بقايا شغف

خلاف

مسرة :
رجعت من عرس دعاء لبيتي لان امي هي وبيبي راح يباتن بالبيت الجبير واني مقصرة صار فترة ويه زياد حتى بالاتصال وبيبي كالت روحي وارجعي بعد يومين وهاي بعد كومه حجي ما اقبل اعوف امي اخاف عليها بس هم اني صرت متزوجة مسؤولة من رجل ومنتظرني وصابر عليه ومساندني بمرض امي...كلت ايام قليلة وارجع هم صارت امتحانات عندي متراكمة وغيابات كلش هوايه وامي هسه شويه احسن

رجعنا لبيتنا متأخر لان الا زفينا العرايس يلا طلعت اله وهو عنده علم ارجع وياهم كان حاظر وحده لان عبير العروس التالية يا ربي والله ما صارت ولا صايرة بس ويه عمي يتزوج عروسين نفس السنة ولو بيده حتى نفس الليلة يمكن لعبانة نفسي جنت بسببه ومن اخر مره تعارك ويه دعاء اني حتى ما يعجبني احجي وياه الصبح شهكتها موتتنا بالصالون كوه قنعوها يخلون مكياج وتسكت ...

دعاء من طلعنا من البيت متوجهات للصالون ما جان ويانا احد من اهلها وهي ما تبجي ابد ولا تشكي كدام امها وابوها بس صعدنا بسيارة ابن عمي عمار وهي تخربط حالها من البجي لحد ما رحنا ورجعنا راسها هاج عليها وعيونها طفت عبالك وكوه كاعدة جانت عروس مدري شحالها هسه عاد لو قابلة تاكل شي بس المي نازل ببطنها من الصبح لهسه والقهر راح يكتلها ...

وصلنا بيتنا واني صافنة بمشاكل اهلي وزياد عاتبني بالي مو وياه وتعذرته وشوؤه حاولت اوجه اهتمام اكبر اله

اول ما نزلنا بالبيت هو راح لذاك البيت مدري شنو عنده شغلة واني فتحت الباب وفوتت جنطتي جوه ...تأخر يمهم سبحت ومشطت وتعطرت وكعدت منتظرته لحد ما هجم عليه النعاس من التعب مالت اليوم غفيت بمكاني بالصالة بهالشويه اللي نمت بيها حلمت اني بعرس زياد واباوع عليه يضحك بالكوشة بس العروس ما اكدر اشوفها اخاول اوصل لمكانهم بس يبتعد عني واني ابجي وبديت اعيط وابجي وبنص الناس وصوت الموسيقى اعلى بعد من صوتي محد من الحاظرين شايفني.....

كعدني زياد يخض بيه
-شبيج عمري
فتحت عيوني بوجهه مو مستوعبة حالي حطيت ايدي على وجهي وابجي
-اسم الله عيني حلمانة ميخالف ..مسرة شوو باوعي عليه

مسح وجهي ويبوس بيه يكول خوفتيني عبالي بيج شي تبجين بدون صوت بس تونين

-ليش تأخرت ؟؟
-امي ضغطها اليوم مفول شويه جيكت وضعها
-شلونها هسه
-لا هوايه احسن

سكتت صديت بصفحة مقهورة الله يساعدج يا دعاء من كثر تفكيري بيها تخيلت نفسي بموقفها والله يجوز اتخبل

دارني زياد اله
-تره كلش مشتاق !!
ابتسمت وحضنته بكل قوتي شكد احبه ......
-بوسني كلش هوايه ونسولف بهدوء وثمالة عشاق كوه افتح عيوني واسولف وياه تعبانة منا العرس وبعدهاالوقت متأخر واحنا كاعدين غفيت على صدره دك موبايله بعدني وعيني وياه اشوف منو بيه هذا الطبع ولا ابطله ...لمحت اسمها مدري تسأله عن ادوية وشغلات ببيتهم دتسويها