بقايا شغف

الاخير

نَمنح الفُرصَ لأننا لانُريد انَ نخَسر أحد..

ولِكنُهمَ يخسَروُن فُرصهَم حيّن يظنُون أنَ العطاءَ مُستمر..🖤🥀

حوراء:

وبعد اشهر ....

رديت عالبيت اللي اشترط ابوية على راشد يسويه الي ولجهالي دخلت ونزلت الاغراض من ايدي ويايه عمو معد وعمة فرحة وعمتي ام راشد لحد هسه اني وراشد لا شفته ولا شافني لان اني طلبت هالشي ....بنتي ركضت بالبيت مكيفة مسويلها غرفة والعاب وغرفتي ومطبخ وهول وصحيات مشتمل صغير بصف بيت جدو ساري ...

جدو ساري اجا بنفسه ياخذني من يم اهلي لبيته اول شي.. دعاء ومجيد وعمام راشد اثنين وياهم همه ونسوانهم بقيت للعصر هناك والمغرب وصلوني لبيتي...كلهم متعاطفين واني ما اريد عطف من احد اني مستاهلة اللي جرالي اني ورطت نفسي وخسرتها

عمتي ام راشد تعزل وياي وتشجع بيه الشهادة لله موقفها جان الاقوى ضد ابنها لا راضية بزواجه ولا رضت تشوف زوجته وكلبتها مناحة بيوم اللي عرفت بالخبر حتى اني ما جان موقفي مثل موقفهن هي وعمه فرحه

الكل راح وهي ضلت يمي تصبرني وتقوي عزيمتي وقراري عالرجوع اذا اكو شي متأكدة منها عمتي ام راشد تحبني اني وبناتي اكثر الكل عرضت عليه تبات يمي اول ليلة حتى لا اخاف وحدي

وذيج الليلة جانت الاصعب ...دخل علينا راشد ساعة عشرة بالليل نفس التعامل وزايد بي حاول يثير مشكلة وما نفهت اله هي تعلمني شسوي يتأمر ويحجي وكان شي ما صار وحجته اني تزوجت بموافقتج وعلمج ...نمنا اني وياها وبنتي بغرفة الجهال ما هضمني الا بنتي اللي متعلقة بي وبامه من شافته طارت عليه وجلبت يمه ...ومن ثاني يوم تركتني وراحت لبيتها تبات تجيني بالنهار ومن يجي الشفيه تروح

بقينا ايام هالحال يجي للبيت بالليل يبات والصبح يطلع للشغل ويبقى للعشرة بالليل مرات اكثر وبالليل يمنا اني انام يم بنتي وهو بالغرفة وما اله علاقة بيه بس بكل حركه يحاول يستفزني ويسوي مشكلة واني متجاهلة كل شي

وبدا تقديم الجامعات وجنت طايرة عمو معد اخذني اقدم كلية اهليه اعلى من كليتي القديمة اللي تركتها لان بعيدة على مناطقنا تركتها خدمتني سنوات عدم الرسوب وسنوات كورونا كملنا كل الاجراءات داومت وراشد على عمى عينه صارت الشغلة حاول وراد يخلف بيها بس الموضوع طلع من يمه القسط مدفوع من جدو ساري وابوه يوديني ويجيبني وهو اصلا ما يكدر يحجي بشي  ....بنتي عند عمتي ما ناقصها شي وكل اهلي مرتاحين من همي

رجعت من كليتي اليوم حار الجو وكان الصيف ما يريد يفارقنا فتحت باب بيتي ظهر وكل البيوت ساكنة اني اول ما ارجع بنتي تبقى عند عمتي ارتاح والعصر اجيبها وهاي شغلة هي طلبتها مني مو جدتها واعز شي عدها هالطفلة اول حفيدة ...رغم قربت ولادتي ما شايلة ابدا الهم للطفل ولدراستي  لان هي مكيفة عالاحفاد ومناك امي تشجع بيه اواصل دراسة وما اشيل الهم جنت بينهن مدللة حتى عشاية تلفه الي دعاء وتدزه مطبقة المثل ولان وحدي لو اغلب الوقت عازميني من كل ذني مرتاحة وناسية الهم والغم