دهاء ظبية وجسارة غيال

الفصل واحد وثلاثون

رواية دهاء ظبية وجسارة غيال

الفصل واحد وثلاثون
الكاتبة Jawhara

*********************
إنّ الفوضى واليأس والتدمير الذي لا معنى له . . .
والذي نراه اليوم . .
هو نتيجةٌ للاغتراب  . .
الذي يشعر به الناس من بعضهم البعض . . . ولذلك يجب أن نشفي جروحنا منها.

*********************

سمراء ..
فزيت اول ما صاح بية يربي شلون موقف  ما اكدر ابرر وادبر عذر كولشي طار من عقلي ، وكع الموبايل من ايدي وبقى معلك بطرف الشاحن ، تقرب اشجع بخطوات سريعه سحبه وبقى يباوع بي ، اني وجهي يمكن لونه صار اصفر  ،بلعت ريك من لف الموبايل وخلا كدام عيني وبصوت قوي..
_ يا اسم من هاي الاسماء تردينو ؟!!

بقيت خانسة اريد اتذكر عذر اطلع بي كدامه ، رجع نتر بية هالمرة لأن ما رديت عليه
_ احجججي شلج دخل تفتشين موبايلي وداخله على سجل الارقام ؟!!

_  هيج ماكو شي

رفع حاجبو ممصدك بردها ولا طريقتها بالاقناع ..
_ ويوم الماكو شي ليش وجهج اصفر صار وارتبكتي ؟!!!

_ انت تخوف

فكيت عيني من سمعتها معقولة تخاف مني احتمال وارد  بس بعدني ما مقتنع ليش موبايلي بيدها خل اغض نظر الحين والايام تثبت
طلعت وموبايلي بيدي وكلتلها تجي تكعد يم عمتي ام حسام اجت وكاعدة بالمطبخ هي وسما

سمراء ..
جريت نفس قوي من طلع واني احجي على ميرة لأن ورطتني الا شوية اووف يخوف والله  ونظراته مركزها علية يريد يعرف كولشي
طلعت وراه واني اعدل بلفه الشال سلمت على عمتهم هي زوجة عمهم يحبونها ويحترمونها مثلما دا الاحظ طريقته شلون يتعامل وياها

كاعد عالكرسي ويكلب بموبايلة وسما راحت عليه وكفت وايدها على كتفه تباوع وياه بالموبايل
التفتت على ام حسام من كعدت بصفها سالتني ..

_ ليش تلبسين شال بالبيت تخافين على شعرج من الحسد !؟؟

بقيت لحظات محتارة شنو ارد عليها ادري هو هذا سؤال تسالينه وانوب بحضور اشجع الي اكيد أذنه يمنه ويسمع

_ اني حزينة على بابا الله يرحمه واكيد البس

_ بنيتي الله يرحمه برحمته بس انتي متزوجة وزلمتج من حقو يشوفج بالبيت مهتمة بروحج انتي حزينة وحقج هذا وأبو سما همين الو حق بيج اقلها يشوف شعرج  وانتي طول الوكت ملفلفة راسج

،،،
شنو هالتدخل هذا تريد تعلمني ،  اني اعرف كولشي مو غبية بس زواجنا مفروض علية ودا اتماشى وياه بالاكدر عليه والله يا الله بس ناقصني هاي وتعالي يا سمراء جاملي واحجي بلطف وياها  ، يلة شسوي هي مرة جبيرة وعيب علية أقل ادبي وما احترمها
رديت عليها بهدوء وأدب واني اعرف اشجع اذانه يمنا مسوي روحه يحجي وية بنته ..