بقايا شغف

تصعيد

زهراء :

رجعت لبيت اهلي واني منهارة نفسيا وجسديا تعبانة منا سقطت طفل والهم الاكبر العيال والرجال كلهم مو الي حتى ضرغام شكد حباب وطيب بس يم امه بعد كلمة ما يحجي حتى لو شتسوي بينا....

تعبت بيومها من الصبح للعصر شغل واني بعدني مريضة جسمي مو كادرة اشيله وهي تريد مني خدمات فوك طاقتي ...المغرب فات ضرغام وبعده عمي جنت متمددة بغرفتي من فات للغرفة كعدت لحيلي اتلكاه
-الله يساعدك
-ويساعدج حبيبة شلونكم
سؤاله الدائم هذا وبي مقصد هذا شلونكم كتله الحمد لله وحسرتي شكبرها بسبب كلامها واسلوبها ويايه

تقرب واخذني بحضنه حطيت راسي على كتفه وغمضت عيوني وهو هم غمرني اكثر بحضنه ويقربني بذراعاته ..
-شطبختي اليوم
-خير من الله طبخت اليوم البنات يمكن يجون عالعشا سويت اكل اسبوع كامل...باوع بوجهي وسكت يعرف امه من تلح ويايه بالشغل وتطفر حتى العافية من يمي...

تركني وراح غسل وبدل واني منتظرته حتى احط اله لكمه ياكلها وانقهرت من حجيت بس والله دا اتعب حيل  تأخر بين ما اتصل بصاحبه ديدور سيارة وتفاصيل واني حاطه ايدي جوه خدي اباوع شوكت يكمل...طلعنا اني امشي وراه كوه صحتي على كدي بعد الاسقاط مدري شجاني  ...

وصلنا للهول اسمعها كاعده تحجي عليه ما اساعدها زين ومدا ادبر البيت ولساني اون من وكع جاهلي وكلامها اللي معتادته اني  ...فات ضرغام قبلي وافوت وانصدم عبالي بس ابوه لو اشخاص من داخل بيتنا ...الكي نسابتها اثنين كاعدين والحجي كبالهم وبناتها وحمايه الجبير من فتت صرت بضهر ضرغام اني اصلا استحي منهم ولا محاجيتهم ابد

هي شافتني كالت
-هاااه شوفو هاي حالها رجلها صار ساعة من اجا بالجذب ما تنزل تسويله لكمه
ابنها الجبير ما قبل عليها وردها ونسابتها هم سكتوها تقريبا تلح صايرة حيل بيه وكلهم منتبهين عدا رجلي البي سلم عليهم وعلى اخواته وباوع عليه كال صبيلي لا علق ولا سوى اي ردة فعل ...

عفتهم ورجعت لغرفتي كعدت ويمكن لاول مره ابجي مهضومة صدك اني ما جنت ابجي لو شيصير واهلي ابد ما مبجيني ولا عندي غلط اليسوى ينحجي عليه بي اعرف اللي الي واللي عليه ...

وره مده صعد هو محشى عليه الظاهر ما مقصرة هي اول ما فات معصب ووجهه مكلوب سالني
-شبيج شكو صعدتي كومي نزلي صبي اكل وحظري العشا لخطارنا عيب شنو هالتصرفات
-هذا كل اللي همك من الموضوع اني ينحجي بيه كدام نسابتك بالله حمايه ميخالف ...كلهن ما تكول هسه هاي عيب ما اكوم ولا اطلع
-شنو ناويه عركه؟؟ بابا كومي واكسري للشر
-ما اتحرك كلت الك اني مو خادمة مشتريني وما اقبل بهالحال
-يا حال يولي شبيج مخبلة انت ..كومي طل عقلج على هاي تزعلين
-عليش تريد ازعل ضرغام اني ما ازعل منها اني زعلانه منك
-شمسويلج هسه اني
-ما مسوي هاي مصيبتك الجبيرة مدا احس اني بضهر زلمتي .....