بقايا شغف

عادات وتقاليد

دعاء:
بيت خالو ابو ياسر صار ملجأ النا بعد ما جرتنا عمه فرحة وجابتنا لهنا اني البجي اخذني ولا مكتوب النا الفرح مجيد يهدد بيه وعمتي فرحة تريد مني موقف لخاطر اختي وجع ببطني صار من التجرجر والصياح والهوسة الصارت القهر كاطع نفسي  هذا جان حالي خل اوصف الكم هسه حال صاحبة المشكلة ...بنات خالي جابوا صينية الاكل اني كاعدة بصفحة والعيون تهمل بهالدمع وعمه فرحة سكرها وضغطها معلكات تمددت بالفراش بعد كل الصياح والمعارك اللي خاضتها وحوراء تربعت وخلت طبطب بحضنها ونزلن عالاكل تكولون مجاعة تاكل وتسولف وتضحك ولا يمها ولا كأن شي صاير وياها عبالك احنا اللي رجالنا تزوجوا علينا

عمة فرحة صافنة عليها وساكته انتبهت
حوراء:هااا عمه
فرحة:شنو انت اريد افتهم اكو شي اسمه احساس بقاموسج لو ما سامعة بي كرامة شي من هاي اي شي يوجعج ماكو؟

دنكت وجهها محمر ورجعت رفعت راسها اني ادري باختي تكابر وادري هي نادمة ومو من اليوم ماكلها الندم  جاوبتنا عكس اللي بادي عليها
حوراء:عليمن ...اموت نفسي يتزوج يحترك بنار شكو وانقهر شعندي وهو راح يهتم الي اشو بكل هاي الهوسة وهو كاعد يم ذيج
فرحة: طبعا ما يهتم جاهل بحضنج وجاهل ببطنج ايدة بمي بارد
حوراء:هسه اذا احلف ما تصدكوني اني اخذ حب مانع وهالجاهل هسه ببطني ...ضحكت بسخرية ورجعت كملت خوش فحل ابوهم
كعدت عمه فرحة لحيلها واني جفلت كلت راح اضطر افك حوراء من ايدها هالمره
فرحة:ما قاهرني الا ابوه اللي مسانده هاي التالي اني يطردني عن بيته بعد هم ارجع وانتن ولجن اكص رجلها اللي ترد لرجلها خل يعرفون الله حق

اني زدت بالبجي وحوراء تضحك ما مهتمة بطني تمغصني قوي واخاف احجي هسه وقتها كمت اروح لزوجة عمو ابو ياسر ور شي يهدأ الوجع هو مو مال ولادة اكيد بعدني توني نهايات الشهر الثامن....حجيت الها خطية قلقت ونيمتني بفراش مريح وجابت الي مخاد رفعت رجليه بس وجعي ما ينحمل امدد وارجع اكعد لحيلي الكل قلقوا عليه ...بقينا لحد نص الليل اني جابولي حب مالتي مال تقلصات واخذت ومددت مجيد جايبه وكاعد بالباب لاكيها حجة يريدني اطلع اله وعمي الصغير وياه طابك كل شويه يجي يتوسط اله وعمي ابو ياسر يكول الهم خل يروح لبيته ...محد يحجي بالسالفة ويخافون توصل لبابا اصلا هو صار يومين مريض انفلونزا قوية وحتى سالفة ياسر وزهراء محد بعد جاب طاريها من كالت اله جدة ولهسه وهو ساكت وتمرض

بهالاثناء سمعنا هوسة بره مديت راسي من الشباك مجيد وراشد متلازمين بالشارع ناس خلصت على ناس والولد كلها تحاجزهم بجيت ما تحملت وحوراء مادة راسها ويايه ولا مهتمة وعمه فرحة مكيفة
-اللهي سيدي مولاي كون ناس تفطس ناس بهالليل اجاا عار الزلم هسه يلا شرف
دعاء: عمه لا تدعين لخاطر الله
فرحه: وجع كون ووجع ليكون مقهورة على مجيد ابو النسوان تراه انگس من النگس الثاني
حوراء:والله خوش كتله اكل رجلي هههه