دهاء ظبية وجسارة غيال

الفصل التاسع

رواية دهاء ظبية وجسارة غيال

الكاتبة Jawhara
*******************
* هل تفهم كيف يكون هذا الشعور . .
لست بحزين . . .
فقط تشعر بالعتمة في صدرك هل تفهم كيف يكون المرء منطفئاً . .

*******************

بين ظبية وغيال ..

ايدية تضرب على ذراعه وجتفه جان نازع سترته باقي بالقميص سحبت ياخة قميصه تليتها بيدي ، فقدت بسبب جسارته هذا شلون يروح بنص عمامي ، فضحني الحقير هسة بابا ميت خجل بسبب الصار
وكف سيارته والتفت علية عيونه تشع غضب جرحته بصدره والله حسيت جلده انخمش باظافيري
صاح بية بغضب وأيديه تحاوط ذراعي ..
_ خباااال ، يولي لا تخليني امرعج مرع

كزيت سنوني بقوة واحاول ادفعه رفع أيده وكفخني على راسي ودفعني عنه الحقير آذاني حسيته طير اذني بضربته ، ما عفته رجعت اضربه لوى ايدي وزمخ بية ..
_ بسسسس تخبلتي شنهووو !!!!
_ اكرررهك الله ينتقم منك
_ اشششش ما اسمعلج حس خل نصل لبغداد وانا اعلمج
كض فكي بيده وقرب رأسه بتحذير ..
_ على بالي چثير شغلات لا تخليني ابدي بأول شغلة
نفسي يصعد وينزل واني اشوف نظراته القذرة على شفايفي وفتحة صدر نفنوفي
نزعت أيده من فكي بقوة واني أتحسس وجهي بيدية
_ على أساس تبيع رجولة كدام عمامي والله اخليك تندم يا غيال
حك خده وشغل سيارته وهو خزرني ..
_ تا نشوف يظبية

،،،
بالبيت وصلنا قريب الفجر التفتت برعب لأن ما أخذني لبيت بابا يعني جابني لبيته وراح يعيد نفس أسلوبه وياية حتى يحطم نفسيتي أكثر
ماقبلت انزل بعدما دخل سيارته كراج البيت نزل قفل باب الحوش واني استغليت الوقت بسرعه ادور على جنطتي وموبايلي ما لكيتها تأثرت كولش جان على بالي اتصل باخوية لو بابا
نزلني بسرعه وأيدي تدفع بي لأن مقربني لجسمه يسحب بية وذراعه محاوطتني فتح الباب ودخلنا عافني وراح قفل باب المطبخ وخلى مفاتيحه بجيب بنطرونه
قشعريرة سرت على طول عمودي الفقري رفعت ايدي سحبت خصلة شعري ارتبها واني افكر شسوي
عافني ودخل جوا لحكته جان صاعد اول درجتين ..
_ رجعني لاهلي
التفت ورجع نزل مسح خدي ودفعت راسي مبعدته عن ملمس أيده ..
_ ماكو رجعه إلا بعدما تسوين الاريده منج

رفعت حاجبي ..
_ شتريد مني !!!
_ باجر نحلل دم ونعقد محكمة غير هذا مالج كلام وياي
_ انت شنو شايف روحك تتعامل وياية كأنما جارية عندك اصحى لنفسك !!
دغ كصتي باصبعه ..
_ صاحي ولج ولسانج هذا خل يبطل ينكط سم لا اخرسه الج
_ شي مؤسف رجال طول ضخامه بس عقل ماكو والا شلون هيج تسوي من مصيبة تأخذني غصب وبالاكراه وهسة تريد تعقد محكمة منو كال اني اقبل
كور شفايفه وبتحذير ..
_ جربي تعاندين ورب العزة اخليج تعضين اصابعج ندم
طلع فوك وعافني ميته قهر
سمعت صوت الاذان الله اكبر ، خل اصلي وادعي ربي العالمين يخلصني منه
صعدت فوك ادور عالعلاكه الجابها آلية قبل كم يوم
لكيتها بالغرفه مشمورة ورى الكرسي فتحتها دا شوف الباقي من الجابه ، مديت بوزي واني اشوف ثوب نوم سخيف شمرتها هي والثوب وطلعت للحمام اتوضى ، خل ابقى بملابسي رغم مجعدات صار ثلاث ايام لابستهم ةحتى كرهت روحي توضيت وسرحت شعري وطلعت تذكرت ماعندي حجاب صلاه واصلا اني مامحجبه عضيت شفتي لأن ماكو شي احطه على راسي
استغفر الله يعني شلون مراح اصلي التفتت من دخل مدري وين جان بدون مايهتم لوجودي نزع ملابسه وراح نام
اجيت اساله اريد شي اغطي شعري واصلي بس كبريائي منعني انتظرته ينخمد دا ادور براحتي ، كعدت عالكرسي حظنت جسمي البرد مايرحم ربع ساعه كاعدة اتسمع واخيرا نام وكفت بسرعه ورحت فتحت الكنتور لكيت شماغ احمر سحبته وغمضت عيوني من لفيته على راسي وانفاسي سحبته لعطره ، عطر طيب باقي بي بس غثني من شميته