بقايا شغف

تحدي

دعاء:
طلعت من الصبح مستعجلة وهاي بيه مشكلة اني افهي من اكعد الصبح لحد ما يقبط عليه الوقت واكوم اركض من جنت صغيرة لحد هالوكت هاي اني... تأخرت على شغلي ومسافة الشارع بعيدة لابسه كعب بس مو عالي كلش ومستعجلة زلت رجلي لما اعدل مشيتي طاير الكعب وهاي اكثر مشكلة مزعجة متأخرة ولازم ارجع نص الدرب ابدل الحذاء ....رجعت اعرج وفشلانه هسه يطلع احد من منطقتنا ويشوفني يا فشلتي اعرج واضح ...مخبوصة وامشي وادردم وسوء حظي دون منطقة بيها يجي اكثر من ٣٠ بيت يطلع هو بسيارته الراقية ...

مر من يمي نزل جامته ونظارته وعيوني متبسمرة عليه خازرته وهو بعد اكثر لو ننهد على بعض نملخ واحدنا الثاني شكد كرهته البارحة ...وكف السيارة ونزل وافتر يمي ناوي يكمل عركة البارحة
-وين رايحة ضيق عيونه من سأل
-لللشغل!!
فتح عينه بغضب ووجهه كام يتحول اسود على حمار رص اسنانه وحاجاني
-بالقرأن انت فلا ادمية
-تره زودتها استاذ كافي تحملتك بما يكفيني
-وتتحملين لا انع....سكت رافع اصبعه يريد يسبني ما تحملت
عفته واريد امشي عاط بيه
-تعاي وين موليه ارجعج للبيت بدلي
انداريت بطرف عين حاجيته
-معليك بيه انت
الشارع فارغ وهو استغل فرصة جرني من معصمي مرجعني خلع ايدي خلاني اعيط غصب عني
-عوفني
-تسكتين لهسه ما تصرفت وياج تصرف يقهرج تره
-مجيد هد ايدي

باوع الي وصلني لباب سيارته دفعني وسد الباب واندار صعد واني افرك بايدي دمعت عيوني
بمكان ما يرجعني طلع بيه
-هاي وين رجعني
-تبطلين من هالشغل
-مجيد انت معليك بيه
-غصبا عنج ولج تسمعين لا تخليني ادخل احد احجي وياج بالطيب دعاااء كافي
-شعليك هااا انت شعليك روح ضب خطيبتك روح انصح مسرة روح شوف اللي يخصوك شعليك بيه اني؟؟؟
عيطت عليه فاضت بيه بعد
خيط السيارة بريك ركعني بالجامة متعمد ورجع ساق مخبل والله بجيت ولهسه اني ما فاهمة هو شعليه وشيريد

من رحنا لبيتهم البارحة ويه بيبي ومسرة طيح حظي وبجاني يكول الي بطلي وانطيج راتبج كامل عبالك اجدي منه وضل يلح لحد ما رديته وسكته واليوم ما فوتها الي لان صار كلامنا بحضور عمة فرح وهي هم كالت اله ما الك دخل بيها ابوها شاف الها الشغل وهي مجويه منهم زمن تسلطهم رزلته

حاجاني بعدها بهدوء
-تجبرن الواحد والقرأن من احجي وياج اسمعي الكلمة يولي شلج بهالشغل غير اخاف عليج
-شكو تخاف عليه ابويه اخويه انت؟؟
-عمج حالج حال مسرة انت
كتفت ايديه بعناد
-مو عمي
سكت التفتت عليه اشوف شبيه ساكت لكيته مبتسم
-مو عمج  خلص ...كولي شخص يخاف عليج يولي هذوله مو خوش اوادم وسمعتهم زفت
-قابل راح تناسبهم
-عوزها والله ننطيج لرعيان ميخالف مو للكو.....
انقهرت من هيج كال شنو ينتقص مني
-ليش شبيه اني حتى رعيان نزلني مجيد
-اسف ما قصد السمعتيه ابد بس عصبي واجفص ...وما تنزلين الا توعديني ما تشتغلين هناك
-اشتغل ما اشتغل مو ولي امري
جاوبت بلهجة تليق بكلامه
سكت بس اشوفه يغلي جاوبني
-براحتج هذا هو العليه سويته مو تلومين بعدين