عِقد الغسق

"part 6"

عِقد الغسق .
#نورية علي .

"العِقد السادس"

‏أحياناً أنسى، وأظن أني شخص رقيق للغاية
و أحياناً في لحظة سريعة أتذكر كم أني امرأة قاسية.
..........

صعدت فوك أحضر ملابسي وكالبة خلقتي حضرتهن وهي هم حضرت ملابسها تعشينة وطلعنا وهنا من صدك أتمنى ما طلعت ولا رحت أبددد ..

طلعنا وباب بيتهم صايرة هوسة ونسوان وجهال وشايلين كوم علاليك بأختصار السالفة داجة و"لعبان نفس" وهذا يضرب بذاك واطفال متعاركين بينهم والنسوان وحد تصيح على الثانية

صعدنا وأنا كعدت يم الجامة ما أتحمل وماما بصفي
وكُل شي يصيحون الله مصلي على محمد وآل محمد.

وكُلهم يكررون وراه والنسوان يسولفن والسايق مشغل
سورة "يس"

محد مهتم كُلهن يسولفن ويضحكن ولا جن أنا من يمي
غريبة ومتت قهر عليها فما بال أنتوا أقربائها جناينها
وبناتها وأحفادها ! الي يشوفهم يگول طالعين سفرة نتونس

باوعت للطريق عبارة عَن ظلام حالك فقط عواميد الأنارة ومطفايات هم وصلوا السيطرة وصاح أصهب طفي ضوة الكوستر أخوية، طفاه السايق وكف يم السيطرة أخذ منه أوراق وهوية أصهب والزلم كلهم جان عسكري لازم الأوراق بأيد ويعدل نظارته بالأيد الثانية ...

يشوف ويتصفح المستمسكات بأيد ثانية وأثنين كاعدين على قنفات ويضحكون ويكرزون حب صاح بيهم

- سكتواااا عاد .

وهم وبنفس الوقت خنسوا ولا جن غلط عليهم ..

كمل الأوراق ورجعهن سلم عليهم ومشا السايق ...

سما:- ولج لارا دشوفي شلون هيبة وجمال وجهة يبرك برك حتى وكفته تخبل ..

كرصتها وأردفت والأبتسامة شاكة حلكها ..

لارا :- وج حتى حواجبة مشطهن،أوف أمووت أني ولج اتخبللللل ولا هذا أخوج العار واكف فوك روسنة ..

خليت راسي على الجامة وهنة يسولفن يكصن بالعالم
وهاي تصيح أرديد بطل مي وهاي تلملم بالقواطي وهاي ترديد فستق وهاي تريد تغير الأبنها وهذا المحصور ...

راااسي صدع من الهوسة وهنة ما ملن أبد..

وكأن الي راحت مو عزيزة عليهم ولا تكربهم، مرة طيبة مثلهاصعبة تنسي !

فتحت الجامة شوي ولفج وجهي هوا بارد يرد الروح
بيه نَسمة رطوبة وريحة منعشة ضليت صافنة على الشارع وأسمع سوالفهم إلى أن غفيت وما فزيت غير على صوت

ماما وهي تگرص بيه حتى أگعد...
عدلت گعدتي ولفيت شالي عدل وبدوا ينزلون...

الشمس بعدها ماطالعة شلون راح ندخل المقبرة إحنا والأطفال !