بقايا شغف

لقاء

زهراء :

دخلت لغرفة زياد ..كلش تخنك ظلام وريحة جكاير والبردات ما يرضى تنفتح وهو متمدد على وجهه هاي من يوم طلع من المستشفى هو بهالحال يجيه ضرغام ويبقى يمه ساعة ساعتين ويروح شكد يحاولون يخلوه يطلع ما يقبل جاب صاحبهم اللاخ ونفس الوضع واجازته المرضية اللي جددوها مرتين قربت تنتهي واحنا خايفين يستمر بهالوضع ..اشهر مرت مو فترة قليلة

حجيت وياه مخنوكة على قهره
-زياد
التفت شافني كعد لحيله
-تعالي زهورة
-مو كافي الله يخليك كوم امي مريضة وبنات عارف مكسورات واحنا ضايعات لا تخلينا هيج
كلت كلماتي وبجيت ما تحملت اكمل

نهض من الفراش ووصل يمي وغبطني بحضنه وكام يشهك ويبجي ويايه
-ما مصدك بيتنا هذا لا ابوي ولا عارف ولا هاله راح اموت مدا اتحمل لو الله ماخذني ومخليهم
-كافي الله يخليك فكر بينا منو النا
-مو بيدي
-انت تكول هيج احنا شنو اللي نفكر بي لعد من نشوفك انت بهالحال والله كلنا عايشين وجعنا بس كلمن وواكف يسند الثاني لا نوكع وانت البقيت سند النا بعد رب العباد

عدل ضهره ومسح وجهه وسكت واكتفى بالسكوت اني تقربت حشكت نفسي بحضنه ادور بي على ابويه واخويه ااجبير

بهالاثناء سمعنا عبير وياها ضرغام ابتعدت عنه ومسحت دمعي وهو دخل بهالاثناء ...سلمت بساع عليه اريد انهزم من المكان..زياد صاح عليه وكفني
-زهورة اريد كاكاو حليب طبعا زياد ناسي كل شي ومنثطع عن كل عادة كان يحبها لو يسويها
انداريت اله بوجهي ابتسامة امل

-عيوني من عيوني
راحت عيني صوب ضرغام مبتسمة واخيرا شفنا استجابةمنه وهو بدوره مبتسم

ركضت سويت الهم حليب بالكاكاو اني هالمشروب يطلع من ايدي فد شي خرافي عندي اضافات خاصة منها هيل واخلي شويه كهوة شي مو ظاهر ما يطغي على طعمه ازيد الكاكاو واثخنه اكثر بخاشوكة صغيرة نشا واضيف اخر شي مكسرات
كملته واستحيت اخذه بنفسي صحت لبنت عارف توديلهم ...

جريت ملزمتي وكوبي وطلعت للحديقة اقرا ...واخذني وقتي والتهيت بره تعرفون الواحد من يقرا تهيج عنده الندارة ويلكي شغل من جوة الكاع واني مدنكة واشلع دغل من الحديقة جفلت بصوته ورايه

-شدتسوين
كمت منحرجة من كعدتي جنت ناطيه ضهري للبيت بوضع مو حلو ...نفضت ملابسي من التراب وهو واكف مكابلني
-هالدغل اكل الحديقة مو بحاله هالفترة كلت اشلعه شوي شوي ..تعرف جانت مسؤوليات الوالد الله يرحمه
-ربي يرحمه ويصبركم ...طبعا اني اشكرج عاللي مسويته صار كومه اريده بس يسمع ماكو نفسيته البوم احسن بهواي

-عليش تشكر هو اخويه وسندي وكل اللي ضال بهالدنيا

سكت بس عيونه مبحرات بيه فشلني حيل كفيت اريد افوت بس ايده سبقتني حط كفه كدامي منعني وكفت مستغربة تصرفاته من باوعت لايده جرها وقبضهن سويه لبعضهن قوي دليل توتر واني اكثر
-عاشت ايدج عالكاكاو
-شكرا ما سويت شي ضيافة بسيطة
-عبالي ما تعرفين شي بالمطبخ ولا االج علاقة صايرة تطبخين وكبرانة
خزرته بعيوني
-شبيج والله طالبة كلية والصغيرة بالبيت شجابج عالشغل مدللة كسولة