بقايا شغف

محادثة اولى

دعاء:

كان يوم خطوبته يوم اسود عليه مر عليه بحزن فوك احتمالي امي وحوراء واخواتي الصغار حايرات بيه عبالهم متخربطة رجعوا ابويه من المشية عليه من كثر خوفهن وحالتي اللي سائت من كثر القهر هذا الهوا كمت ما اكدر اشهگه ولا یفوت بريتي احس سجينة بصدري حتى اني ما توقعت هذا حالي مدري لان جانت صحتي مو تمام وزادت هالسالفة عليه اخذوني للطبيب على عجل امي وابويه مشلوعة گلوبهم من ورايه.... عمتي فرحة موجودة ما راحت للمشية اصلا ما تحبهم ولا تطيق تكعد وياهم ما عاد تجاملهن ..لحكتنا من شافتني متخربطة هيج وصعدت ويانا

..مسرة اصلا ما مهتمة رايحة للمشية الحقيرة ولا كالت هاي صديقتي وخطية ولا مهتمة بيه اصلا تستهزء بيه ... قبل اسبوع تعاركنا وتزاعلنا بسببه ... هي مؤيدة لزواجه وتشوفني محتركة ما تهديني ولا هامها بالعكس تكول احسن الج واله ما يفيدج ولا انت اللي بباله ادري هي تحجي هيج لمصلحتي بس اني معمية عن كل شي بس هو صار من هالدنيا بعيني بعد ....هالنوب افشل من اشوف اهلي هيج صاير بيهم بسببي وتخيلوا وين وصلت بالسوء بسبب هذا الداء اللعين اللي صابني غير ابطل افكر لا والله كل شويه ويجي ببالي هسه وافقوا وهسه يجوز عقد عليها لو تجي ببالي يلزمها يمهه نار وتوج بيه افرفح بالزايد ...

واخذت يوم كامل بهالحال  واحاول اصبر نفسي باي شي كمت بس اريد انهزم من نفسي وافكاري ومن كل هالمكان ما اريد اسمع اسمه ولا اشوف بيته ولا سيارته ولا اتذكره اتمنى اكدر انهزم

...نايمة على فراشي بغرفتنا وامي بصفي بالكاع مددة ما تعوفني صحت عليها بصوت ناصي ...
-ماما
-ها عيون امج
-اريد اروح لبيت خالو مقداد خل نروح مشتاقة لخالو والبنات
كعدت امي لحيلها تباوع بوجهي تشوفني صاحية خالي ساكن باربيل
-ولج يمه دصيري زينة ما اكيف اخذجن ونروح وانتن سالمات ليش هو خالج شكد شايل هم حرك التليفون
-ماما عفيه والله ضايجة اريد اغير جو ونبقى يمهم شكم يوم
بس تكومين بالسلامة نروح

سكتنا اثنينا ورجعت هي حاجتني
-دعاء تبقين يمهم خالج كال جيبيها نشوفها لطبيب واخاف نفسيتها تعبانة خل تضل يمنا يم البنات
-خل نروح واشوف اخاف عيب ماما
-لا عيوني من منو عيب خالج بس مرته وبناته ولده طالعين كلمن بيته ابقي يمه وتونسي وهم صدك يشوفج طبيب هناك احسن

سكتت ما جاوبتها هو اني اريد بس انهزم منا يجوز اصير زينه

بعد اسبوع بس تحسنت شويه طلعت ويه امي واخواتي لاربيل وباسبوع لا طلعت من غرفتي ولا شفت اي بشر كضيتها نوم وهروب من الكل ...مسرة مرتين اجتي وما طلعت ولا شفتها زعلانة منها يمكن حتى اكثر من عمها نفسه عالاقل هو ما يدري اصلا بيه

وصلت لاربيل ورحت طبيب حسب طلبهم ولو اني بس طلعت مناك  احس نفسي احسن صرت وراها خطية خالي ما عاف شي بنفسنا مولات ومطاعم وطلعنا عالمصايف وغير النا الجو كله وعكب كل هالايام عبالكم يوم نسيته لا والله اكذب اذا اصفن دقيقة كولوا افكر بي ما عرفت من الحب غير ان هو مرض صعب التخلص والشفاء منه