👨💼🌧عريس من المطر 🌧👨💼
الحلقة 26:
سمر تحكي: راصي يوجع و جسدي كلو ثقيل من تاثير المخدر...حاسة قلبي يوجع فيا اكثر من مكان الجرح و مخنوقة كانو روحي راح تطلع لا قدرت نتنفس ولا قدرت نرتاح ...نزلت دمعة من عيني ماقدرتش حتى نرفع يدي و نمسحها...بقيت نفكر في كلشي نخمم في كل لحظة عديتها معاه وكأني نودع فيها كاني ماراحش نستمتع بالحياة بعد اليوم...كيفاش راح نستمتع اصلا ...مش ساهلة على اي شخص الشي هذا ... كل مرا طبيعية فالدنيا هاذي وقت تتزوج تخمم انها تجيب صغار وتحلم كيفاش راح تكون أشكالهم و طبايعهم...تختارلهم اسماء لي ياما تتدابز مع راجلها عليها...تخيرلهم حوايج وهي تلمس في بطنها لي يكبر اسبوع بعد اسبوع واكيد الشوق للبيبي راه يزيد مع مرور الوقت ...تخمم كيفاش راح تحضنهم وتشم ريحتهم لاول مرة كيفاش راح يكون ملمسهم وصوتهم و ليمن يشبهو...كل هاذي الامور حتى لو ما عشتهاش اما تخيلتها كيف اي بنت فالدنيا...اما انا ممكن اني نتحرم منها كيف ما نتحرم من كلمة ماما و صراخ بيبي يجري مورايا في أرجاء البيت..ممكن تبقى حياتي خالية و وجودي معاه مالوش لزوم نزلو دموعي وقواو مع الأفكار القاهرة هاذي...الالم لي راه في قلبي قريب يقتلني والأفكار لي راهي في مخي نهايتها ماراحش تكون مليحة نعرف كل شي بمكتوب ربي ..اما خايفة خايفة مالجاي خايفة مانقدرش نحمل و ننهار وانا مازلت في بداية الرحلة خايفة نيأس و نقنط ...خايفة من روحي لا نولي انسانة ماكنتهاش ولا تمنيت نكونها...سمعت الباب دق ودخل منو يتبسم مع انو التعب ظاهر عليه...عينيه محوقين و شعرو داخل بعضو..حتى حوايجو ماغيرهمش الدليل انو ماراحش للدار
سمر: علاء ح حابة نحكي معاك في موضوع (شاف فيا بنص عين كانو توقع واش راح نقول )
علاء: اذا المهزلة تاع قبيل راح تكمليها ننصحك تسكتي لانو قلقتيني والله وراكي مريضة مانحبش نزيد عليك(مسح على وجهو بسرعة وقرب مني شد يدي يحكي كانو ندم على اللهجة لي حكا بيها)سمر سامحيني على اللهجة اما تخمامك راه غالط مش لخاطرك مريضة راني نقول فالكلام هذا اما عن قناعة وعن ثقة بربي سبحانو...اسمعيني مليح...الزوجة الصالحة رزق كيفها كيف الذرية اذا ربي ابتلاني وحرمني من وحدة فبهم هو العليم الخبير مانعرفش خير ملي خلقني...واذا قرر يرزقنا هو الرزاق الكريم شي مش باش يصعب عليه طول خدمتي شفت ناس بصمنا عليهم بالعشرة انهم يموتو اما رجعو الحياة بقدرة ربي و كل مرة ربي يديرلنا حاجة تفكرنا انا مهما عملنا رانا بين يديه...شبيك هكذا متشائمة راني نقلك في كل الحالات مش راك نسمح فيك...روحي يا سيدي نفرضو اني تزوجت وربي مارزقنيش؟ سمر يا روحي المشكل مش مشكلة انك تجيب ولاد..انا مشكلتي انتي اذا ما كانوش منك مانحتاجش واذا ربي مارزقنيش منك الحمد لله كاين اليتاما لي يحتاجو شكون يكفلهم...ولو انو بكري عليه الكلام هذا برك يلي نتي حبيتي تسبقي الامور راني نمشي على حساب تخمامك...اخر مرة نسمع الكلام هذاك منك(مانعرفش علاش اما كلامو خلاني نبكي اكثر دورت راصي للجهة المعاكسة باش مايشوفنيش حسيت بملمس صوابعو على خدي دورلي راصي جهتو
علاء: شوفي فيا
سمر: من فضلك ماراكش تعاوني بكلامك راك تخليني نحس انو راح نكون مذنبة و الشعور بتأنيب الضمير مش راح يخطيني لا اكثر لا اقل
علاء: وحدي ربي يا طفلة شبيك هكذا دخلتي في علم ربي
سمر: لا إله الا الله محمد رسول الله
علاء: امسحي دموعك خليني نشوف ضحكة مرتي المزيانة
سمر: حاسة يديا ثقال.
علاء: همممم مش مشكل(مرر ابهامو تحت عيني يمسح فواش بقا ) هكذا رجعتي هايلة ..والموضوع هذا سكري عليه مانحبش نسمعو مرة اخرى(يتبسملي رغم الحزن لي في عيونو نظرتو راهي قهرتني وذبحتني خلات قلبي برجف مالداخل رغم اني مبينة العكس كيفو هو ....الظاهر راح ترجع حياتنا هكذا كل واحد يخبي وجعو في قلبو باش ما يقلقش الطرف الاخر...راح مضطر نرسم ابتسامة مزيفة على مدار الساعة...راح نضطر نتاقلم مع وضعي الجديد وحياتي الجديدة لانو ماعنديش حل ...
