دهاء ظبية وجسارة غيال

الفصل الخامس

رواية دهاء ظبية وجسارة غيال

الكاتبة Jawhara

***************

*ض الأشواك التي قد تدوسها في يومٍ من الأيام، رُبما يكون بلاء من ربك فلا تيأس فكلما أحب اللهُ عبداً ابتلاه

***************
بيت ام علا ..

سمراء نزلت وهي تعدل لفة الشال حجت وية خالتها كاعدة بالمطبخ مفترشة الأرضية وكدامها صينية وعجينه بورك ( سمبوسة) تحشي بيها
_ خالة محتاجه اقلام الوان خاصة والموجودات عندي ميرهم مراح اتاخر
_ عندج فلوس لو انطيج ؟!
_ عندي
_ لاتروحين بوحدج شوفي داليا وينها منيرة دا تروح وياج
_ ميرة بالحمام وداليا تقرا للامتحان ، خالة مراح اتاخر
_ يعمري اني اخاف عليج لأن بوحدج
_ مرايحه بعيد اشوف المكتبة الي براس الفرع
طلعت وسديت باب الحوش رفعت راسي للسما وانا اتنهد اليوم الجو بارد والغيوم الرمادية شكلها يسويلي كتمة ، وصلت للمكتبة سألته عن الألوان المحتاجتهم طلعلي مجموعه وبديت اختار منهم دك موبايلي هاي ميرة شتريد
_ هلو ميرة
_ حبي نسيت اوصيج محتاجه اوراق كانفس
_ تردين رول لو كراس ورق ( كانفس ورق وقماش  رسم نوعية خاصة )
_ اريد الكراسة
_ مممم اكولج ترى سعرها بحدود العشرة آلاف
والي عندي يادوب يكفون لحاجاتي
_ شنو مدا اسمعج يولي
كزت سمراء سنونها وهي تحجي بصوت ناصي تستحي من صاحب المكتبة يسمعها طلعت برا وعينها عالسيارات بالشارع تاخذ راحتها بالكلام
_ ولج فلوسي متكفي طرش اي والله
_ اها وانتي شعندج مشترية كومة غراض
_ بلة شاحجي وياج هو غير محتاجه ادوات رسم
_ قبل اسبوعين اشترينا بسرعه قضيتي عليهن
_  ماخلصتهن بس محتاجه بعد شغلات وحبيت اشتريهم يلة حسد الخط
سديته وردت ادخل للمكتبة فززني صوته من سألني ..
_ شعندج هينة !!؟؟؟
ضغطت شفايفي وانا ادردم بداخلي عاليوم الي مبين كئيب  وراح ينختم بشوفة اشجع مضت اسبوعين على الموقف  الصار من راد يضربني ، حسيت ضغطي صفر وأيدي ترجف
بلعت ريك وبدون ما ارفع عيني رديت عليه ..
_ اشتري ادوات رسم
تقرب وهيمن علية بطوله أني يادوب راسي يوصل لصدره
_ عجل واكفه بالشارع بوحدج وموبايلج بيدج تتحجين !!!
_ ميرة اتصلت علية
ضجت لأن بررت وكفتي هنا مجنت اريد اوضحله ،، شي بداخلي يحثني اعانده
رجعت أخذ الغراض وادفع ثمنها وسألته على طلب ميرة نطانياه والفلوس مكفت
_ عمو باجر من اطلع للدوام اجيبلك باقي الفلوس ( متعودين نشتري من مكتبته ويعرفنا)
قبل ميحجي الرجال اسمع صوته هتف بخشونه ..
_ شكد المبلغ ؟!
اعترضت وانا اخذ الغراض بيدي دا اطلع
_ ميحتاج لأن دفعت المبلغ
بدون مايلتفت علية انطى فلوس الغراض بعدما انطا ابو المكتبة السعر ورجع فلوسي
طلعت ماحبيت ابقى ولا أخذهم من مد أيده بيهم
مشيت بخطوات سريعه ماريد احتك بي صراحه لأن أسلوبه أحسه خشن وماعنده لطافه يمكن اني هيج احساسي والا بنات اخوه يحبونه وتعامله وياهن حلو  ، كورت شفايفي معاجبني تفكيري بي 
جفلت من  طبكت سيارة قريب علية رمشت بسرعه ورهبة واضحه علية فكيت عيوني واني اسمعه ينتر بية بأمر ..
_ اصعدددي !!!
والله ولا اسمعله ولا يمي السالفة مشيت بسرعه وانا اسمع صوت الرعد بالسما لحظات وبدت تمطر  وصلت بسرعه للبيت بدون ما التفت اول ما وصلت باب المطبخ سمعت صوت خطواته ورايه
_ اوكفي يبنت !!!
دخلت جوا واسمع صوته يصيح عالبنات يريد يدخل للبيت فيسمعهم صوته
بسرعه صعدت الغرفه حتى مارديت على خالة ماجدة من صاحتني
دخلت الغرفه ذبيت الغراض عالميز بغرفتنا ونزعت عباتي والشال علكتهم عالباب لأن بللهم المطر
انتبهت على ميرة تسالني وهية تتفحص الغراض ..
_ عفية حبي اشتريتي الكراسة
كعدت على سريري وبيدي موبايلي ماريد احجي شي خل التهي وية روحي
_ شبيج يولي ؟!!!
_ مابية !
_ حانزل اسوي بيتزا اجت على بالي تعاي ساعديني
_ ولي مالي مزاج
ماحسيت الا انضرب راسي بمخدة
_ يووو منيررررة !!!
_ امداج صايرة عصبية اعرفج خبيثة من تعصبين  تصيحيني منيرة ، خل اضوجج عجل
هههههه
شمرتها بعلبة الاصباغ طاحت بجتفها كمزت تريد تضربها ركضت طالعه من الغرفه ونزلت الدرج تضحك وسمراء تصيح عليها
_ حقيرررة اني اعلمج
بنص الدرج تذكرت عمهم يمكن موجود بعده بلعت كلامي ورجعت طايرة للغرفة