بقايا شغف

علاقات معقدة

مسرة:

صار عرس بنت عمي ابو راشد الجبيرة ورحت اني من الصبح لبيت جدي صار كومه ماكو لا حفلات ولا مناسبات كنت كلش متحمسة واني اصلا قليل اروح  امي جانت بس بالعيد تجيبني ونجي نعايد ونرجع تكولون راكض ورانا جلب ابد ما نطول يمهم بسبب المشاكل وامي ماخذه مقولة ابعد عن الشر وغنيله وهالبيت كله شر بالنسبة الها وتخاف هم عليه من الاذية قليل اختلاطي بيهم رغم محبة جدي وعمامي الي

....عمي ابو راشد وجدي بيتهم اكبر واحد بالمنطقة عمي مجيد حاليا كاعد وياهم بغرفة بس بيته موجود وكامل يخبل عالجهة الثانية من البيوت منتظر بس يقنع جدي حتى يتزوج ...

اول مافتت من باب البيت شفت عمو مجيد بطرك فانيلا يغسل بسيارته جان مجاز تذكرت دعاء مباشرة اووف  تمنيتها كون هنا واشوفها من تنثول..رحت بوسته وبللني بالمي واني اضحك
-وين الاقوام 
-كلهن جوه ملتمات الحياية عض الي شفته وبدا يقلب بعيونه تحذير يخوفني عود بالشقى واني طكيتها ضحكه يسميهن كدامنا اني وماما الحياية على مشاكلهن ويه امي من صغار لهسه

طبعا امي ما اجت ولو بيدها ما تجي بس شيخلصها ...كالت العصر تجي ويه جدتي تتحامى بامها امي هم خوافة وما تصير الها جاره

دخلت الباب شافني دارن وجهن والبنات كيفوا لان سويتها واجيت من الصباحيات... زوجات عمامي اثنين اخوات يكرهوني ويكرهون امي وسببها الغيرة الشديدة منها بينما احنا بنات العم ابد ما بينا شي وهذا السبب يخليني اتردد بالجية بس لخاطر صبا العروس واخواتها صديقاتي اجيت وكلش رحبت بجيتي

امها وخالتها يا دوب سلمت عليهن وردن السلام لو ما العيب حتى سلام ما اسلم عليهن ما يستاهلن

كعدت يم جدة وهي تسألني على امي وبيبي وينها وليش ما اجتي وياي والوجوه كبالي تكلبت وجدة مستمرة واني متونسة على كبستهن نسوانه ونسوان عمي الباقيات صدك من سموهن حيايه ...

طبعا جدة ام عمو مجيد وحد عن ام ابويه هذيج متوفية الله يرحمها بس هاي هم تحبنا وتريد خاطر ماما هوايه وجانوا يتمنون لو ماما باقية هنا بس ويه هالحاقدات صار استحاله وهسه احنا كلش مرتاحات مثل ما يكولون بعيدين وسعيدين...

بقيت ويه البنات متونسة عمو مجيد هم فات بدل واجا كعد يمنا جابوا الحنة وكعدنا نعبيها بقوارير مزينة وياها ملصقات وشغلات حلوة بناتية تونست وياهم والقوية عمو مجيد متربع وكاعد يشدشد ويانا بالاشرطة ويدردم على فياخة حفلات البنات
-ادري هسه حنة اعجنوها وخلوها بمنچاسة ووزعن للنساوين حتى الحنة هم تمقرت گامت تتصلون ووتتصنع كبل اتذكر وين ما يصير عرس امي تاخذني وياها عود الزغير ويحنون ايديه فالها زين الحنة ما تشوفون بساع تزوجت

الجدة:عمت عيني من باجر ازوجك بس تكول
مجيد:يمه صار سنة اصيح زوجوني
الجدة:غديييي ناخذ هاي كل عقلك يحرم علي بيتك يا يمه اذا تاخذها
-يلا استلم هاي عود امي