي بين المتزوجين لقيت الطمأنينة واكثر من كلشي لقيت الانسان لي حبني ووقف معايا وساندني ...ماخلاش يدي وقت احتجو ...وبزاف امور اخرى كنت نظن انها مستحيلة ...صحيح المشاكل كاينين ويكونو بصح مشاكل بسيطة ومرات يكون سوء تفاهم نتجاوزوه..حطيت وليدي في بلاصتو بعد ما رقد و فتحت الباب لي كان يدق
وئام: صباح الخير جيت نخبرك اسراء زيدت
سمر: مبروك عليها كيفاش حالتها؟
وئام: الحمد لله جابت ليان
سمر: تتربى في عز اهلها ودلالهم( مشات وانا اتكيت عالباب...اسراء بعد لي عملاتو نكذب كون نقول اني نسيتو ولا ولات انسانة عادية كيفها كيف باقي الناس لي نعرفهم...مازلت نتذكر لي عشتو جرتها وفي نفس الوقت مانتمنالهاش الشر ..
علاء: سمر يا روحي دقيقة عندي
سمر: خير حبيبي(مدلي تيليفونو نشوف عينيا وساعو) لااا علاء وقتاش درتها؟ مش مصدقة. (عينيا دمعو مالفرحة )
علاء: راح تولي مشهورة
سمر: وقتاش نشرت روايتي
علاء: عندي اسبوعين و النسخ كلها اتبعات ...عريس من المطر بقد ما عجبتني التفاصيل عجبتني شخصيتي و نظرتك ليا
سمر: مانتا احلى واش نملك والله عمري تصورت تعملي حاجة هكذا باش تفرحني.
علاء:ماعملت شي يا روحي برك نفذت وعدي ليك وقت قتلك ندعمك تكوني واثقة انو راح ندعمك ونسندك ديما
