بقايا شغف

حقد وغيرة

فرحة:
ما اعرف منو اللي ردني لبيتي ...بس دخلت البيت ظلام وساكت وحياتي غدت مثله ...اباوع للجدران احسها ضاقت عليه امي لحكتني وفتحت الاضاءة واني كاعدة  بالهول ما اريد اتحرك وكفت خلص الدنيا بنتي مشت وعافتني شكد عارضتها ولاخر لحظة ردت تغير رأيها وتجوز منه ابن المتهناية ولا رضت تعوفه ...

ساعه ابجي واسكت وما ارضى اغير مكاني امي تروح وتجي تحجي عليه لا افاول على بنتي ...شافاول عليها
وهي زواجها كله خطأ عمرها اول شي وباقي التفاصيل تتبع هم لو قريبة اكول ميخالف ويمي... بغير ديرة راحت وعافتني ...

فات معد من الباب الليلة مو ليلتي شعنده فوك راسي ناقصتك صديت متجاهلته !!
كعد يم امي وضلوا يحجون بدون فايدة اني مشتعلة نار على بنتي اتصلت عليها مرتين خلال ساعة اجيت اتصل مره ثالثة اخذ مني الموبايل
-عوفي البنية فرح خل يشوفون دربهم تره مطولين خلكهم وياج ويردون

-معليك بيه مو كافي زوجتها ارتاحيت هسه ..فتح عيونه مو راضي على كلامي عبالك كذبت لو ما هو اني مخربة كل شي
جاوبت امي تدافع عنه
-شعليه هو بيج وبنتج هاي فوكاها والله انت ما تصير الج جارة ابد ولا يفيد حجي خل اكوم اولي لبيت ابو دعاء راح تموتيني

عافتنا وطلعت زعلت دا احجي على ابن اخوها العزيز مو صار اعز مني بعد ...من طلعت دنكت افرك براسي احسه طاير مو بمكانه وابجي

معد:فرحه بنتج رادته للولد وهو ما قصر ما خلى ما جاب كل طلب نفذ النا واني اشوفه زين والاهم متراهم ويه بنتج ادعيلها بالخير احسن من هالبجي

-فرغ البيت معد ما عاد لحياتي معنى تفهمون انتو بنتي بعدها جاهل ما تعرف مصلحتها اني اعرفها اكثر منكم بنتي اذا سنها وجعها تضل تبجي اذا اصبعها انجرح تلفه بمتر شاش وتضل تون وابوس باصابعها حتى يطيب بنتي لا تعرف تسوي لكمتها ولا حارت بشي بيوم كله يجيها حاظر محظر  ...منين اجا هذا قلب راسها وتفكيرها جبير عليها وارمل

-ادعيلها ربنا يوفقها وبنتنا مو مثل ما انت شايفتها عروس تخبل اليوم طلعت فرحانة بالزواج واشوفها متقبله لوضعه ومسرة مو مثل ما تكولين مسرة سباعية ما خايف ولا شويه عليها لا تنسين فرحه اني وياج من جانت رضيعة لليوم وياها اسمحيلي اكول بنتنا مو  بنتج بس اني اللي ربيت ولا عبالج ما مهتم لو ضايج والله ما كدرت اكعد بكاع من الصبح لهسه وهاي بعد سنة الحياة

غلست على كلامه ما اقبل يكول ابوها ولا اريده بيوم ياخذ دور الحنين ..اني اعرفه زين اعرف قساوته ما يقشمرني لو كدر يقشمر بشرية بحالها

شويه واشتد بينا الصياح من كال اروح وياه لبيته ومسوي روحه خايف عليه ابقى وحدي الحنين دمعت عيوني عالمحنة  ....عاندت قراره وطلع بالاخير زعلان من بيتي

دكيت على مسرة ردت عليه
-هلو ماما
-هلا عيون امج شلونج
-ماما زينة اني لا يضل بالج ..
-شصار احجي ؟؟
-ماما شنواحجي ماما عيب اخجل
-من ايش تخجلين مني؟؟اخذج زياد
-اي ماما مو كلت الج زينين
-متوجعة
-لا مو هاي رديت عليج لا يضل بالج حبيبتي نامي واني هم اريد انام
-تغطي زين والبسي شي ثخين بعده الجو بي برودة
-هههههه
-وجع هالضحكة باوعي لا تخليه بعد تتمرضين
-ماما زياد ديسمعج تره
-خل يسمع قابل حجيت شي ما يعرفه هو !!
زياد:عمه لا يضل بالج والله اداريها مي بصينية
-شحدك وما تداريها
-لا والله شحدي هههه