بقايا شغف

فراق

دعاء :

طلع مجيد من بيتنا بعد ما تأخر الوقت وهو بكل جهده حاول ويه ابويه يقنع ياخذني من شاف ماكو  امل يقنع ابويه يأس كام طلع صاحني كدام الكل ورحنا بصفحة وكفت يمه مدنكة وهو يتافأف وعصبي
-ليش ما تحجين شي هاي رجعتج لذمتي بعد ليش تسكتين كولي لابوج اروح وياه لو عاجبج تذليني
-مجيد لا تبدي كلت الك منا لهنا ما امشي وياك وابويه ما موافق
-يوافق اذا انت كلتي اله

-واذا اني بعد ما اريد هسه هو كال الك شكم يوم ونجي صار اشهر ما ضلت على هالايام
-تره اذا ضايجة مني بعدج ابد ما اتقرب يمج ولا اجي لحد ما تقبلين انت اخاف على هاي ما ترضين تردين وياي
-باوعت اله بطرف عيني ما مقتنعة واني اعرفهن دماراته واحد واحد جاوبته ...مو هيج السالفة بس بعد تفاجأت اريد وقت محتاجة اشياء منا اخذها مو مال هسه اطلع
-ابتسم ورجع تقرب يمي حيل ويهمس سوالف عيب دفعته
-لا تاخذ راحتك عاد نروح لبيتنا ونتفاهم

اجاا بهاء ابويه دازه يصيحنا يريدون يمشون فتنا للهول عمو معد وكف يريد يطلع ومجيد اندار وباسني من كصتي
-ما اوصيج بنفسج لا تطلعين حبيبتي والشغل كافي عاد تشلعين كلبي بي اكعدي وارتاحي منه والله ما اقصر وياج بشي

وافقت على كلامه وصلناهم للباب وهو قبل يطلع بوس ابويه واندار عليه باسني كدامه خجلني وضوجه لحد هاللحظه اني ما مصدكه هيج انحلت بعد وابويه هم ابد ما مقتنع ...حط بكفي فلوس وابويه تضايق اكثر بس ساكت وصد نظراته عنا باسني مره ثانية والله هي البوسه ما بيها دغش ما نشوف الا اخويه ضياء بيناتنا يدفع بي يريد يطلعه غار حبيبي عليه

كلنا ضحكنا على ردة فعله وهومجيد صدك مصخها بالبوس ويكولهم مرتي غير انتو مجلبين

فتنا جوة بعد ما راحوا اني استحيت ابقى يمهم ابويه عيونه عليه رحت للغرفة واسمعه يحجي على مجيد ولا راضي عنه بس انجبر للمره الالف يوافق بسبب الاقارب وحفظ صلة القرابة والدم كلهم صاروا يلوموه على موقفه المتشدد من مجيد وسبب كل المشاكل رفضه رجوعي لابن خاله وصارت كل هالمشاكل وولد عمو محمد جايين يتوسلون بي يردون نسوانهم من عمي وعمي معاند اكثر من ابويه بعد

مرت الايام تركض مجيد باليوم يتصل ٢٤ مره على عدد الساعات وبالليل يدور سهر وسوالف لوجه الصبح واني استحي البيت صغير والكلمة تنسمع كلش مكضيتها عليه رسائل واذا ارد اتصال اكضيها امم واي وهذا هو طكت روحه كام يتصل بابويه كل شويه يتصل طفر روحه يكول اله انت ما قبلت اخذها وابويه يغلط عليه ويكوله ساعة السودة اللي كلت ابقيها ويضل يلح شوكت وشوكت رجعتكم

صفيت اموري وجهزت جديد اني وامي من اربيل ملابس ومكياج وشغلات خاصة وهي تمشي وتوصي بيه لا اخسر زوجي بعد مره الطلاك مو هين ولا لعبة ولا هو موضوع بسيط يوميه ويتكرر وهالمره همه بعيدين عني واني هناك يم مجيد وحدي ما تحملت الفكرة بجيت وكلت الله يساعد حوراء بكل ذيج الشدة احنا بعيدين عنها خلف الله على الاتصالات مقربتنا كلش انقهرت بعد اهلي بعيدين صاروا والاكثر بسببي