وينك يا درب المحبه ؟. / البارت 21 مهم ..

البارت 7

عنوان البارت : (ليت الدنيا ما تغير نفوس الناس .) ...
.
.
تالي الليل كل الناس نايمه الا ناس ما تخاف ربها في مكان بعيد عن الناس ..
: اسمع الحين بنحط ذي بسيارته بس انت متأكد انه بيسافر بكرا؟
مفلح : متأكد بس اهم شيء تأكدو ان بيكون في تفتيش
: ذا لعبنا انت لا تتدخل به
مفلح بسخريه : نشوف لعبكم
----
الصباح
رهف : ماشاءالله صاحيه بدري وش ذا النشاط
الجوهره عند الشباك ابتسمت : اليوم احس انه يوم حلو
رهف ابتسمت : بيصير حلو اذا نزلتي وافطرتي عاد امي اليوم هي اللي مسويه فطور
الجوهره ركضت : لو قلتي من البدايه الحق قبل لولوه تأكله
رهف ضحكت : لولوه للحين نايمه
الجوهره دخلت : والله انكم خاينات ما قلتو لي ان امي هي اللي مسويه الفطور
امل : ما ابيك تخلصين خبز خالتي يا زينه عاد انتي تاكلينه بلقمه وحده
الجوهره قعدت وافطرو
عند العيال
فهد : يا عيال بقول لكم شيء
طلال واللقمه بفمه : وش ؟
وليد : انت كل اللقمه وبعدين تكلم في كل شيء مستعجل
طلال : ياخي بكيفي
نايف ضحك : اسكتو خلونا نسمع فهد
التفتو لفهد : وش فيكم كذا تطالعون احس اني مسوي شيء
وليد : اخلص وش فيك؟
فهد ابتسم : انت تعرف يا وليد بقول لطلال وخالد ونايف
خالد بفضول : انت وراك شيء كايد وش فيك؟؟
فهد ضحك : لا والله بس بقول لكم
طلال بعدم صبر : اخلص لا اصفقك بكاسة الشاهي
فهد : خلص طيب بس مدري كيف اقول
نايف : لحول بتقول ولا انقلع
وليد يحاول يتذكر : وش اللي اعرفه؟
فهد ابتسم : خلص بقول انتم تدرون ليه سميت ناقتي مزيونه ؟
وليد ضحك : اها اجل بتقول لهم ترا بيمسكونها عليك
طلال : لا ليه اخلص ؟؟
فهد : انا أحب وحده
نايف : ماشاءالله متى زواجك ؟
فهد حك راسه : بس في شيء
طلال : ابشر ياولد العم كان تبي اللي يوقف معك
خالد : بنوقف معك
فهد : ما تقصرون بس مدري عن البنت هي تحبني ؟
نايف : دقيقه الحين عرفنا انك تحب بس مزيونه وش دخلها ؟
فهد : تعرفون اذا تزوجتها ان شاء الله
طلال : طيب ليه ما تخطبها وخلص
فهد : يا عيال الوضع مو سهل ولد عمها مفلح الكلب وانا اخاف يسوي حركاته ويخرب علي
خالد : ماله شغل مفلح ببنت عمه رأيها ورأي ابوها وما بيسوي شيء عاد الايام ذي صاير يقرب من جدي
فهد تنهد :  يصير خير ان شاء الله
وليد بيلطف الجو : خلص اتركونا من سالفه مفلح ذا والحين يا عيال لازم نحلل الاجازه ذي قبل المدرسه
طلال : والله يا وليد مدري وش نسوي
نايف : شرايكم نكشت برا
فهد : لا يا شيخ فكنا طفشت من الكشتات
نايف : اجل وش تبون نشوي
طلال : وليد هذا مو خويك عبدالله ؟
وليد التفت : اي يالله حيه اقلط يا عبدالله
عبدالله ابتسم : الله يحيك
فهد ضحك : هاه كيف الغياب
عبدالله : تمنيت اني درست ولا قعدت اسمع مليون محاظره من ابوك
ضحكو خالد : المهم عبدالله ما عندك فعاليات ؟
عبدالله ابتسم بخبث : اي عندي الفعاليات انتم بس قولو تم
فهد : تم بس وش هي الفعاليات ؟
عبدالله : ما عليك انتم تعالو وبس وابشرو بالفعاليات
قام وراح عبدالله طلال : انا ماني مرتاح لعبدالله ذا
وليد ضحك : انت متى ارتحت له من قلت لك انه صديقي تقول ماني مرتاح له
خالد بشك : احس ان وراه بلا في شيء بس مدري وش
فهد : يا عيال خلص المغرب نروح ونشوف وش عنده
( تعريف بسيط لعبدالله : هو وحيد امه ما عنده اخوان ولا خوات ابوه توفى قبل ثلاث سنين بمرض السرطان )
عند البنات
سلمى : بنات امي تقول ام سحر دقت عليها وتقول ان في جلسه عصريه عندها نجي
الجوهره : لا تكفين ماني رايحه بقعد
رهف تنهدت : صح ان مفلح حيوان بس ماله شغل اخته واحس حرام هي كل يوم تقعد ولا في  احد عندها وام سحر دايم تبي سحر تجينا بس هي تستحي
امل : انا بقعد مع الجوهره ما اخلي زوجه اخوي المستقبليه لحالها
لولوه : انا بروح واشوف اخت الكلب ذا هي تس تس ولا مثل ما تقول رهف بريئه
سلمى : انا رايحه عشان امي تبينا نجي معها هي وخالتي ام نايف وام خالد
ام نايف دخلت : بنات تعالو جهزو الغدا معنا
في بيت ابو مفلح
مفلح : هاه وش قالو ؟
ع : بيجون بس انت جهز الاغراض ولا تنسى فلوسي
مفلح بسخريه : شف لا تغلط زي هذيك المره الرجال اللي ارسلته ما هو قد اللي بسويه هالمره انتبه
ع : ماهو انت اللي تعلمنا شغلنا جهز الاغراض وهم بيجون العصر
مفلح : جاهزه خذها بس لا تنسى تحط بعد في سيارة خالد ذا
ع ابتسم بخبث : حلو كذا بيزيد السعر ترا
مفلح : بعطيك بس اهم شيء خل التفتيش ينتبه للكيس ذا
ع : لعبتي هاته
العصر
ام فهد : يلا امشو نروح لام سحر
راحو البنات ما بقى غير امل والجوهره بالبيت
الجوهره راحت للشباك وفتحته
امل : يا ذا الشباك ودي اعرف وش تشوفين ابعدي
الجوهره بأستغراب : شوفي ذا الرجال وش يسوي عند سياره خالد
امل بصدمه : قاعد يحط اكياس وش فيها ؟؟
الجوهره : بجيب جوالي واسوي زوم واشوف
فتحت الجوال وصورت
امل : بدق على خالد
الجوهره : لا تدقين اكيد معه احد .. شوفي هذاك واقف يستناه
امل : وش نسوي طيب ؟؟
الجوهره : انا بصور واحفظ الفيديو واذا رجعو من دكان عمي نروح لهم ونوريهم
امل تنهدت : مين ذول وش يبون بخالد ؟
الجوهره قاطعتها : ذا مو عبدالله ؟
امل : مين عب...
الجوهره قفلت الشباك امل : وش فيك ؟؟
الجوهره : كان بيشوفنا وحنا نصور
امل : تعالي فهميني مين عبدالله ذا ؟؟؟
الجوهره : عبدالله ذا خوي وليد ليه قاعد عند ذول الرجال
امل : لا يكون من حركات مفلح
الجوهره بشك : والله يسويها قامت فتحت الشباك
امل : انتبهي لا يشوفك
الجوهره وهي ماسكه الجوال تصور : خلصو وبيروحون
عند العيال
فهد ضحك : يا زينك يا نايف من وين تجيب النكت ذول
نايف بسخريه : ذول حكم يا غبي مو نكت
وليد : يا عيال الجوهره ارسلت لي تقول تعالو كلكم بالمقلط
طلال : اي انا امل لها ساعه ترسل مدري وش فيه
خالد بخوف : لا يكون صاير لهم شيء
فهد : امشو بسرعه
في البيت
فهد : وش فيكم ؟
الجوهره : ا.. اليوم بعد ما امي والبنات راحو بيت ام سحر انا وامل فتحنا الشباك كذا نشم هوا و ..
وليد بخوف : وش كملي ؟؟
الجوهره : وشفنا رجال يحط بسيارة خالد اكياس مدري وش فيها
امل كملت : وصورناه
خالد : ليه ما دقيتو علينا ؟
امل : كانو في رجال كثار حوله بس ناضرت الجوهره
الجوهره تنهدت : كان من ضمن الرجال عبدالله نادى الرجال اللي يحط الاكياس وراحو
قام طلال : والله اني حاس
فهد : يا عيال اقعدو الجوهره ارسلي لي الفيديو وانا بتصرف
وليد : وش تتصرف يمكن حاطين شيء استغفرالله وبيورطون خالد
فهد : عندي صديق يشتغل بالامور ذي برسله واقول له
قام فهد ودق على راكان : الو
راكان : هلا كيفك يا فهد من زمان عنك
فهد بتوتر : والله مدري وش اقول بس
راكان : وش فيه صاير شيء؟؟
فهد : (علمه السالفه )...
راكان : ارسل لي الفيديو
فهد : طيب الحين وش نسوي ؟
راكان : روح لعزيمه عبدالله ذا ولا تشربون اي شيء يعطيكم اياه وانتبهو لا يشك انكم تعرفون شيء وانا برسل الحين دوريه تفتش سياره خالد وتلحقكم للبيت اكيد في بعد ببيته
فهد تنهد : عبدالله وش اللي خلاه يسوي كذا
راكان : يمكن انه ضحيه ذا الشيء
قفلو وقال لعيال عمه الخطه
امل بخوف : خايفه نقعد لحالنا
طلال : قفلو الباب عدل وانتبهو لا تفتحون الباب لاحد انا ادق وانتم افتحو
امل والجوهره قامو وراحو جوا البيت
وليد :أذن المغرب قومو خلونا نصلي
بعد صلاة المغرب في بيت عبدالله
عبدالله ابتسم بخبث : ما اخذت اخباركم
فهد : بخير الحمدالله
عبدالله : اشربو ذا العصير انا عاد مسويه راح يعجبكم
وليد وقلبه يوجعه على خويه : لا يعطيك العافيه تونا متقهوين ومخلصين جايين نسولف معك
دخل مفلح قام عبدالله يرحب فيه
خالد بهمس : وش جابه ذا ؟
فهد بهمس : وش درا عبدالله البزر بذي الامور اكيد مفلح الكلب هو وراه ولا شف كيف يعامله
عبدالله : يا عيال تقهو اقل شيء
طلال : كثر الله خيرك متقهوين
نايف بهمس : ذا وش الخير اللي عنده ؟
وليد قرصه بهمس : اسكت لا يحسون
في الصمت ذا جوال فهد دق : الو
راكان : اسمع الحين حنا بندخل عليهم ونمسكهم انتم جاهزين ؟
فهد : اي يبه الاغراض جاهزه بدكان عمي حطينها
راكان : بندخل قفل المكالمه
فهد : يلا مع السلامه يبه
مفلح بشك : التفت لخالد ما تبي كاسة شاهي اخبرك تحبه ؟
خالد : لا يعطيك العافيه خالصين
دخلو الشرطه
راكان : لحد يتحرك  التفت لفهد اي ذول عيال عمك؟
فهد : اي
راكان : اطلعو برا وانتم امسكو الاثنين ذول و ودهم المركز نحقق معهم
مفلح : وين ماخذيني وش دخلني
عبدالله بحده : ان تكلمت وانكرت بتنفضح فاهم
راكان : ولا واحد فيكم يتكلم
فهد : وش جابك اخبرك بالرياض
راكان غمز : سر المهنه
خالد بتوتر : وش لقيتو بسيارتي؟؟
راكان تنهد : مخدرات كانو بيهربونها معك
طلال : كيف عرفو ان خالد بيسافر بكرا ؟؟
راكان : انتم تعرفون ذول الاثنين
وليد تنهد : اي عبدالله خويي ومفلح الكلب ذا عدونا
راكان : وش مسوي
فهد : ( علمه كل شيء صار )
راكان التفت لنايف : وش فيك ساكت ؟؟
نايف : وش تبيني اقول الله ياخذهم بس
راكان : المهم الحين روحو لبيوتكم وانتبهو اكيد لهم احد بيلحقونكم لو درو وفهد عط رقمي لعيال عمك لا صار شيء يدقون علي
راحو للبيت
فهد : الجوهره وينك ؟؟
الجوهره نزلت بخوف : وش صار شفنا دوريه عند بيت عبدالله ؟
فهد ابتسم : ما صار شيء بس الحمدالله على كل حال وين امي والبنات ؟
الجوهره : دقو علي قالو بيروحون بيت خالتي
فهد : بتروحون عندهم ؟
الجوهره : لا بكرا بس هم راحو قبلنا 
فهد استوعب : مين خالتي ام عبدالرحمن ؟؟؟
الجوهره ابتسمت : اي وبكرا حنا بنروح لها
وليد قاطعهم  :  فهد تعال مسوين كشته بالحوش
فهد : يلا بروح عندهم
الجوهره راحت للغرفه : امل نمتي
امل : اي بنام احس تعبت من التفكير اهم شيء انهم بخير
الجوهره : نوم العوافي راحت للشباك وفتحته وهي تشوف العيال مجتمعين حول النار طلال كعادته يهاوش وليد ليه يكثر سكر بالشاهي وفهد يعلم نايف لعب البلوت وخالد ينتظر الشباك ينفتح رفع راسه وهو يشوف ظل احد ورا الشباك
خالد التفت لطلال رفع صوته : طلال الحمدالله اللي سلمنا من شرهم
طلال استغرب التفت لشباك وفهم : اي والله الحمدالله بس ما عندك شعر تخلد به ذي اللحظه
فهد التفت وابتسم : حركات يا خالد صرت شاعر
خالد ابتسم وناضر الشباك :
ياللي ظله  لا شفته تبسمت
ما ودك نقطع الفراق ونجتمع ؟
نلتقي على مفرق الطرق صدفه
ولا القدر بيجمعنا لان محد(ن) من الخلق يقدر يفرقنا
فهد : الله عليك يا شيخ بس مين ظله ذا ؟؟
طلال ضحك يتدارك الوضع : والله شاعر المهم متى نلعب بلوت
خالد سرحان في الشباك والجوهره سمعته بس ما قدرت ترد
في مركز الشرطه
راكان : انت للحين في عز شبابك وش حدك تروح وتساعدهم ؟
عبدالله : انت وش تبي الحين ؟
راكان تنهد : قل لنا وانت تدري وش عقوبات اللي سويته
عبدالله بتوتر  : خلص بقول بس فكني منهم
راكان : انت في إمان تكلم
عبد الله : انا ما اعرف الاشياء ذول بس مفلح مره جاني وقال لي اذا ابي فلوس اكون معه انا رحت وعرفني على رجال ما اعرفه وحطو الفلوس قدامي واعماني الشيطان وقبلت اكون معهم واجيب لهم ناس وقبل يومين جاني مفلح يبيني اورط خالد معنا واحط بسيارته مخدارت ويمسكونه التفتيش ويدخل السجن لانه  ...
راكان : كمل ليه بيدخل خالد السجن ؟؟
عبدالله : لانه يحب اخت فهد وبياخذها علشان يقهر خالد
راكان انصدم : طيب وخالد وش دخله ؟
عبدالله : خالد والجوهره من هم صغار ومعروف عند كل الديره انهم لبعض وهم يحبون بعض بس مفلح بياخذ الجوهره غصب
راكان : عندك اثبات على ان مفلح يشتغل معهم ؟
عبدالله تنهد و نزل راسه : لا
راكان : مفلح يعتبر مشتبه به بس انت متأكدين انك معهم وما نقدر نوقفه وما عندنا دليل قام خذوه وابدو ارفعو ملفه للنيابه
_____
سلمى : رهف شوفي جوالك ما سكت
رهف ابتسمت لولوه  غمزت : لا يكون الحبيب ؟
رهف راحت بعيد شوي وردت : الو
مطلق ابتسم :  يا هلا بحب حياتي
رهف ابتسمت : بغيت شيء ارسلت مليون مره صار شيء ؟
مطلق : اي صار في قلبي نار اشتياق لصوتك
رهف ضحكت : مطلق هذا وحنا للحين ما تزوجنا
مطلق : فديت هالضحكه اذا تزوجنا ما بخليك ولا دقيقه
ام فهد : وينكم يا بنات امشو بنروح البيت
رهف : مطلق يلا بروح مع السلامه
مطلق : اذا ما نمتي دقي علي بسمع صوتك
ضحكت رهف وقفلت
سلمى : الله يديم هالضحكه
لولوه : امشو بمووت  نوم
سحر دخلت : بنات حطيت حلا للجوهره وامل
سلمى ابتسمت : يعطيك العافيه
لولوه بهمس : ما تدري ان محد بياكله غير وليد آخر الليل من الجوع ولا الجوهره وامل كرهوها من اخوها
رهف قرصتها : يلا امشو امي وخالاتي ينتظرون
في البيت
ام فهد : يلا نامو بكرا ورانا شغل
البنات : ابشري
سلمى دخلت : الجوهره للحين ما نمتي ؟
الجوهره قفلت الشباك : لا توني كنت بنام
لولوة جلست : احس سحر طيبه بس كل ما اتذكر اخوها اكرهها زياده
رهف : اي انتي حللي شخصيتها وانا بنااام تعبت
سلمى : وانا بعد بنام
____
الصباح
ابو نايف ضرب الباب : قومو بلاكم السهر ما نمتو
قام فهد مخروش : بسم الله وش فيه ؟
ابو نايف : قم بنروح لجدك وقوم ذول السرابيت
فهد : ابشر التفت لهم يا عيال قومو والله وجه عمي يخرش لا يجي يصفقكم
وليد قام : ياربي انا وش سويت علشان اعيش مع عايله تحب تقوم الصبح
ضحك نايف : والله تقبل الوضع وش تسوي
وليد : ماشاءالله صاحي من بدري قبل الديك اشوفه
خالد : يالخاين ما صحيتني معك
نايف : عاد احس تعودت اقوم الصبح
فهد : انا عايش ذ٢٥ سنه ولا تعودت
طلال : اخلصو بغسل وجهي
ابو نايف : بسررعه ورانا اشغال
وليد : وش الاشغال اللي كل يوم ذي
ابو نايف سمعه : اذا جيتك وصفقتك بالعصا تعرف
دخل وليد بسرعه الحمام ضحكو العيال
عند البنات
سلمى : خالتي ام عبدالرحمن جت  ومعها زينه انزلو شوفوها
الجوهره دخلت سلمت على خالتها : زينه وش رايك تجين معي نطلع نتمشى زي قبل
زينه ابتسمت : يا زين ذيك الايام مشتاقه لها
الجوهره اخذت نفس عميق : الله شكل بيجي مطر
ام خالد  : الجو بدأ يبرد ادخلو
الجوهره ابتسمت : شوي وندخل التفت زينه البسي شيلتك وانا بروح انادي البنات نروح لمكاننا
اجتمعو البنات
امل : الله يا زين الجو اليوم يجنن
سلمى : رهف ابعدي بصور
رهف بسخريه : سلمى انتي ما بتتركين التصوير
سلمى ابتسمت : يا زين الذكرى عاد وفي غيري يحتاج الصور ذول (طبعاً مو أنا🌚)
زينه : خليها تصور عاد تصوير سلمى يجنن
امل ضحكت : شوفو العيال
التفتو رهف ضحكت : والله جدي كرفهم الحين تو الشتاء ما جاء ليه مجهزين حطب
الجوهره : يا عمري شوفيهم اكيد تعبو
لولوه قرصتها : خليك ثقيله يالمخفه
الجوهره : وش فيك اقصد اخواني
زينه : بنات  انا ما اذكر غير شكل فهد الباقي مين ؟
التفتو امل ولولوه لبعض زينه : وش فيه ؟
رهف : شوفي هذاك اللي كأنه عامود خالد
الجوهره : حرام عليك والله طوله حلو
رهف : انتي اسكتي خليني اكمل وذاك اقصر واحد تشوفينه
زينه : اي
رهف : هذاك نايف واللي يتهاوشون وليد وطلال وفهد تعرفينه
زينه : تغيرو بسرعه اذكر نايف وهو عمره سنتين
ابو فهد نادى البنات
الجوهره : لبيه يبه بغيت شيء ؟
ابو فهد ابتسم : روحو لامكم ساعدوها بالعشاء و الجو بدأ يبرد لا تمرضون
البنات : ابشر
انتهى اليوم بسلام بعد ما  كان بيكون شر عليهم بس بفضل ربي انكشفو ...

إنتهى البارت ...