بقايا شغف

كسر قرارات

زهراء:
رجعت للبيت اول ما فتت عرفت بي ما جايهم ولا شايفهم ..رحت بدلت وطلعت بالمطبخ احضر العشا وقت مغربية وماكو بس اني وعمتي وعمي ...طلعت لحم اثرم بي ..عمتى دخلت مبتسمة للمطبخ مدورتني بالغرفة ولحكتني
-هاا انت هنا واني ادورج
سكتت ما جاوبتها بس هزيت راسي ما الي واهس

تقربت يم الكرسي مالتي وكمشت راسي قربتني الها باستني من راسي بدون اي مقدمات واني مستغربة
-اذا زعلانة تعذريني لان زعلتج
حجيت بخنكه اعرف هالكلام ما يطول
-لا عادي
-زهراء اني ما اريد ضرغام يطلع منا ابد تفهمين اني ام وباجر انت هم ام ....واذا صارت بينا مشكلة ضرغام يبقى هنا... يريد يطلع منا والله بيوم اليطلع تطلع روحي
-لعد ليش هيج تسوين بيه

سكتت ما تجاوبني تباوع بعيد ...رجعت حاجتني ترجف
- وين تريدين تاخذين ابني انت ..ابني يبجي من وره مره ....اذا يرضيج تسمعيها كام يبجي من طلعتي وهجم بيتي وطلع
-وهذا ذنبي اني؟؟
-اني ما كاعد الومج بس اريد نكعد مرتاحين عاد ويرجع ضرغام
-هسه هو وين
-راح كامل يجيبه من بيت عمته بنات عماته مكيفات عبن ما ردت اخذ منهم وهسه هالمشكلة يرگصن الها بجفية

ما جاوبتها شجاوب ما ادري هو منو سبب هالمشاكل

ويه اذان العشاء سمعت سيارتهم اجتي وكامل فات يحجي قبله للبيت هو ساكت اني كاعدة يم عمي وعمتي بالهول دخل هو اول ما وكعت عينه عليه بعدها واني غلست ودنكت باس ايد ابوه ورجع راضاها لامه وهي ماتت بجي يمه كوه سكتها كامل ضرغام بارد حيل والكلمة كوه تطلع منه هي تبوس بي وتحظن بي ...اني كاعدة حتى ما كلف روحه يحاجيني بقى وجهي فاهي بالجذب ما سالني شلونج وكسر خاطري هاي تالي تنازلي ورجعتي ...

بقى يم اهله واني ما كدرت ابقى وكفت مسيت عليهم وصعدت بغرفتي تمددت بفراشنا وبجيت وره دقايق انفتحت الباب وانسدت بهدوء والهدوء مستمر احس حياتي تجمدت ويه ضرغام ميت كل شي بيها

يفتر بالغرفة ويطلع بملابسه وساكت واجا تمدد بضهري ما يحجي خبلني هذا اليكولون يحبج !!

ما تحملت بروده كمت وعفت اله الغرفة اكو غرفة مقابيل غرفتنا فارغه بيها اثاث قديم وفراش مالت الحجيه واغراض مالت جهال اخوه طلع قبل زواجنا بفترة .... فتت بيها وسديتها عليه وكملت بجي صدك غبية زين هو لو رايدني ارجع جان هو كال هو حاول او طلب

لنص الليل واني ابجي يأست وفرشت الي ونمت حسيت عليه سواله مكان بالفراش كوه وانحشك يمي فزيت كعدت لحيلي مغمض عيونه وعاكد حاجبه مسوي روحه نايم اني هم ما حجيت انطيته ضهري ونمت وما خلاني انام كثر ما تحرك وكعدت الصبح متأخر على دوامه ندسته بكتفه متصلخ مدري شوكت ذاب فانيلته
-ضرغام ...ضرغام
فتح تك عين بضوجه ورجع غمض ونام
-راح تتأخر على دوامك
-مجاز
كال هيج ونام واني هم كيفت نص ليلي طار بالبجي رجعت حطيت راسي وغفيت ولو بيدي حتى ما اكعد بعد ومن كعدت لكيت الدنيا ظهر وهو ماكو ...خفت انزل وعمتي تسويلي سالفة ...اصلا استحيت هسه شكالوا علينا اليشوفنا يكول عرسان بالخير