بقايا شغف

تشبث

مسرة:
بقت سوالفهم براسي كعدت ببيتي مثل الضايعة المن احجي وشنو اللي اكوله عكب ما عاندت جدي وعمي واهم من هذا كله عفت امي مريضة وتتخبط وكيفت بالزواج ... ابجي واحجي ويه روحي والطم على رجليه ....فات من الباب زياد بعد زمن وملامحه بانت بيها الصدمة والذهول وتقرب مني يريدني لحضنه ...دفعت بقوة
-مسرة شبيج عمري
-مو تكول اختي هاي !!تجذب ليش؟؟؟
-مسرة اوكفي افهمج
-شنو تفهمني بعد سمعت كل شي اني لعد وينك عنها قبل لا تورطني بيك ...تطلكني اني ما اضل هسه اروح لاهلي وتجي تطلك بلا شلعان گلب اكثر

فتح عيونه بصدمة وعصب
-شنو اطلكج شكاعد تحجين
-اي لو اني لو هي
-وهي شنو ؟؟؟هاي امها تهذري بكيفها
-امها؟؟؟هو بعد شكو وامها روح زياد روح الها اني راح اجمع هدومي وراجعه لاهلي  اخذ راحتك اني قابل غبية لو صدك عبالك جاهلة وما افتهم

وكفت متوجهة لغرفتي كمشني فلتت منه ورجع ثبتني اقوى معصب
-ولج وين ؟؟اوكفي خل احجي وياج ما عندي شي وياها والله

-عليش هيج سويت بيه وتدري اني على شعرة ويه هالدنيا ...ردتك عون الي ردت حنانك اللي من تزوجنا لهسه اختلف تحاسبني وتريد مني كل شي كامل مكمل واسكت واكول ميخالف هو هيج الزواج وفلانة وفلانة واحط لروحي امثلة اقل حتى اقنع روحي تالي تطلع متزوج!!!من هاي ما يحلالك شي يمي صار  لعد من هي حلوة بعينك لهالدرجة شكو ورطتني
-منو متزوج ؟؟..مسرة اهدي خل افهمج فاهمة غلط
عيطت بعلو صوتي وكمت اكمز واشك بثوبي
-ما ابقى وياك تطلكني هسه اروح لاهلي
-ما تطلعين لاي مكان منا لهنا ما تتحركين اذا ما تسكتين وتسمعيني
-جذاب ...جذاااب قشمرتني ودمرتني انت
-لا هيج تسوين بينا خل احجيلج ما متزوجها والله
ليش تجذب مو هاي امك تهون عليك عمي تزوج على اختك وانت متزوج عليه؟؟

لطمت على وجهي كمش ايديه قوي ونزلهم ويباوع بوجهي بخوف وعصبية
-مو هيج اسكتي شويه انطيني مجال ...امها فد وحدة ....تريد تتتاجر ببنتها سوت النا عركه البارحه يريدون يزوجوها لگرايبهم
-اي وانت راح تتزوجها؟؟
-ولج يا زواج خبله انت كافي اسمعي هي كبال عيني وين جانت لو ببالي ..مروة بمثابة زهراء وعبير وهي هم شايفتني اخوها هالشي مستحيل يصير لا اريدها ولا هي اصلا تريد تتزوج لا اني ولا غيري افتهمي اهلها يلفون ويدورون عالبيت وعلى راتبها وهي فاهمة هالشي وين تولي  ... مسرة ما اريد عمرنا يتسمم اني عرفت ما يبطلون طلعت منا وهجيت بس لا تطلع عليها سالفة  كلت من اتزوج يكفون بهالمهجوم ما كمت افوت من شدوا ذيج المره

-راح تنجبر تتزوجها صح؟؟
-لا يا زواج هذا مسرة شبيج هاي زوجة المرحوم اخويه ... ما ردتج تسمعين ولا ردت هالكلام يوصل الج لان اصلا مو ببالي هي ولو بالي يم هيج شغلة ما انتظر ولا اكو من يمنعني
-منو يكول كلامك صدك
-مسرة الف مره كلت الج اني ما مجذب عليج والف مره تتهميني جيبي القرأن واحلف الج اذا ما تصدكيني ما متزوج غيرج وره المرحومة ولا عندي هيج نية اني اريد حياة مستقرة وياج