وينك يا درب المحبه ؟. / البارت 21 مهم ..

البارت 17

عنوان البارت ( سر الابيات )
.
.
.
.. في بيت عائله ابو فهد ..
ام فهد : ليه مستعجلين ؟
ابو فهد ابتسم : فهد عنده اشغال والبنت بعد بتكمل دراستها وش تبين نسوي
ام فهد : بس الجوهره ..
قاطعها ابو فهد : اذكري الله ماهو صاير لها شيء وراكان وخالد قاعدين يحققون وبإذن الله بترجع
ام فهد : ونعم بالله بس اللي شغال بالي منهو يخطفها
ابو فهد : ما بيدينا حيله
دخلت سلمى : يبه فهد يبيك
ابتسم : ما علمتك تدقين الباب
سلمى رجعت ودقت الباب .. ابو فهد : ادخلي
سلمى ابتسمت : يبه فهد يبيك تحت
ابو فهد : جاي الحين ..
فهد التفت لوليد : اسالك بالله بتزوج انا ؟؟
وليد بسخريه : لا انا اخلص عدل غترتك
دخل ابو فهد : وش صاير ؟
فهد : يبه خالد يبي يكلمك
اخذ الجوال : الو
خالد : عمي للحين ما جاء ببالك احد ؟
تنهد : لا والله ان مافي احد أذيته ولا سويت له شيء
ابتسم :  ما عليك يا عمي بإذن الله راجعه الجوهره
ابو فهد : انا متوكل على ربي و واثق فيك وانا عمك
خالد : يلا يا عمي قربنا نوصل اكلمك بعدين .. قفل
وليد : يبه قلت لهم ؟
تنهد : بالاخير بيدرون باللي صار  للجوهره
.. في القصر  ..
مفلح التفت لإيما : متى سوف تستيقظ ؟
إيما : لا اعلم يا سيدي هل تريدني ان ايقظها ؟
تنهد : ايقظيها لن انتظرها اكثر من ذالك
إيما ذهبت للجوهره النائمه التي لا تعلم كيف استطاعت ان تغمض عينيها ..
إيما : اسيقظي سيدي يريدك
الجوهره : لا يهمني سوف انام
إيما سحبت البطانيه : لتستيقظي
الجوهره : الله ياخذك انتي وسيدك
إيما : لا افهم ماذا تقولين بالضبط لكن لتستيقظي
الجوهره : طيب خلص بس فكي اللي بيدي ذا
إيما بإستغراب : هل تتكلمين العربيه ؟
تنهدت : هل يمكنك ان تنزعين الذي في يدي اريد الذهاب لدوره المياه
ابتسمت : حسنا .. فكته
وقف الجوهره بتطلع لكن طلع قدامها مفلح : لا يكون بتهربين؟
الجوهره تحاول تفتح عيونها : نسيت اني انخطفت اصلا هه بعدته علشان تطلع بس مسك يدها : مو من هنا طريق الحمام من هنا
الجوهره بعدت يده : لا تمسكني راحت لدوره المياه
مفلح : إيما لتراقبيها فهي مجنونه
إيما : حاضر سيدي
مفلح : جهزتي ملابسها ؟
إيما : نعم مثلما طلبت
ابتسم : بدت الاحداث
..
ظاهر : يا عيال ظهري تكسر
راكان : اصبر اضن ان هذاك هو البيت
خالد بصدمه : هذا بيت ولا قصر
ظاهر فتح فمه ضربه راكان : قفل فمك شوي واشوف حنكك بالارض
خالد : نزلوا روسكم في حراس
اختبئوا خلف شجره وجلسوا
راكان : الحين باسل اخذوه وعلى حسب الموقع اللي ارسله لنا هذا هو
ظاهر : الحين شلون بنعرف الجوهره ؟
خالد تنحنح : ما عليك انا بعرفها
ظاهر : وش دراك ؟
راكان : يعرفها من هم صغار وش تتوقع بعدين لا تسأل اسئله تفشل
ضحك : يقلع الحب اذا بيسوي بنا كذا
خالد جلس يراقب : مين هذا ؟؟
راكان قرب : عليه ملامح عربيه ؟
ظاهر : قاعد يركب السياره وين بيروح
خالد : اضن انه اللي يساعد مفلح ؟
ظاهر تنهد : ليه من بين كل الامكان ما سكنوا غير في قصر وسط غابه و وراه بحيره يعني اذا ما متنا منهم بنموت اثر العوامل الطبيعيه
خالد التفت لراكان : هذا وش يقول ؟
راكان : ما عليك هو اذا فكر كثير ما يعرف يتكلم
ظاهر : م .. مفلح ياا عيااال مفلح .. التفوا بصدمه
خالد بغضب : اخ يالخسيس دقيقه مين هي ذي ؟
راكان : ذي واضح اجنبيه بس ليه ما ركب السياره ؟
ظاهر : واضح يستنى احد
طلعت الجوهره وهي وراها حراس من يسارها ويمينها كانت لابسه لبس اسود وقبعه سوداء وكمامه سوداء تخفي ملامحها كان شعرها مفتوح ونسيم الهواء يطيره
خالد طاح بالارض مسكه راكان : وش فيك ؟
خالد مسك راسه : الجوهره الجوهره وين بيودونها وليه طالعه كذا
ظاهر : شوفوا ركبوا السياره
راكان : باسل ليه ما طلع للحين .. مسك الجوال واتصل عليه
رد : الو
راكان : وينك ما اشوفك
باسل : يا غبي انتم اللي وينكم انا قدام بيت او تقريبا كوخ ريفي
راكان : تستهبل
باسل : وانا بوضع مزح
ظاهر : وش صاير ؟
خالد : امشوا نلحق السياره
راكان : استنوا في شيء غلط
خالد : وش ؟
راكان فتح الموقع اللي ارسله باسل : حنا بموقع غلط
ظاهر : كيف ومفلح وش جابه ؟؟
خالد : حنا بالموقع الصح
راكان : بس باسل مو موجود هنا
خالد : وش قال هو ؟
راكان : انه قدام كوخ ريفي وينتظرنا
ابتسم : امشوا نلحق السياره اذا ما قدر يتفاوض معهم مافي بيدنا الا نقتحم هالقصر ونطلع الجوهره
ظاهر : يعني حنا عرفنا مكان الجوهره بالغلط
راكان ضحك : وش هالحظ اللي عندنا
خالد : ما ابعدوا مره خلونا نلحقهم قبل يختفون ..
.. في بيت عائله ابو عبد الرحمن ..
لانا ابتسمت : جاء اليوم اللي بشوفك فيه متزوجه
ام عبدالرحمن تنهدت : ودي تسون عرس يا بنتي
زينه : يمه مافي وقت
لانا : يا يمه خلص اهم شيء هم مبسوطين وعاجبهم الوضع
دخل عبدالرحمن : الله وش هالكشخه
لانا : انا ولا العروس ؟
عبدالرحمن : لا انتي ولا هي امي قفلت ملفكم
ام عبدالرحمن ضحكت : عقبال ما اشوفك عريس
تنهد : يمه رجعنا للموضوع
دخل راضي : خلصتوا علشان نروح بيت جدي ؟
زينه ابتسمت : خلصنا
.. في بيت الجد فهد " ابو عبدالعزيز " ..
كان المجلس يعمه الصمت ليس كعادته لا يعلمون ماذا يشعرون به وكأن البيت انطفئ واختفت جوهرته التي كانت تضيئ البيت فرحًا ، بعد ان تمت مراسيم عقد القرآن ولم يتبقى سوى موافقه العروس ..
تميم : وقعي تحت
زينه والدموع بعينها : يعني الحين اذا وقعت خلص بصير متزوجه ؟
فريد اللي كان واقف جنب تميم : زوز خلص لا تصيحينا
ابتسمت : طيب عطوني القلم
لانا : استني بدور فلتر
فريد : ياليل ذي الثانيه ما عليك وقعي بس
لانا : لااا خلص لقيته اذا قلت ابدي خلص وقعي
ضحكت : طيب
لانا : ابدي ..
زينه وقعت ، حضنها تميم : الف مبروك يا اجمل عروس
فريد : ابعد دوري
تميم ابعد : خلص يا غيور
حضنها فريد : الف مبروك بس عاد لاتنسيني
زينه : ومين ينساك
لانا : اقول انت وياه يلا برا بشبع من اختي
طلعوا تميم وفريد ودخلت ام فهد وام عبدالرحمن كانوا يبتسمون رغم القلق والحزن اللي بداخلهم
ام فهد ابتسمت : ما اقنعتيه يقعد كم يوم
زينه بخجل : يقول وراه شغل بالرياض ما يقدر يأخره اكثر من كذا
ام عبدالرحمن : جهزتي اغراضك ما نسيتي شيء ؟
زينه : لا يمه ما نسيت شيء
حضنتها ام عبدالرحمن : توصلون بالسلامه
ام فهد ضحكت : هذا هو جاي بيسلم وياخذك
دخل فهد تنحنح : السلام عليكم
ام عبدالرحمن : وعليكم السلام يا هلا ، سلمت عليه
التفت لأمه وباس يدها وراسها وقال : يمه ما عليك
ام فهد تمسح دموعها : الله يردها سالمه يلا وانا امك هذي زينه وهذاني اقولها قدام خالتك تراها امانه عندك ولا تزعلها يا ويلك
فهد ضحك : ابشري واخسي ازعلها
ام عبدالرحمن : توصلون بالسلامه
طلعوا فهد وزينه وكل واحد يخفي قلقه وحزنه عن الثاني
.. في تورنتو ..
خالد : راكان زبط الجهاز
راكان : دقيقه اي لقط اشاره قربوا علشان نسمع عدل
داخل الكوخ الريفي ..
مالك : هل تريد ان اتحدث معك العربيه ام الانجليزيه
ابتسم باسل : افضل العربيه
مالك : تفضل قول اللي عندك
باسل : ايش هي مطالبك وترجع الجوهره
مالك بسخريه : اولا الشرطه لا تتدخل باللذي يحدث بيننا كي لا تكبر الامور
باسل : نحن للآن لم نطلب التعاون مع شرطه تورنتو لذا لديك ٢٤ ساعه لتسليم الجوهره
مالك : وهل تضن انني سأسلمها لك بتلك السهوله ؟
باسل : اعرف انك تريد شيء قل ماذا تريد ؟
مالك : هل اتيت لوحدك ؟
باسل : هل تريد ان تماطل ؟
مالك : اتعلم لا توجد لدي مطالب او دوافع لكن هل سبق ورأيت الجوهره آه تبا انها جميله جدا لذا سوف ازوجها لأحد الاشخاص
باسل ضرب الطاوله : وش تقول انت اضن انك تريد ان تقع بمشاكل لا تنتهي
مالك : ان الاحداث تبدأ من هنا
باسل : احذرك من ان تفعل اي شيء لها
مالك : امم اضنك تريد سماع هذا الشيء منها ، التفت لأحد الحراس  احضروها
الحارس : حاضر سيدي
فتح نافذه السياره : بدأ دوري ؟
الحارس : نعم سيدي
مفلح التفت للجوهره : تقولين اللي قلته لك بالحرف الواحد ولا تشوفين اللي وراك صح
الجوهره : ايش وراي ؟
فتح جواله وصور : شوفي
الجوهره بتوتر : ما بتسوي لهم شيء صح ؟
ابتسم : اذا سويتي اللي ابيه اكيد ما بسوي لهم شيء
الجوهره : خلص طيب بقول اللي تبيه بس لا تقرب من خالد
تنهد : واول شيء ابيك تسوينه تنسين خالد
الجوهره : طيب
نزل مفلح من السياره واتجهه لباب الجوهره وفتحه : انزلي
نزلت الجوهره ودخلوا الكوخ ..
باسل : انتي الجوهره ؟
الجوهره : اي نعم
باسل : انتي تبين تقعدين هنا ؟؟
الجوهره نزلت راسها : اي
باسل التفت لمفلح : وانت مين تكون حضرتك ؟
( ملاحظه : باسل ما شاف مفلح ولا يعرفه )
ابتسم ومسك يد الجوهره : انا بكون زوجها المستقبلي
باسل بصدمه : ا .. انت وش تقول ؟؟؟
.. في ذالك المكان الذي لا يبعد عن الكوخ الا كم متر ..
خالد : راكاااانن فكني بروح اذبحه وش يقول وش زوجها
راكان : ظاهر تعال امسكه معي مقدر اتحمل
ظاهر مسكه : يا ابن الحلال اهدأ
خالد يصرخ : اخخخ يا مفلح يا ابن ال*** يا حقير
راكان  ضرب رأسه وصاح خالد ، ظاهر : مات !؟؟
راكان تنهد : ما مات اغمى عليه بروح اكمل اسمع وش يقولون
.. في الكوخ ..
باسل تنهد : الجوهره متأكده من قراراك ؟؟
الجوهره : اي
باسل : اذا يهددونك قولي لي اقدر انقذك تكفين تكلمي لا يروح فيها خالد
الجوهره بصدمه : خالد انت تعرفه ؟
قاطعها مفلح بغضب : انت جاي تتفاوض ولا تلعب بعقلها ؟؟
باسل : انتم اللي لاعبين عليها الجوهره قولي لي وش سوو بك ؟
مفلح شد على يدها ، الجوهره نزلت راسها : ما سوو شيء
باسل : تكفين قولي ..
قاطعه مالك وضرب الطاوله : هيه انت هل اتيت لتفعل المشاكل لتخرج الآن بعدما تأكدت انها هي بنفسها تريد البقاء
باسل بغضب : وانت تحسبني حمار ولا مختل اصدقكم ؟؟
مالك التفت للحرا : لتخرجوه ماذا تنتظرون
باسل : لحد يقرب بطلع ، التفت لمفلح صدقني انت اللي اخترت الموت بيدك وطلع
الجوهره ابعدا يد مفلح وصفقته : يا حقير اتركني وش سويت لك علشان تسوي بي كذا ليه تبي تدمر حياتي
مالك حط يده على فمه وبسخريه : اوه فلوحي هل تأذيت
مفلح مسك يده : تبين تموتين ؟
الجوهره : اموت ولا اتزوجك
مفلح : يعني تبين خالد يموت ؟
الجوهره : يا حقير لا تقرب منه
مفلح التفت للحراس : خذوها ولا بقتلها
الجوهره تصرخ : ابعدو عني مفلح الله ياخذك
ركبوها السياره واتجهوا للقصر ..
باسل تنهد : الحين ذا وش نسوي به ؟
راكان : خله يرتاح شوي
ظاهر : شرايك تضربني زيه ويغمى علي وارتاح ؟
راكان بنظره حاده : شرايك اعطيك ضربه اقوى وتخليك تموت وترتاح ؟
ظاهر بلع ريقه : اروح اجمع الاجهزه احسن لي
باسل : الحين وين نروح ؟
راكان : لقصرهم
باسل : قصر ؟
راكان : بفضل غباءك وصلنا موقع المكان اللي يحتجزون فيه الجوهره بالغلط
باسل ضحك : دقيقه يعني الموقع اللي ارسلته غلط بس طلع صح
راكان : ايواه يا منقذنا الغبي
باسل : احتاج ترقيه
راكان : هه انت تحتاج احد يصفقك
باسل : ليه كل اللي سويته وما عجبكم ؟
راكان : اي لانك حمار ليه تقول لا يروح فيها خالد تستهبل انت
باسل : ياخي حزنت يوم تذكرت ان خالد بيسمعه وهو يقول كذا ولا تخيل بالله تحب وحده ويجي واحد معتوهه يقول انا زوجها
خالد قام : مين تحب ؟
راكان : الله يقلع بليسك خرشتني
خالد يحك راسه : اخخ احس كأن احد ضرني على راسي
باسل يكتم ضحكته : سلامتك ما تشوف شر
خالد استوعب : دقيقه وين الجوهره
راكان : وكالعاده يستوعب متأخر
خالد قام يركض ، راكان صرخ : تعاال راحوا
رجع خالد بغضب : وش تقول ليه خليتهم يروحون ؟؟
باسل : اقعد بتروحون لمكانهم الحين وتراقبون وانا بروح لشرطه تورنتو
خالد :  ليه تروح لهم ؟
باسل : علشان نقدر نمسك هذاك واللي معه بشكل قانوني
خالد : دقيقه انا عرفت مفلح بس الثاني مين ؟
باسل : مفلح مين ؟
راكان : اللي يقول انها زوجها هذا مفلح بس الثاني
باسل : الثاني واضح انه مكس حتى لغته العربيه مو مره
ظاهر : مكس وش
باسل : يعني يا امه عربيه يا ابوه عربي و واحد منهم اجنبي لان واضح عليه الملامح مكس بينهم
خالد : امشوا نروح للمكان وانت يا باسل روح تفاهم معهم وقلّ لهم ان ما جابوا الجوهره بالطيب بجيها انا بالغصب
راكان : ما عليك باسل رح لهم انا بتفاهم مع خالد وبهديه
.. في الديره ..
بعد ان عاد الكل لمنزالهم وهم يحملون في قلوبهم الحزن والقلق على جوهرتهم و ذالك الاب الذي لم يستطع النوم وبقي في الصاله يتابع اي شيء وهو تفكيره كله وتركيزه على من سيفعل هذا ؟ ..
وليد : يبه يبه
ابو فهد : هلا ؟
وليد : ادخل ارتاح شوي ما نمت وتو باقي على الفجر كثير
ابو فهد ابتسم : شوي وانام انت رح ارتاح
تنهد : شلون برتاح
رن هاتف المنزل الذي لم يستخدمه منذ زمن بعيد بعدما اصبح يستعمل الهاتف المحمول رفع السماعه : الو
.. : " لا يوجد رد "
ابو فهد : الو ؟
.. : انتظريني واذا شفتي القمر ينور الكون
ابتسمي هذا نور ضيك يا بعد القمر والنجوم
ابو فهد سكت وكأن رجع به الزمن وبصدمه قال : مين ؟ .. لم يسمع رد من الطرف الآخر ولا يوجد صوت سوى صوت التلفاز ارجع سماعة الهاتف وبقي يفكر بذالك الصوت وكأنه قد سمعه وتلك الابيات التي لامست قلبه وكأنه شاعرها فمن يكون ذالك الشخص ؟ ..
.. في بيت ابو خالد ..
تنهد : اخوك متى بيرجع ؟
طلال : ما بيرجع الحين
ابو خالد : الحين ليه ما خلا الشرطه تدور عنها ليه يدور المشاكل
طلال : يبه خالد ..
ابو خالد : وش فيه ؟
طلال : خالد يحب الجوهره
ابو خالد ابتسم : شيء جديد يعني ؟
طلال بصدمه : يعني انت تدري ؟
ضحك : وادري كل قصايده
طلال : ايش ؟؟
ابو خالد : خويلد ما يعرف يحافظ على اغراضه لو احد غيري شاف دفتره وش بيسوي
طلال ضحك : مين بقى ما يدري
ابو خالد ضحك : امك
طلال : بتزعل اذا عرفت اننا ندري قبلها
دق جوال ابو خالد : عبدالعزيز وش يبي بهالوقت ؟
رد : الو
ابو فهد : محمد بقول لك ابيات
ابو خالد ضحك : وش ابياته طلع فيك حس الشعر الحين ؟
ابو فهد بتوتر : لا يا رجال اتصل احد على جوال البيت وقالها لي
ابو خالد بفضول : وش هي ؟
ابو فهد : انتظريني واذا شفتي القمر ينور الكون
           ابتسمي هذا نور ضيك يا بعد القمر والنجوم
ابو خالد بصدمه : هذي من وين طلعت ؟
ابو فهد بتوتر : مدري تعرفها ؟
ابو خالد : اذا ما خاب ضني زمان يوم كنا شباب اذكر انك قلتها وقلت انك بتقولها للي تحبها
ابو فهد : اللي احبها ؟؟
ضحك ابو خالد : شكلك جبت العيد ونسيتها وذكرتك ام فهد بها
ابو فهد : اي هه يلا بقفل تصبح على خير ..
طلال : وش فيه عمي ؟
ابو خالد ضحك : ما فيه شيء بس سوالف اخر اليل
.. في غرفه البنات ..
سلمى : كل ذا صار وما قلتي لنا يا رهف
رهف تنهدت : وش اسوي جدي قال لي اسكت بالوقت الحالي لين يقول لكم
لولوه تمسح دموعها : الحماره قلت لها ادخلي معي نادي التكوندو بس ما سمعتني
امل تكتم ضحكتها : واذا دخلته وش بيصير يعني
لولوه : وقتها تقدر تصفق اللي خطفها وتنحاش
امل : لولوه كل شوي تجيب شيء تندم عليه
لولوه : لا يكون زعلت مني علشان علمت خالد انني صورته علشانها وراحت
امل : ايش ؟؟
سلمى : سالفه قديمه ما عليك قاعده تدور شيء تبكي عليه
لولوه قامت : بروح انام
رهف : نوم العوافي
امل : نجحنا بربط حب فهد وزينه
رهف : اسكتوا احس بصيح
سلمى : بقى رهف ومطلق
امل : ذول ما بقى غير عرسهم بس فهودي وجوجو
سلمى تناظر الشباك اللي تعودت تشوف الجوهره توقف عنده : اسكتي بصيح
دخلت ام فهد : يلا يا بنات ناموا بكرا بنروح بيت جدكم
امل : اليله بنام عندكم
سلمى التفت ل لولوه : تكفين اذا بتحطين منبه الديك انقلعي لبيتكم
لولوه : تخسين بنام معكم وجوالي طافي اصلا
نام الجميع وبقي الحائرين مستيقظين تلك الليله التي سأسميها
" هدوء ما قبل العاصفه " ..
.
.
.
انتهى بارت اليوم نلتقي في بارت آخر ..
كالعاده توقعاتكم على حسابي انستا rhae_3838
(* تنبيه *: الروايه خياليه والاماكن التي تم ذكرها فقط لتكون مماثله للواقع لا غير )