بقايا شغف

واقع مر

السلام عليكم
احبائي ومتابعيني بارت طويل ويتبعه اخر ونختم ونودع مجيد ودعاء ومسرة وزياد ومعد وفرحته
قراءة ممتعة
العتب منكم مقبول واالاعتذار عليه واجب بس حقا كانت ايام وضغط فوك الطبيعي عليه التمس العذر منكم احبابي 😘
.........

دعاء :

بعد اشهر وكل الاحداث وانتكاسة ااهلي الصحية والنفسية مرت الفترة البعدها كلها هادئة لكن مغلفة بحزن شديد ابويه كبر عمر فوك عمره احس بروحه انحنت واني روحي معلكة بي الصبح اكمل شغلي بساع حتى اروح اكابلهم هو وامي وارجع اغدي رجلي وارجع يمهم لحد العشا ومرات مجيد هم يلحكني يبقون كاعدين بالحديقة يسولف وياه ويريد يغير عليه الطابع اللي طرأ على ارواحهم وحياتهم البيت اظلم وغابت الضحكة ونوره ضياء وبهاء جانوا الدنيا كاملة بالنسبة النا كلنا اني اذكر من اول ما ولدت امي بهاء وشكد فرحنا بي ولد بعد اربع بنات وشكد ابويه صبر لحد ما اجانا الفرج وارتاحينا وهالراحة ما وصلت للعشر...مجيد ما مبطل ابد يدور ولو خيط للجناة بس كلنا نعرف محد يكدر يوصلهم واجندتهم اكبر من عوائل محددة كمت اخاف على مجيد لان تهدد لا يضل يدقق يدور الهم

كاعدين بالحديقة جبت الهم العصير فتت جوة يم امي كعدت ساكتة واختي زهراء مكابلتنا وكامشة كتابها هيج بلا نفس هي تركت السنة وكعدت بالبيت لان ماكو شي يساعد نكمل كلنا متأثرات بيهم وعليهم. ابويه ما قابل عليها ويريدوها السنة التجي ترجع التهينا بالمصيبة وغفلنا عنها وهي جانت حملها الثكيل اكثرنا تحملت الهم والحزن ومرض اهلنا صارت كل شي الهم احسها اكبر من عمرها تفكيرها والتزامها تختلف عن تفكيرنا اني وحوراء هي عاقلة او الحياة عقلتها اكثر اني وحوراء اثنينا متزوجات وهي البقت لاهلنا وما قصرت بس كلنا ما نقبل يضيع مستقبلها كمت اروح يمها واكعد اكمش الها الكتب صفحة صفحة واسوي الها واهس بيهن بس هي مو بواهسها القديم نفسه للدراسة ..انقهر من اشوفهن حوراء بالله نكول هي ضيعت تعبها وتركت الكلية بس زهراء بعد كدامها وقت طويل توها ثالث متوسط

كملت دراسة ويه اختي حطيت راسي على رجل امي وهي دنكت باست كصتي واني جريت ايدها بستها تباوع تلفزيون بلا واهس ولا ادراك هيج بس تلهي بروحها البيت احساسه ميت ماكو اي حياة هنا واحنا نحاول جهدنا حتى نصنع الهم روح بي امي بعد العمليات كلها ورجلها ثكيلة ووحدة من ايديها ما تكدر ترفعها عالي وجهها هوايه تأذى ومجيد كل وكت يراجع بيها عالاطباء شنو اذكر اله من يوم عرفته لهسه ..ابد ما الوم نفسي لان حبيته ولا نادمة ولو يرجع الزمن اني متأكدة من نفسي هم راح احبه عطفه ومحبته لناسه والمحيطين بي هي اكثر شي احبه  ..

بين صفناتنا دخلت حوراء وبنتها اباوع لامي تلقائيا فتحت حضنها الها ولامها واني كعدت وتعدلت واباوعهم هي وابويه شلون يفرحون بيهن تبعهن هو من بره مبتسم ويباوع على الطفلة هي سبب الوحيد لهاي الضحكات ...  سألته على مجيد كال راح ويكول ضلي يمنا تعشي راح يتعشى يم عمتج استغربت مجيد عافني ما يقبل اذا بقيت يبقى وياي ونرجع سويه بس اليوم هو مو طبيعي وما عرفت شبي يجوز مشاكل بشغله ما يحب اطلع عليها وهم خفت عليه اخاف مستمر يدور المسؤولين اتصلت بي طمني وحلف ماكو شي عنده هو ... وكال ضلي وانسيهم انت واختج ما بيه شي ...هيج يلا بردت شويه وكعدت  بقينا وياهم لحد ما ناموا وزهراء وصلتنا دتقفل تلكانا ياسر ابن عمي جايب الهم الادوية واحتياجاتهم يداوم ببغداد وبرجعته كل شي يحتاجه ابويه يوصله هو بايده ...تشكرته واخذناه انطيناه لزهراء وهو راح لبيتهم واحنا لبيتنا