بقايا شغف

اول مواجهة

اذا اكو اخطاء املائية غلسو😵

دعاء:

رجعت لبيتنا من وكت امي استغربت رجعتي تسال واني ما بيه اسولف ويه احد لو ابرر جدتي صاحتني بس سلمت ورحت سديت باب غرفتي وكعدت وحدي كل ما تطول المدة كل ما تتعقد امورنت اكثر

ابويه رجع من شغله لا يحجي ويايه ولا يباوع الي عبالك اني سويت ذنب جدتي تحجي وياه بغير مواضيع سكتت عن كل شي وهو هادئ حيل ما يطول بالكلام اكل لكمتين وفات يرتاح

انقضى اليوم كله مراقبين وضعه واني اركض قبل اختي اجيب اله طلباته اذا يطلب ولو هو قليل اصلا يطلب منا شي بابا ماكو مثله اثنين بكل شي مختلف حتى لامنا ما شفناه بيوم اذاها لو اهان كرامتها او تعاركوا عركه قوية علاقته بكل الناس حلوة واني ابد ما اريد اغضبه مني ابد ولا مفكرة اسوي شي يقهره بعد  كافي انشغاله بحوراء ضلت هناك ومعلكة روحه يمها شلعنا گلبه من صرنا لليوم وصدك كمت اشوف هم البنات للممات

بالليل كاعدة وحدي بالحديقة كنت اظن الكل نيام انطيت مجال لدمعي يجري براحته ...سمعت حس وكفت ومسحت دموعي من شفته طالع ورايه
-تبجين على مجيد
-لا ما ابجي ..عيني مدري شوكع بيها

-تعاي يمي هنا
تقربت واني خايفة لا يحاسبني لو يرزلني بمكانها حضن راسي وخلاه على يسار صدره وخلاني افرغ همي كله
-يابه لمصلحتج

-اعرف والله
-الما يعرف قيمتج نعرفه قيمته مجيد ما يستاهلج من اول بس اني ما اريد اكسر گلوبجن جنت وشفت الجن رغبة والا مستحيل ترهمين انت اله اعرفه زين بس اخواني والاهل وامي كلها ساندته وبالاخير مثل ما توقعت وما تمنيت يصير وياجن صار ذيج حامل واخاف ربي اشيل خطية الطفل وراشد يتختل بيها مني اكول بي امل بس مجيد ما برر ولا اعتذر تدرين يوم اجاني يخطب لا طلبت منه ضمانات ولا اشترطت عليه شرط بس كتله دير بالك تقهرها اذا اجتني بنتي مقهورة ما ارجعها الك ورجعج عروس مطلكه !!شتريدين بيه بعد ويه مجيد ..ادري هو صاحب وكفات وزلمة ماكو منه بالمواقف بس وياج غلط وغلطه ما يغتفر ابد جان حسب حساب هاليوم واني حذرته

سكتتي ومسح دمعي
-تره توني سديت اتصال ويه عمج يكول جنه حصان لا يكسرون كلبج عليه عرج ما يطكه يموتج هذا وهو صل لا ينثني ولا يعدل
-مو يكولون عمليته صعبة اني على هاي ..قاطعني ومسح وجهي بكفه
-اي صعبه ومريض بس هذا شي والصار بيج شي ثاني

سكتت ودنكت وكمل كلامه
-تره اني اريده يتأدب ويعرف حده وين.. مو ترحين من ورايه تغضبيني وتحاجيه دير بالج دعاء تره زعلي وياج يصبح ثكيل وما نرجع ابد مثل هسه اريدج قوية مرت علينا ايام سود هواي وهاي منها وتروح وراح تتعقد الامور ويجوز يجي لهنا مجيد ما اريدج ضعيفة ولا تخافين منه زين خل نخلص من هالقوانة

هزيت راسي وابجي وهو يسكتني شبكته بكل قوتي

فتت وياه للبيت لكيت جدة تنتظرني هم بمحاظرة تصبر بيه لما يطيب زوجي على حسب قولها وتجيبه وتجينا