بقايا شغف

ابتعاد

*"لا تظن ابتعادي عنك هينا
فقد كنت انت ابن قلبي العاق
فهل تستهين بفراق ام عن ابنها "

مسرة:
بيوم الجمعة اجتي بيبي ام كامل على بيت عيالي جايبيها ولدها فاتت واني شفتها ما تحملت لازم اشوف اللي راح يصير ...دخلت سلمت وهي تلكتني اكلتني بالسلام غير هي اقاربي ....كعدت بصفحة وبدت تحجي ويه عمتي تريد ترجع زهراء وعمتي تتعذرها زهراء تعبانة حيل والدكتورة سوت الها ربط ونايمة بالفراش هسه وكل هاي وام كامل تكول الهم اي شكو واذا اني اداريها العجيز داري نفسج اول احجي ويه نفسي بس ادري بيها ما تكف عن زهراء اذا ما تكون مطلعة روحها هي وضرغام ...هي كوه تكوم وتكعد واكيد مثل ما كالت زهراء مطيحه حظها بالشغل بس الحق يقال هي صح بيها امور غلط بس ككل بيبي ام كامل كلها تكول عنها خوش مره عدا مشاكلها هي وزهراء ونحاسيتها على ضرغام هاي ما يختلف بيها اثنين توصل يمه تصير غير شخص ولدها وبناتها والعالم عجزت تحجي يكولون الها عوفيهم ولا تقبل وبس ضرغام يزعل هي قبله تتمرض ومرضها مو كذب لو تمثيل تتمرض صدك
بقت ساعه تقنع بعمتي ولا تنطي مجال وتضل تلح واجيب واسوي بس خل ترجع طبعا غير ضرغام مقهور وهي كلها ولا تحس روحها راح تخسره

شفت عمتي ما تكدر ترد عليها وعبيرماكو حجيت اني
-جدة فدوة لعينج بيتج النهار كله خطاطير رايحة جايه والبيت جبير وانت ما ترضين تجيب مره تساعدها زين وهي حامل ورجلها راضي عالسالفة وانت تعاندين لما قفل عليها زين هاي مو ما يصير الرحمة حلوة مو لان حماتي والله بس خطية هي تتمنى هالطفل صار كومه من تزوجوا وانت ما تفرحين لضرغام مرته تجيبله ولد اسم صار شي ووكع جاهلها مثل القبله وليد هلكبره بالسونار اسم الله حتى على رحمها موزين تطرحه

شهكت وكامت تسوي اسم الله اسم الله وتجر بهالصلوات اني ادري بيها اعز ما عدها ضرغام وهسه ديصير ابن ضرغام وهالنوب بشرتها بالولد بطريقة شوغت روحها بعد عجايزنا جذب اليكول عادلات ههه

ام كامل:صورت هي بيها وليد ؟؟
مسرة:يااا ما كلنا الج ما شاء الله وليد هلكبره بسم الله ما شاء الله مبين بالسونار وحتى الطبيبة كالت حرامات خل تتركد زين  بيبي يعني لو جان بيها بنية تفرق
ام كامل :يااا لا ماكلت هيج استغفر الله كل شي يجينا من الله خير وبركة

ام زياد:يا ام كامل  انت عبالج هي تدلل بس والله دكتورتها كلش حرصت عليها اكول الها اذا تطرحين هالمره بعد ما يصير الج جهال الا بصعوبة يلا يصير يجوز ما يصير

سكتت تفكر رجعت وكالت لعمتي
-خلوها هنا يمكم اذا هيج عالاقل البنوات يمها بس خل تجي اشوفها واكوم اروح هي زعلانة يا ام زياد بنتج ما تتحمل سالفة وعصبية ما تفاهم واني حجيت وياها وزعلت وحق بيت الله المشيت اله ما حجيت شي وياها دا اعلمها حالها حال بناتي لا بامر ولا بزجر كلت الها ميصير هيج تسوين هااشغلة وهيج سويها اشو هاي محملة عليه طلعت والقرعان الجان ضوجتها...يمه منج اني صافنة ااحمد لله الله وكعني بهالعمة الفقيرة اني ما اتحمل مكايد ابد وهي موتتها لزهراء وتكول ما مضوجتها ..بقت تلح تريد تشوف زهراء