Love Me Like You Do || Complete || ✅

අන්තිම හාද්ද?

"මැණික ඔයාට බය හිතෙන මොකක්ම හරි දෙයක් උනොත් චුට්ටක්වත් හිත හිත ඉන්නැතුව ගෙදරට යනකල් දුවන්න රත්තරන්.. කාවවත් විස්වාස කරන්න එපා.. මඟදි හම්බෙන කාවවත්..."

හ්‍යොං මාව බයික් එකෙන් බස්සන ගමන් කනට ලං වෙවී රහසින් රහසින් මිමිණුවා.. අනේ ඒත් ඔයාව දාලා මං කොහෙ යන්නද වස්තුවේ.. එහෙම ඔයාව දාලා යන්න තරම් මං හිත හයිය කරගන්නෙවත් කොහොමද??

"බෑ.. මට බෑ.. මැරෙනවනං මෙහෙමම මැරෙමු."

"අපි මැරෙමු.. ඒත් තව චුට්ටක් කල් අල්ලන් ඉදලා ම්.."

ජැකට් එක පිටිපස්සෙ හැංගිච්ච හෑන්ඩ් ගන් එකක් ඇඟිලි තුඩුවලින් මිරික මිරික එයා හීනියට මගෙ නළල ඉම්බා..

උරහිසක් කෙලවරකට නළලක් මැද්දකට ආදරේ උතුරන මනුස්සයෙක්ගෙ තොල් තදවෙනවා කියන්නෙම පපුව හිරිවට්ටන මහ අමුතු හැඟීමක්.. ඉතිං මෙහෙම වෙලාවක පවා මගෙ සර්වාංගෙම හිරිවැටිලා ගිහින් ඇස් අග්ගිස්සෙ කඳුළු බෝල ඉතිරුවා...

"මං කිව්ව ගමන් දුවන්න මැණික.. බය වෙන්න එපා.. මුං අපිව මරන්නනං ආවෙ මේ වෙද්දි මරලා... මං පොරොන්දු වෙනවා හීරීමක්වත් නැතුව ආපහු එනවා.. මං පොරොන්දු වෙනවා..."

මාව එයාගෙ පිටිපස්සට කරලා හංග ගන්න ගමන් එයා හරි නපුරුකමට රවාගෙනම අර බයික්කාරයො දිහාවට හැරුණා..

"ඇයි..? තමුසෙලට මොනවද ඕනෙ??"

එයාගෙ ගැඹුරු කටහඩ හුලඟක සද්දයක්වත් නැති පාළු පරිසරේ විනිවිදගෙන ගියා.. මාස්ක්වලින් මූණු වහගෙන හිටපු බයික්කාරයො දෙන්න පවා ඒ සද්දෙට ගැස්සෙද්දි මං තවත් හ්‍යොංගෙ පිටිපස්සට තුරුල් වෙලා එයාගෙ ජැකට් එකේ කෙලවරක් හරි තදට ඇඟිලි අස්සට හිර කරගත්තා..

"තමුසෙලට ප්‍රශ්නෙ තියෙන්නෙ මගෙත්තෙක්කනෙ. මෙයාට යන්න දෙනවා.."

මගෙ වෙව්ලන සීතල ඇඟිලි තුඩු එයාගෙ උණුසුම් අත් අස්සට හිර කරගත්තු හ්‍යොං බයක් ගෑවිලාවත් නැති සැර කටහඬකින් මහ සද්දෙට ගෝරනාඩු කරා.. කෙනෙක් එක්ක මනුස්සකමට කතාකරලා පුරුදු මනුස්සයෙක් නෙවෙයිනෙ කොහොමටත්..
එයාගෙ හිත ගැස්සෙන එකම හේතුව මං විතරක්ම වෙනකොට එයා ජීවිතේම උන්ට දීගෙන මැණිකක් ගානට මාව රැක්කා..