بقايا شغف

خلف القضبان

من ساعتين واني احاول انشر ويكول خطأ واستعاده التعديل زهكني والله

دعاء :
فتت لمركز الشرطة واني اختض من فوك لجوة خايفة الله يساعد كل من مر بهيج موقف ما كنت بيوم اتخيل راح اوكف كدام ضابط تحقيق بصفة متهمة ...

دخلت كانت الغرفة بيها ٣ رجال عدا هذوله اللي اصطحبوني لو تذبحوني ما تلكون قطرة دم بيه ما اعرف شلون جان شكلي واحد منهم عطف عليه كام وخلاني اكعد مكانه الضابط المسؤول كان عمره متوسط باوعلي من فوك لجوة بخزرة تخوف حاجاني

-تفضلي ست احجي كالها بكمية اشمئزاز كبيرة ورجع يكتب شنو احجي هو اني شنو اللي اعرفه من السالفة  هو استمر يكتب واني ساكتة ...والسكوت كان كفيل بزيادة الخوف

ذب القلم بعد فترة وباوع بوجهي
-اي سولفي النا واول شي...شكد مبلغ الاختلاس مفوض ....انطيني الشكوى خل الست تقراها

-شنو اسولف اني حتى ما عندي اي علم عن الاستدعاء ولا اعرف القضية
خزرني
-هاااا راح نتعب هيج ومو من مصلحتج ست انت محامية وتعرفين الاجراءات زين سهلي علينا انت تبينين بنت عالم وناس ومو حمل بهذلة

خفت من تلميحه
-من رخصتك استاذ اكدر اتصل بأهلي يجون
-اتصلي

ايدي رجفت وارتاحيت شويه من شفته يتناقش دكيت على بابا مره لخ استعجلهم وهو كال بالطريق واسمع صوت مجيد يلعلع يمه

دخلوا ضباط اثنين بهالاثناء والكل وكف بدخولهم واحد منهم رتبة ...واثنينهم باوعوا بوجهي وجوهم تستفسر .... اللي ديحقق ويايه من فاتوا كبل تغير جذريا وكف تسالم وياهم ورحب بيهم وضحك وسوالف
وهذا الاعلى رتبة اندار بجسمه الي ويباوع لوجهي
- دعاء مو؟؟؟
هزيت راسي بخوف ما شايفته ولا اعرفه اشر الي على مكان بجانب الميز بعيد عنهم

-تفضلي اكعدي هناك ارتاحي
من كال ارتاحي بنبرة هادئة اطمأنيت وزحفت بصفحة عن جمهور الرجال اللي صار بالغرفة لو الكاع تنشك وتبلعني يكون احسن ...صح ما اريد ابجي بس داخلي ديلطم

بين لحظات وبعدهم يتناقشون شنو القضية واني بخبصتي والدمع كام يتسابق على خدي واني اسمع المصيبة الوكعت على راسي ...دخل من الباب هو وعينه مباشرة اجتي بعيني دنكت وطاحت دموعي وخليت ايديه فوك راسي يا ريت لو ميتة ....اسمعهم شون يرحبون بي ويستأذنهم يدخل ابويه وياه يا ربي والله صعبة عليه ابويه يشوفني هنا وبهيج حال

بين نقاشهم لمحته تقرب يمي عيني بالكاع ما اكدر اشيل راسي حاجاني بهدوء
-لا تبجين ارفعي راسج يلا ... كالها بغضب خلاني انفذ اللي كاله مباشرة باوعت لوجهه خزرته وعيونه تلوم وتذكرني شكد حذر وحاجاني وما سمعت منه ...

دخل بابا بهالكلام وركض الي حضن راسي لصفحته وهو يسال
-خير شنو الموضوع ليش جايبين بنتي
الضابط اللي بعدين عرفته جاي من طرف مجيد حاجاه لابوية بهدوء
-سهلة ابو دعاء ماكو شي ان شاء الله
مجيد: عليها سندات بمبلغ اختلاس مال مشروع...... !!