وينك يا درب المحبه ؟. / البارت 21 مهم ..

البارت 15

عنوان البارت (خالد وينك ؟)
.
.
.
دخل راكان : السلام عليكم
ابو فهد : وعليكم السلام بشر وش صار ؟
ابتسم  : خالد بخير الحمدالله وبينقلونه الغرفه الحين
ابو خالد : الله يبشرك بالخير الحمدالله
وليد بصوت مبحوح : والجوهره ؟!
ابو فهد بصدمه : وش فيها اختك ؟
راكان بتردد : يا عمي اقعد .. بقول لكم كل شيء
ابو فهد بغضب : ماني مستريح لين تقول
التفت لعله يلقى فهد يساعده ما لقاه تنهد : ال .. الجوهره ..
ابو خالد بعدم صبر : وش فيها تكلم ؟
نزل راسه : انخطفت
وليد مسك ياقه راكان : وش تقول انت تستهبل منهو بيخطفها يعني ؟؟
نايف ابعده : وليد اسكت خلنا نلقى حل
وليد بغضب : اي حل تتكلم عنه وش جاب خالد الصاله وليه هو مضروب و الجوهره وينها ؟!
ابو خالد : اسكتو ما بنعرف شيء غير من خالد وين غرفته ؟
راكان : بالدور الثالث قبل نروح وين فهد ؟
ابو فهد : مدري وش فيه راح بدون يتكلم
نايف : خلص امشو نشوف خالد
..
سلمى : للحين ما نمتي ؟
رهف : الجوهره تخاف تقعد لحالها كيف راحت ؟
ضحكت : رهوفتي الحنونه تلقينها نايمه ولا طاقه لك خبر
رهف : سلمى اسكتي ودي اروح لها
سلمى : ما عليك الحين البنات نامو ولا ؟
رهف : مدري امشي نشوفهم
دخلت : نايمات ولا ؟
زينه : جابك الله تعالي خوذي بنت عمك
ضحكت : لولوه وش مسويه للبنت ؟
لولوه : ابيها تعطيني سرها
رهف : اي سر ؟
لولوه : كيف وافقو امها وابوها يخلوها عندنا وراحو للرياض ؟
زينه : يا بنتي قلت لك ما يبدا السمستر حقي غير بعد شهر وامي وابوي اصلا بيرجعون بعد اسبوعين
سلمى : ما عليك منها ذي النشبه وش تبين انتي للحين عمرك ١٣
لولوه بسخريه : قلت ما بلقى احد مثل ابوي ينسى كم عمري طلعتي انتي لي تراني دخلت ١٥ قبل ست شهور ما بقى لي شيء واصير ١٦
رهف : اخس متى كبرتي ؟
لولوه : يووه يا سؤال العجايز ذا اقوم انا ابرك لي
امل : انتم بتسكتون وتطفون اللمبه ولا بقوم اصفقكم ؟
سلمى حذفت المخده عليها : انتي انخمدي بس وبننام الحين يا حضره ملكه النوم
رهف : والله ملكه النوم جهير ما غيرها
زينه : في هذي صدقتي نومها ثقيل
امل : ااففف بناااام اسكتو
سلمى طفت اللمبه : يلا خلص
..
ابو خالد بنفاذ صبر : ذا متى بيقوم ؟
راكان : قال الدكتور ساعتين ويقوم بتمر اربع ساعات وما قام
ابو فهد : شوفوه هو حي ولا علامه ؟
نايف : حي الحمدالله بس حاس ان وراه شيء
راكان : عمي وش رايك ادق على فهد و تروحون انت وعمي وبعد شف وليد المسكين نام وعيونه مليانه دموع احسن له يروح البيت
ابو فهد : اي والله لازم نروح ونشوف طلال بعد المسكين خلناه لحاله بس راكان الجوهره وش بيصير لها ؟
راكان : ما عندنا خبر ولا وصلنا لشيء بس الاكيد انها مخطوفه وللحين ما ندري مين اللي خطفها
ابو خالد ربت على كتف اخوه : ما يخالف يا عبدالعزيز ربك ما بيضيعها وامش ما بقى شيء على اذان الفجر نلحق نصلي وادع ربك
رد : الو
راكان : وين رحت تعال خذ عمي و العيال
تنهد : طيب انا برا خلهم يطلعون
راكان : فهد انتبه للطريق هاه لا اوصيك
قفل .. راكان : الله يعين
ابو فهد : وين راح ؟
راكان : برا ينتظركم
نايف : انا ماني رايح بقعد معك
راكان : لا يا رجال رح معهم
ابو خالد : خله يقعد معك ويكون عون لك
راكان : ما ابي اتعبه يا عمي
ابو فهد : صحو وليد يروح معنا
راكان : قم  .. وليد .. وليدددوه
وليد : لقيتوها ؟
راكان : الله يصلحك قم رح معهم للبيت
وليد : لا .. خالد قام ؟
راكان : لا ما قام امش رح
وليد : بس ..
قاطعه ابو فهد : لا تبسبس عندي امش قدام يلا
وليد قام : ابشر
التفت : نايف ما صار شيء ما تشك بأحد ؟
نايف : والله مدري
خالد : افف انتم ما تسكتون
راكان بخوف : قمت واخيرا
خالد تنهد : اي قمت وليتني ما قمت واخيرا فكرت تخليهم يروحون
راكان : ليه وش فيه ؟
خالد التفت : وانت ليه ما ذلفت للبيت ؟
نايف : افا هذا جزاي
راكان ضحك : كيف بالله مرتاحين كذا ؟
خالد استوعب : دقيقه وين الجوهره ؟
راكان : اقعد وين رايح ؟
خالد : تستهبل انت امش نروح البيت
نايف مسكه : اقعد مافي احد بالبيت
خالد : كيف اخذوها !!!
راكان : مين شفت احد ؟
نزل راسه : ايوا شفتهم
راكان : تكلم مين وكيف ومتى ؟
تنهد : دخلت بيت عمي لان بيتنا للحين ما رتبناه وحنا ننام عنده بعد ما جلست اهوجس وكذا دقيت على طلال اسولف معه وسألته ليه ما جو الا اسمع صوت صراخ بنت رميت الجوال ودخلت البيت الا القى خمس رجال حول الجوهره الا في واحد ماسكها جن جنوني قعدت احاول فيهم واعرف مين ذول بس كان ظلام ما اشوف شيء وانا اتكلم كأن احد ضربني ومعاد شفت شيء
راكان : طيب شلون عرفت انها الجوهره ؟
نايف : من صوتها  يعني
خالد تنهد : الحين وش بنسوي ؟
راكان : ما لقينا اثر احد ومافي احد نشك في ...
قاطعه خالد : تستهبل ومفلح طيب ؟؟!!!
راكان : كيف امسكه وانا ما معي دليل حتى ؟
خالد : اجزم لك بالخمس لا بالعشر انه هو والحين خلهم يجون يفكون ذا اللي بيدي بروح اذبحه
نايف بغضب : اقعد محلك ومنت رايح مكان فاهم !
خالد بغضب : وشلون اتركه يسرح ويمرح الكلب ذا ؟
راكان : اسكتو الحين بشوف براقب مفلح ونشوف وش وراه
خالد بغضب : راكااان خلهم يشيلون عني الزفت ذا وبروح اخذ الجوهره
راكان : اقعد لا تخليني اغصبك تقعد .. دق جواله
راكان : الو
طلال : وش صار ؟
راكان : ما صار شيء بس اخوك الثور الهايج بيقوم يذبح مفلح
طلال بغضب : وشو عطيني ياه شغله عندي
خالد بهمس  : انت ما يقعد الكلام بحلقك
راكان : قوله لطلال موب لي
طلال : اقول انت وياه خلص اهدو وخويلد افا ما خبرتك كذا طايش ارجع خويلد الرزين العاقل
خالد بغضب : طلال كيف تبغاني اهدأ والجوهره ماهي بخير سألتك بالله وانت تخبرني عمرك شفتني مرتاح والجوهره ما اعرف وين اراضيها ؟
طلال تنهد : لا بالله ما شفت عيونك تغفا النوم حتى لكن يا خالد ذي المره غير لازم تهدأ وتفكر قبل تسوي شيء
نايف : اسمعو خلونا نراقب مفلح
طلال : والله ان نايفوه اعقل منك شف
خالد التفت : وانت وش رايك ؟
راكان : مثل ما قال نايف
طلال : اجل انا بروح لصلاه الفجر مع عمامي وبشوفه
نايف : تقدر تروح اصلا ؟
طلال : ما عليك جرحي يبرا دامني اشوف اخوي مرتاح
نايف ابتسم : احس ودي بأخو
خالد ضحك : عيب عليك وحنا مين نكون لك ؟
نايف بسخريه : تودوني بستين داهيه
راكان دق كتفه : افا انتم اللي تودوني بستين داهيه والله
طلال : يلا بقفل وبلحق عمي شكلهم وصلو
راكان : انتبه لا يشك مفلح .. قفل
التفت : وانت يالثور الهايج بتعقل ولا؟
خالد تنهد : بعقل خلص بس خلهم يشيلون ذا اللي علي
نايف : بروح اجيب الممرضه دقيقه
تنهد : خالد بس ذا اللي صار ؟
خالد بتوتر : هاه .. اي بس ذا
راكان : خويلد تدري اني بير اسرارك صح ؟
تنهد : ايوا يا بير اسراري وش تبي ؟
راكان : قل لي وش صار ؟
خالد : قبل ما اسمع الصراخ يوم دخلت البيت ...
راكان : ايوا كمل ؟
خالد : سمعت صوت بنت تبكي ناديت محد رد واضطريت ادخل جوا لقيت الجوهره تبكي
راكان : ايش ؟؟
خالد : لقيتها تبكي بالبدايه ما عرفتها بس يوم ركزت عرفتها سألتها ليه تبكين ما ردت و ..
راكان : و ايش ؟
خالد : وما ردت علي بعدين استوعبت اني دخلت عليها وطلعت وبعدها دقيت على طلال سألته ليه ما يجون لاني ما ابي يصير مثل ما صار مع فهد و زينه وانا اتكلم سمعت صوت الصراخ و الباقي نفس ما قلت لك
راكان : ليه ما قلت من البدايه ؟
خالد : وش تبيني اقول قدام نايف ولا ابوي ولا عمي اني دخلت على بنته وهي مو متغطيه ولا معي محرم والله ان يعلق مشنقتي ذالحين
ضحك : اخخ الله لا يجعلني احب اذا الحب كذا
خالد : نايف طول وين راح ؟
راكان : بشوفه وارجع
..
ام فهد : يا الله صباح خير ما قمتن للحين ؟
زينه : خالتي خليهم ما نامو زين امس
ابتسمت : علشانك هالمره وصحيهم على الساعه ١٠
زينه : ابشري الحين في احد ؟
ام فهد : بشوف لك الطريق
طلعت .. ام فهد : وش تسوي هنا ؟؟
بصوت مبحوح : تعبان يمه
ام فهد : بسم الله عليك قم طيب البنت بتروح
فهد بأستغراب : مين املوه البزر ههههههه ذي اقول بس ماني بقايم تطلع من زينها
ام فهد بغضب : قم اطلع برا مو توك تعبان وزينه بتطلع اخلص
فهد : ا.. ط .طيب معليش
دخلت : زينه  ... وين راحت البنت ؟
..
طلع : فهيد علامك ؟
تنهد : ادخل جوا ما تشوف رجلك اقعد لين تتعافى
طلال : مقدر ارتاح يا فهيد واخوي هذا حاله
فهد : ما الومك بس حتى خالد بيهاوشك لا شافك كذا
وليد  : وش دخل خالد و ليه الجوهره انخطفت ؟
طلال : اعوذ بالله انت من وين طلعت لنا ؟
فهد : بغى يوقف قلبي من متى وانت هنا ؟
تنهد : قبل شوي جيت بس في بالي اسئله واجد
طلال بتوتر : اي اسئله هو اختبار ؟
وليد بنضرة شك : طليل انت تعرف شيء ؟
طلال فتح زر ياقه ثوبه وتنحنح : وش بي ...
قاطع حديثهم دخول مفلح وليد قام : يا كلب وش جابك ؟
مسكه طلال : وليدوه اقعد خلني اقول لعمامي
طلع ابو فهد : علام صوتك عالي ؟
وليد بغضب : يبه تراني بذبح هالكلب
مفلح بأستغراب : وش مسوي انا ؟
فهد تفل عليه : وليد ما يعصب الا لسبب واكيد لك علاقه باللي صار صح ؟
ابو فهد بغضب : اعقب انت وياه وانا موجود تتهاوشون ادخلو واشوف قصتكم
مفلح للآن مو مستوعب قعد .. ابو خالد تنهد : علامكم ؟
طلال يناظر مفلح : والله يبه ما الومهم
مفلح : عمي واللي خلق الارض اني ما ادري وش السالفه
وليد : يا ابن ..
ابو نايف قاطعه بغضب  : وليد استح على وجهك حنا موجودين
ابو فهد : ما حنا ناقصين مشاكل وش فيه بعد ؟
وليد : يبه مفلح الكلب اكيد له علاقه بخطف الجوهره
ابو فهد بخوف : وش دخله ؟؟؟
وليد بغضب : يوم دقت رهف علي كان مفلح معي يوم ارسلتنا نجيب الحطب وسمع كل اللي صار ويدري وبعدها راح وهو يقول بيسوي شغله وكلام مبطن وانا ماني مرتاح له من راح والحين يثبت لكم وين كان ولا بذبحه
ابو فهد بغضب : وش تقول انت ؟؟
مفلح تنهد : صحيح اني راعي مشاكل بس مو لهدرجه ذي
ابو خالد بنضره حاده : للحين ما نسيت اللي سويته مع خالد رغم انه مافي دليل لكن الحين اثبت لنا انك مالك علاقه باللي صار
ابتسم : كنت مسافر اصلا وتوني جيت
ابو فهد بغضب : تستهبل شلون تسافر وتجي بليله ؟!!
مفلح بثقه : انا دكتور نفسي مثل ما تعرفون كانت عندي استشاره خارجيه وطلعت لها طيران ورجعت قبل شوي وجيت اسلم عليكم لان ابوي وصاني اروح لكم واعتذر بس شكل بيصير العكس
ابو نايف بهدوء : وين جواز سفرك ؟ واي مطار ؟
مفلح بثقه : مطار الملك خالد الدولي الرحله تورنتو
ابو نايف ابتسم : عندي صديق يشتغل بالمطار راح اكلمه واشوف اذا كلامك صحيح
طلال بهمس : تصدق عرفت نايف لمين طالع
فهد نغزه : اسكت
طلع ابو نايف .. ابو فهد : والحين بتقعد لين نتأكد
مفلح ابتسم باستفزاز : الا وين خالد ما اشوفه ؟
ابو خالد : مالك دخل فاهم ولا اقول وش بينك وبين خالد علشان تكرهه ؟؟
مفلح ابتسم : مابيننا شيء حنا اخوان بس انتم اللي تحطون المشاكل براسي
وليد بأستفزاز : توك قايل انك راعي مشاكل ؟
مفلح بسخريه : اسايركم بالكلام
دخل ابو نايف .. وليد : بشر يا عمي ؟
تنهد : صحيح اللي قاله
مفلح : يلا عاد استأذن عندي الساعه ١١ شغل
ابو فهد : مفلح محد يدري بسالفه الجوهره الحين فاهم وش اقصد ولا اتكلم بطريقه ثانيه ؟
مفلح بسخريه : امسكو ولدكم ماهو انا اللي بتكلم
ابو خالد : اطلع برا
مفلح : اعرف دربي مو لازم تعلمني
..
راكان : وين بتروح ؟
خالد : ما صدقت افتك من اللي علي بطلع
نايف : اقعد وين بتروح ما سمعت الدكتور لا تجهد نفسك
خالد تنهد : نايف تذكر ذاك اليوم
نايف : اي يوم يارجال اقعد بس
خالد : تعرف وش قال خالد ؟
ابتسم : لا يكون مضيع بيني وبين الجوهره اقعد
راكان تنهد : ما اضن بيقعد الحين
نايف : ليه صار شيء ؟
راكان : بنروح الحين للمكان اللي صار فيه خطف الجوهره بس دق طلال يقول مفلح ما كان هنا اصلا يوم انخطفت
خالد : وش تقول ؟؟
نايف : اجل مين بيخطفها ؟
راكان : توقعت ان يكذب علشان يغطي على نفسه بس اتضح انه سافر لتورنتو الساعه ٨ بالليل و انخطفت الجوهره قبل الفجر بثلاث ساعات حتى انه رجع قبل شوي ولا يدري لو ما مسكه وليد وتكلم هذا اللي قاله طلال اضن في شيء مو مفهوم بس ما ادري وش هو
تنهد وقام : امشو للمكان
نايف : وين بحالتك ذي ؟
راكان : ما نقدر نمنعه ونحتاجه بعد  (بعد ما سوو اجراءات الخروج  )
ركب السياره : الو .. ايوا .. اجله بس صار لي ظرف .. لا مقدر .. ياولد سنه تروح من عمري ولا عمري يروح .. بعدين اقول لك قفل
نايف : مين هذا و وش سنه من عمري ومدري وش ؟
خالد : كلمت خووي يأجل السنه ذي
راكان وقف السياره : اي سنه لا تقول الجامعه ؟
خالد : ايوا الجامعه ما راح اروح للجامعه ولا بدخلها الا اذا رجعت الجوهره وانا شايفها بعيني فاهم ولا منت فاهم ولا ابي اتناقش لان الموضوع انا اللي اقرره انتهى
تنهد : امري لله مقدر اسوي شيء
نايف ابتسم : بنلقى الجوهره ما عليك
خالد : بإذن الله
...
.. : ههههههههه انتي محبوبه الكل اجل صح ما يمديك تردين فكو اللي على وجهها ذا
الجوهره : مفل ... (انصدمت تحسبه مفلح )
.. : تحسبيني مفلح هههههههه
الجوهره بخوف : مين انت و وش تبي مني ؟
.. : لا بس بسوي مفاجئه لحبيبي مفلح
الجوهره : مين انت و وش تبوني فيني ؟
.. : ما يدري هو انك هنا  .. اهوووو الطيب عند ذكراه يظهر هذا هو حبيبك يدق .. الو
مفلح بغضب : لا تقول انك ورا السالفه ذي
.. : هههههههه وش رايك سبرااايززز
مفلح : يا الغبي قلت لك انا بحل الموضوع
.. : اممم فكرت اساعدك فلوحي
مفلح : افف لا تناديني بذا الاسم وليه سويت كذا ؟
.. : حبيت افاجئك وبعد حبيبتك ما سويت لها شيء بأمان هي
مفلح تنهد : طيب وين انت الحين بجيك ؟
.. : ماني عندك رجعت لمحلي
مفلح : طيب بجيك طيران الحين .. قفل ..
التفت : جهز السياره واحجز تذكره بنروح تورنتو
(معاون له ) : تونا راجعين بيشكون
مفلح بغضب ضرب الطاوله : ما يهمني جهز السياره بنروح الحين
(المعاون ) : حاضر
...
راكان : وصلنا
خالد : ياااوك يالبرد
نايف : شف ماني مستعد اتحملك تعبان زياده قووي مناعتك
راكان : مدري كيف عشتم مع بعض بجيب جاكيت عندي بالسياره دقيقه
التفت : شف بالله كيف الاخ الحقيقي
نايف ضحك : ترا اروح واعلمهم وش يقول خالد
خالد : هه وش شدعوه ما بتسويها
راكان : افف بس اقول خذ البس وامشو ندخل
دخلو .. نايف : علام البيت مقرطس
راكان : مقرطس ؟!
نايف : يعني كأنه ملفوف بأكياس والكيس نقول له قرطاس
خالد : ياربي انتم ماهي بحصه تفكير ناقد امشو
نايف : يا قدمي يالتفكير الناقد اخس ماده عندي
راكان : ماهو وقت ذكريات انت وياه امشو ندور اي شيء
خالد : ليه في قزاز بكل مكان ؟
راكان : من الشباك مكسر
خالد بصدمه : تستهبل ما كان مكسور اصلا
راكان : ايش ؟؟
خالد : متأكد انا ما كان في قزاز مكسر دقيقه حتى الكنب متغير مكانه في اشياء غلط
راكان : حنا استنتجنا من هذا انه صار بينكم هواش ولا الضحيه اللي هي الجوهره كانت تقاومهم وبعد القزاز كنا نحسب انهم دخلو من الشباك لانه مكسور !
خالد : مستحيل الجوهره ما قدرت تسوي شيء الكلب كان ماسكها مع رقبتها وهم كانو كبار مره مجسمين و ...
نايف : و ايش؟
خالد استوعب : كان عليهم وشوم و كلامهم مو مثل لهجتنا احس انه قريب للفصحى وكذا حتى كان معهم واحد بس اللي يتكلم الباقي ما قالو شيء
راكان : اضن اني فهمت الحين
نايف : يعني انه واحد ثاني اللي بيخطفها ؟؟؟
راكان : امشو للمركز نسجل محظر وافهمكم اللي فهمته بالطريق
..
زينه: ااففف قومو
امل : خمس دقايق بس
زينه : قومي رهف و سلمى ولولوه كلهم قامو ما غيرك انتي
امل : تدرين تزوجي فهد خلص لايقين على بعض كلكم مزعجين
زينه : وش دخل فهد ؟!
امل طلعت راسه من البطانيه : يوم كنا صغار كان دايم يجينا انا ولولوه ورهف وسلمى يكون ضدنا ويحذف حجر علينا هو والجوهره وخويلد وطلال و وليد ومف .. لا ذا كلب ما يستاهل
زينه  : عندكم ذكريات كثير ماشاء الله
امل : بتكون حلوه لو انحذف هالاخير
زينه بأستغراب : مين الاخير ؟
امل تنهدت : ما ابي اجيب طاريه يقرف انسدت نفسي ما ابي انام بقوم خلص
زينه ضحكت : هو في شهيه للنوم ؟
امل حركت شعرها بثقه : في قاموسي يوجد
زينه ضحكت : اخخ بطني تكفييييين
امل : قومي بس لا تموتين علي ولا فهيد وين بيلقى له عروس
زينه بصدمه : ا ... ايش تهبدين انتي؟
امل ابتسمت : يا قلبي هذا شغلنا انا ولولوه وسيطات حب نعرف حبكم قبل الناس و نجمعكم اذا الله اراد
زينه : بقوم اروح احسن لي
..
فهد : قم
وليد : احس اني بموت
طلال : وليد قم بس توام الجوهره على الفاضي قم رح ساعد عمي ما تشوفه صابر ومتحمل وهو شوي وينهار وربي اني اشوف الدمع بعينه لكنه يقول انه بخير وطول وقته ينتبه للجوال ويهوجس ولا جدي للحين ما قلنا له لو جاء وش بنقول له كنا جالسين ونبكي ؟ هذا اللي ينتظره مننا ولا بيقول اخبر عيالي ما هم بحريم يعرفون يحلونها ؟
فهد ابتسم وربت على كتفه : لا انا اشهد اننا مثل خبر جدي
وليد قام ومسح دموعه : وينه ابوي ؟
فهد ابتسم : بالمجلس هو وعمامي
راح وليد .. التفت : طلال وش بتصير لا تخرجت ؟
طلال : ههه مدري والله
فهد : احس لو تصير دكتور جامعه يزبط عليك
طلال : يصير خير ان شاء الله بس امش نروح
..
نايف : الحين راسي صدع وشلون بنعرفه ؟
راكان : طلع مسوين البيت مسرحيه وحنا ما ندري هه الكلاب
خالد ضرب الطاوله : حتى لو ما كان يدري مفلح بيكون اول مشتبه فيه لازم نراقبه
راكان : اكيد بس ..
خالد : بس وش ؟
راكان تنهد : ما نقدر بالوقت الحالي
خالد بغضب : وليه ان شاء الله ؟
راكان : مفلح جاء للمركز بنفسه وقال لزميل لي انه في ناس تتهمه وسوا نفسه بريئ وما كان بيد زميلي غير انه يصدقه والحين اذا عرف مفلح اننا نراقبه بيسوي مشكله مالها اول من تالي
نايف : اخخ بس يالخسيس
تنهد : الا نايف ليه جاي معنا ؟
نايف : ماني مخليكم لحالكم
خالد : بس وراك مدرسه
نايف : وش اسوي طيب ؟؟
راكان : وهو صادق بخليهم يودونك البيت
نايف بغضب : هييه تستهبلون ماني رايح
خالد مسك كتفه : نايف توها اول سنه لك بالثانوي لازم تنجز وراك تحصيلي و وقدرات واشغال واجد
تنهد : طيب بس اول من يدري بالتطورات انا
ابتسم راكان : طيب ابشر وهذا وعد مني لك وقدام خالد الحين امش معي .. دق جوال خالد
خالد : راكان دقيقه
راكان : وش ؟
خالد بشك : رقم غريب يدق علي
نايف : رد بسرعه يمكن الجوهره
رد : الو
المتصل : رقم ابو منصور ذا ؟
تنهد : لا غلطان
المتصل : اعتذر .. قفل
نايف : مين ؟
خالد : افف غلطان
راكان : يلا امش نايفووه .. طلعو
خالد بتفكير  : بس كأني اعرف الصوت ؟
..
.. : اووه فلوحي جيت
مفلح حضنه : هههه ما لقيت غير ذي الطريقه تجيبني فيها
.. : وش اسوي سنتين يالظالم ما شفتك وبعدين حسبتك ما بتجي ما كنت اعرفك تحبها هالقد
مفلح تنهد : اقول بس وين الجوهره ؟
.. : شف ما سويت لها شيء بس حاولت اخليها تاكل ما رضت رح كلمها
مفلح : وينها ؟
.. : بالمكتب  " .. مفلح دخل المكتب ..
الجوهره : ابعد عني ما ابي ش ....
مفلح ابتسم : من زمان عنك متى شفتك اممم خليني اتذكر اووه قبل سنين كثيرة
الجوهره بغضب : وش تبي مني ؟؟
مفلح : هههههههه مثل حبيب قلبك عصبيه بس خالد مو موجود هنا ولا احد تعرفينه موجود مافي غيري انا
الجوهره : خالد ماله علاقه ولا تقرب منه ولا من اي واحد من اهلي فاهم
مفلح : لا لا غلط جوجو مو انتي تقررين الحين انا اللي اقرر
.. قرب منها .. بس يوم بقرر ما بخليك تنسين قراري طووول عمرك
الجوهره : ابعد عني
مفلح قام : انتهبو لها
.. "صفق" : اوهو فلوحي رجع نفس قبل واخيرا
مفلح بسخريه : وانت ما تسكت قلت لك لا تناديني بالاسم ذا
.. : ما تقدر تمسك لساني
مفلح التفت : خليك عاقله علشان نفسك ونفس اللي تحبين لان بمكالمه وحده افنيتهم
الجوهره : منت اقوى من ربي
مفلح : اففف امش بس نتمشى بشوارع تورنتو بتنفس احس اني اختنقت هنا
.. : مشينا فلوحي
مفلح : ياليل رجعنا لنفس المشكله
..
راكان : هيه الو وين وصلت عساك لقيت الجوهره
خالد : اففف اسكت ياخي لا تقطع حبل افكاري
راكان : تذكرت شيء ؟
تنهد : لا بس صوت الرجال احس اني قد سمعته بمكان وين مدري
راكان : صوت مفلح ؟
خالد : لا كأنه يعني
راكان بنفاذ صبر : ياربي صدعت يشبهه مين ؟
خالد تذكر : ايوووواا صوت الرجال هذاك
راكان : اي رجال ؟
خالد : اللي كان هو يتكلم يوم جيت الجوهره
راكان ضرب الطاوله بحماس : لقينا خيط
خالد : اي خيط ؟
راكان : عطني جوالك اشوف الرقم .. عطاه .. يا غبي ليه ما قلت انه اتصال دولي
خالد : كيف ؟
راكان ضرب راسه : شف خارج السعوديه غبي انت
خالد : شدراني ما انتبهت
راكان : امش نحدد الموقع
..
.. : بالله كيف بس المفاجئه ؟
مفلح : جعلني ما انحرم من مفاجأتك بس لازم ننتبه ذا الزفت خالد ترا ماهو بسيط
.. : هه هه هه ضحكتني ياربي مره خفت منه بالله وش بيسوي
مفلح : لازم ننتقل لمكان ثاني
.. : وين يا فلوحي تبينا نطير ؟
مفلح : يع الله يقلعك لا تناديني كذا وبعدين خلنا نروح البيت المطلّ على بحيرة ليمان
.. : هههههه ايام زمان بنعيدها
مفلح : الا وش سويت بعد ما جبتها ؟
.. : خليت اللي جابها يدق على ذا اللي متهاوش معه ويسوي نفسه غلطان وبنشوف اذا بيطيحون في الحفره ولا
مفلح : مثل ما خبرتك نذل
.. : وانت للحين حقير
مفلح : كأنك زودتها شوي هاه ؟
.. : ههههه نمزح ليه انت ثقيل دم  ؟
مفلح : يمكن منك
.. : اسكت بس ما تلقى اخف دم بالحياة مني
مفلح : للحين لغتك مكسرة وش اخف دم بالحياة مني ذي ؟
.. : ما يهم على اساس بتكلم عربي كثير كل حياتي اما انجليزي او ايطالي او بريطاني وغيره
مفلح : اقول اسكت بس خلني استمتع بالهدوء
..
راكان : هاه حددت الموقع ؟
ظاهر : ايوا بس ..
خالد : بس وش ؟
ظاهر :الموقع خارج السعوديه
راكان ضربه على راسه : ادري يا دلخ
ظاهر : ادري انك تدري بس المكان ما تقدر تروح له
راكان : ليه ؟
ظاهر : اللي انت وياه متمشكلين معه ذا مفلح هناك
خالد : طيب ؟
ظاهر : اذا درا انكم هناك بيشك فيكم ويبلغ انكم تلحقونه
راكان : والحل ؟
ظاهر : لا تروحون انتم
خالد : شف انا ماسك نفسي من قمت بالمستشفى وانت عرفت السالفه وكل شيء كيف ما تبيني اروح وانا اعرف مكانها
ظاهر : انت ما تعرف مكانها للحين مو متأكدين وبعدين لو سوا لكم فخ ؟
خالد : بس ..
راكان قاطعه : وهو صادق لازم يروح احد غيرنا
خالد : مين طيب ؟؟
راكان : هذا
خالد : هذا مين ؟
ظاهر : راكنوووه
راكان : يلا عاد محد يقدر يروح غيرك وما بنوثق بأحد غيرك
(تعريف بسيط عن ظاهر : صديق راكان من ايام التدريب وصديق طفولته  )
ظاهر : امر لله وش اسوي طيب بروح
دق جوال خالد ..
راكان : شفيك رد ؟
خالد بصدمه : رقم غريب واتصال دولي
راكان : ايش حط سبكر اخلص
رد : الو ..
(لا يوجد رد من الطرف الثاني )
خالد : الو مين معي ؟
الجوهره : خالد
خالد بصدمه : ال .. الجوهره !!
الجوهره : خالد وينك ؟ ...
.
.
.
.
.
انتهى بارت اليوم ...
(توقعاتكم كالعاده بالانستا rhae_3838 )
( * تنبيه *: الروايه خياليه والاماكن التي تم ذكرها فقط لتكون مماثله للواقع لا غير )