دهاء ظبية وجسارة غيال

الفصل السابع عشر

رواية دهاء ظبية وجسارة غيال
الفصل السابع عشر

الكاتبة Jawhara
****************
* اشتاقك كثيرا ولم أستطع أن اخبرك . .
اخرسني الكبرياء يا سيدتي . .

***************

رافل ..
طلعت من بيت عمي حسنين كاصد بيت غيال اتصلت عليه كال توني وصلت البيت وانتظرك
، من وكت الي حجت ظبية وانا عقلي ضرب وين الي يخليني اكض غيال وافرسه  دك موبايلي هاي رودينة تسال وين رحت طمنتها عندي شغلة اكملها وارجع

وصلت لبيت غيال نزلت بسرعة فتحت باب الحوش ودخلت جوا وانا أصيح غيااال بصوت مليان غضب
صرت بنص الصاله جان ينزل من فوك بسرعة لابس تراك وبعدها البلوزة بيدة لبسها بسرعه ونزل
_ يول شبيك متصركع صوتك عالي خير

كضيته من صدر البلوزة بسرعة كض ايديه ونتر ..

_ رااافل تخبلت !!!

_ شنهو سويت لظبية ؟!!! احججججي  ، انت معتدي عليها ؟!!!
من ابتسم تك خد حسيت نار صعدت براسي عطت بي يحجي لا يسكت دفعني بس ما ابتعدت عيني بعينه الي خزرني بيها ما عجبه تصرفي وياه
_ رافل لا تتدخل
_ ولك شنهو ما أتدخل بنت عمي هاي توها تكلي اخوك اعتدى علية

_ عجل هي راس البلا اجت تشكيلك شلون صلفة ، بعدين بأي حق تحجيلك أنا رجالها والي بيناتنا محد يتدخل بي حتى لو جنت اخوي

_ تستهزأ بية من كلتلها غيال حدد الخميس عرسكم  واخوي ما يضم عني سالفة كالت عندك علم انو اعتدى علية  رزلتها واجيت اتاكد
_ تراها مرتي عاقد عليها مالك حق تجي تهوبز على راسي

بعصبية وانا اتاكدت من كلام ظبية ضربته كلة براسة ودفعته ، رجع خطوات ورى وأيده تتلمس كصته ، هجم علية تدافعنا أنا وياه وكعته بالكاع وضربته بوكس على صدره دفرني برجله على فخذي زمخت بي وأنا فقدت اعصابي خلاص ..
_ شلون تاذيها وانت تدري بيها بنت عمي ولك ما اجيت على بالك يا كلب
زمخ بية وهو يتنفس بقوة وأيده على كصته الظاهر تاذى ضربتي دوخته كعد عالقنفه وجهه احمر وشعره مخربط
وكفت قريب عليه متخوصر وومطكك عيوني عليه

،غيال ايدو على كصته
آذاني بضربو شكثر ايدو ثكيلة تنفست بقوة  أنا أحس بدوخه خفيفة رفعت راسي ورديت عليه ..

_ ما كلب الا عمك وابنو قسم بالله لوما تراجعت باخر لحظه والا جنت مفرغ مسدسي براس صفي

رافل مسح وجهه وكعد على اقرب كرسي وهو يحاول يعرف سبب تصرف اخوه صح ما قابل عالصار بس اكيد اكو سبب خلاه هيج يتصرف
يعرف اخوه إذا انداس على طرفه ينتقم بقسوة ، جر حسرة وذبها وهو يعاين اخوه  رغم اجى يتعارك وياه بسبب ظبية بس بداخله ميكدر ياذي  ما عنده من ريحة أمه بس غيال وهذا الي مربط ايديه  إذا سالفة تخص اخوه

_ غيال احجيلي الصدك لا تخش عني شي وتخليني اكتشفه بعدين

_ كوم جيبلي ثلج تا احطو عالكدمه للصبح كصتي تعنجر  ، وجع تكول راس ثور مو بشر
سويتلي ارتجاج بالدماغ