صراع مع التوأم المزيف (مكتملة)

|12| صراع مع التوأم المزيف

غمست حورية طرف قطعة القطن فى طبق صغير مليئ بالماء ثم رفعتها ووجهّتها إلى وجه ليل الجالس بجانبها فوق الأريكة ، فأمسى يصدر تأوهات خفيفة متقطعة كلما وضعت القطنة على جروحه ..
جلس هادى بجانب ليل من الناحية الأخرى وهو يقول :
_مش نوديه مستشفى أحسن؟
_قولتله مرضيش
ردت عليه حورية وهى تكمل عملها ،بينما تقدم هادى برأسه قليلا ليرى وجه ليل بالكامل ، ولم يستطع منع نفسه من إظهار النفور والأسى على ملامحه ، فلاحظه ليل وقال بصوت خافت بعض الشئ :
_هو باظ اوى كدا !؟
_لا مش اوى يعنى ..
صمت لعدة لحظات وهو يمعن النظر به وقال :
_او اه بصراحة ، انت ملامحك راحت كلها
انت ولعت ف بيوتهم ولا ايه ياعم ،ايه الغل اللى طلع عليك ده كله ؟!
أسرعت حورية تقول :
_لا لا إحنا هنمسح الدم ده بس وهتبقى أحسن متقلقش ..
التفتت لهادى قائلة :
_روح شوف قطن تانى مينفعش الحتة الصغيرة اللى انت جايبها دى
_ملقتش غير دى
_دور تانى او ابعت البواب ، اتصرف ياهادى فى ايه؟
أجاب وهو ينهض :
_طيب إستنى ..
تركهما ودلف للداخل ، بينما تابعت حورية تمسح القليل من الدم الموزّع على جميع أنحاء وجهه ،وهى تقترب منه بشدة وتسند يدها الأخرى على كتفه..
جلسا الإثنين فى حالة من الصمت استمرت لبعض ثوان ،ثم تحدثت بهدوء :
_قلبى وقع ف رجليا أول ماشوفتك ياليل
حرّك رأسه ونظر لها ،فقالت وهى تنظر للمنطقة التى تنظفها وليس بعينه :
_اتخضيت وخوفت يكون حصل لك حاجة أوحش من كدا .. ، انت كنت آخر واحد أتوقعه يكون هو اللى تحت ايديهم
نظرت بعينيه القريبة منها وتابعت بشماتة مازحة :
_شوفت آخرة الغرور والتنطيط بتاعك بقى ؟!
ابتسم ابتسامة جانبية بسيطة وقال متهكمًا منها :
_مبيقعش إلا الشاطر ياماما
هتفت ضاحكة :
_مفيش فايدة فيك بردو !؟
ضحكا معا بهدوء وصمت .. ثم اختفت ضحكتهم بالتدريج وعمّ السكوت قليلا ،حتى هتفت متسائلة :
_مين الناس دول ياليل؟
هز رأسه نفيًا بتأكيد :
_مش كريستوف
_اشعرّفك؟
_عشان هو اصلا عايزنى عشان ياخد الزفت اللى معايا ، مش هيستفيد حاجة لما يبعت ناس يضربونى ويمشوا ، لو كان هو كانوا خدونى معاهم
_اومال مين؟
_مش عارف ..
تمتمت بخفوت :
_شكله بيكرهك اوى
صمت ليل قليلا وهو لايزال ينظر بعينيها العسليتين ،ثم قال بصوت منخفض :
_بقولك ايه ..
اقتربت منه وتطلعت إليه بانتباه ،فقال :
_هو ااا ..
هزت رأسها باستفهام وانتباه اكبر وكأنه سيخبرها سرًا ما ، ليتابع :
_هو انا سنانى لسة ف مكانها ؟!
.
ضحكت حورية ضحكة واسعة ظهرت بها أسنانها بالكامل ، ثم أجابت :
_ايوة متخافش
رد ليل بابتسامة متعبة :
_انا مش حاسس بجسمى كله ،زى مايكون اتشليت ولا ايه؟
_بعد الشر متقولش كدا ، انت هترتاح بس وهتبقى كويس ان شاء الله
ربتت فوق كتفه بيدها وهى تقول :
_سلامتك ....
*
*
*
_بتحبه !!
هتفت بها روز بتعجب شديد وهى تجلس على الأريكة بجانب أدهم ، ترتدى بنطالًا من الجينز يعتليه قميص غير مكتمل الأكمام من اللون السماوي الفاتح ،وتترك شعرها الطويل منسدلًا خلف ظهرها ..
هز أدهم رأسه بتأكيد وهو يزفر دخان سيجارته من فمه :
_واقعة على بوزها اوى و اى حد عبيط هياخد باله
عقدت ذراعيها ببعضهما وقالت :
_بس ليل مبيحبهاش
_هو قال لك كدا؟
_حكالنا عليها كذا مرة بس مكانش بيتكلم غير لما احنا نسأله عنها وبيرد على قد السؤال كمان لا بيزود ولا بينقص ..
ثم تابعت بيقين بعدما صمتت قليلًا :
_شوفلك سكة غير حورية ، انا متأكدة ان ليل مبيحبهاش ....
*
*
*
فى صباح اليوم التالى ..
.
شعر ليل وسط نومه بلسان الكلب يلامس وجهه محاولة لإيقاظه وحرّك جفنيه بضيق ،ومن ثم سمعه ينبح مرتين ففتح عينًا واحدة دون الأخرى لينظر له ..
كان باب الغرفة مفتوحًا فأدخلت حورية رأسها قليلا لتشاهده وهو يبتسم ويهتف بحماس :
_ايه ده !
شرع يعتدل ببطء ،فتألم قليلًا حتى استطاع الجلوس وأسند ظهره على الوسادة التى تقع خلفه ،ليجلس الكلب فوق قدمه ويداعبه ليل بحنان :
_وحشتنى اوى اوى .. انت جيت هنا ازاى؟!
تطلع ليل إليه وهو يلهث بلسانه تعبيرا عن اشتياقه لصاحبه ،وقال :
_معرفتش انت اللى حصل طبعا .. ده انا اتدغدت وهيبتى وقعت خالص
ضحك وهو يحتضنه ويتحسس شعره الكثيف بيده متابعا :
_انا عارف انك زهقت .. بس متقلقش هنرجع نعيش مع بعض تانى قريب ان شاء الله ، استحمل شوية كمان بس وكل حاجة هترجع زى الأول
.
نظر بإتجاه الباب عندما طرقت حورية عليه ثم دخلت وهى تقول :
_صباح الخير ..
قبل أن يجبها بشئ دلف فاتح ورائف إلى الغرفة فابتسم لرؤيتهما ،بينما ظهرت عليهما الدهشة من مظهر وجهه المليء بالخدوش والجروح ،وصاح فاتح :
_ايه ياليل ؟
اقترب منه وهو يتابع :
_ياليل انت كل ماوشك يرجع لطبيعته تبوّظه تانى ياليل حرام عليك ياعم!
جلس على كرسى صغير كان يقع بجانب السرير ،وجلس رائف على طرف السرير بجانب ليل وهو يقول :
_حصل ايه بالظبط؟ مين اللى عمل فيك كدا !؟
_انتوا جيتوا وعرفتوا صدفة ولا انتوا جايين عارفين أصلا ؟
أجابت حورية على سؤاله قائلة :
_انا خدت رقم فاتح من موبايلك وكلمتهم
_وفتحتيه ازاى بقى؟
_مانت عامله ببصمتك
هز رأسه باستفهام :
_و ..؟
_ومسكت أيدك وإنت نايم وفتحته
ضحكت ثم قالت :
_متقلقش مفتحتش حاجة انا براعى خصوصية الناس بردو
التفتت لفاتح ورائف وقالت :
_انا لازم امشى عشان اتأخرت ع الشغل ، البيت بيتكو بقى ها؟
أعادت انظارها لليل وقالت :
_لو عوزت حاجة من برا كلمنى او كلم هادى وهنجيبهالك ، ماشى؟
هز رأسه بهدوء وابتسم بخفة :
_شكرا
تحركت إلى الخارج ، وما ان غادرت حتى وكزه فاتح بخفة بذراعه وهو يغمز له ويضحك :
_ايه ياكابيتانو؟
هتف ليل بعدم اهتمام :
_ايه؟
_ايه الدنيا؟ ماشية معاك قشطة صح؟ قول قول متتكسفش
_انت كل شوية هتقرفنى كدا !؟ ، احلفلك ب ايه ان مفيش بينى وبينها حاجة يعنى ؟!
_لا مش هصدق بردو انا احساسى مبيكدبش وهيطلع فى حوار فى الآخر
صاح رائف قائلا :
_مش وقته ده دلوقتى ، ليل احكيلى ايه اللى حصل بالظبط؟
لم يجب ليل وطرح سؤالًا جديدًا :
_هى روز فين؟ ...
.
.
ترجلت روز من دراجتها النارية وهى ترتدى بنطالًا قماشيًا أسود اللون ضيق بعض الشئ وقميصًا ذو ازرار من اللون البيج مع حذاء رياضى من اللون الابيض .. ، نزعت نظارتها الشمسية عن عينيها عندما رأت حورية تخرج من المنزل ،فاقتربت منها وهى تقول :
_إزيك يا حورية فين ليل؟
_فوق اهو
_فاتح ورائف جم؟
_اه ، خشى وهيفتحولك على طول
هزت رأسها بالإيجاب وهتفت بعدم اهتمام وهى تدخل :
_ميرسى ..
راقبتها حورية لعدة لحظات وهى تسير للداخل بخطوات ثابتة و واثقة بجسدها الممشوق الطويل ،وخصلات شعرها الطويل الذى يجمع بين لونه البنى واللون الأصفر الصناعى تتطاير خلف ظهرها من أثر الهواء ، ثم تمتمت بإعجاب :
_جامدة البت دى والله ..
تابعت وهى تسير وتبتعد عن المنزل :
_ناقصنى البس كعب عشان ابقى طولها واجيب بدلة جلد وابقى زيها ..
تراجعت عن كلامها قائلة :
_وعلى ايه اصلا ده انا حتى احلى ..
ثم أزاحت شعرها الأسود للخلف وهى تحرك كتفها بغرور وتابعت السير إلى عملها ...
.
.
_انتوا أسئلتكوا كتير اوى ليه كدا ؟!
أجابت عليه روز قائلة :
_ده غلطنا اننا عايزين نتطمن عليك؟
حرّك ليل قدميه بهدوء من فوق السرير لتتلامس مع الارض ثم قال :
_وانا قولتلكوا معرفش مين دول ولا مين اللى باعتهم ..
سمعوا جميعًا صوت جرس الباب فقالت روز :
_هنزل افتح انا ..
تركت الغرفة وغادرت ، بينما هتف رائف :
_مش يمكن يكونوا كانوا بلطجية وعايزين يسرقوك مش اكتر ؟
اعتدل ليل ونهض من مقعده تاركًا كلبه فوق السرير ،وأجاب :
_كانوا مستنينى يارائف
اتجه إلى الخزانة الصغيرة الخاصة بالغرفة وفتحها وهو يبحث بداخلها ويقول :
_اول ماخرجت مكملتش كام خطوة ولقيت حد فيهم ضربنى على دماغى ووقعنى على الأرض
نظر له وتابع :
_لا اتكلمت كلمة ولا ادّونى فرصة حتى اشوف وشهم ..!
.
انتبهوا ثلاثتهم لدخول أدهم المفاجئ وهو يقول بصوت مرتفع :
_يابروو ! ، سلامتك ياحبيبى حصل لك ايه ..
اقترب منه واحتضنه وهو يقول بسخرية ويربت على ظهره :
_ والله أول ماعرفت جيت جرى
نهضا فاتح ورائف ونظرا له بتعجب ،بينما وقفت روز عند باب الغرفة تلتزم الصمت ..
.
نظر ليل حوله يمينا ويسارا باشمئزاز ودفعه للخلف بقوة قائلا :
_ابعد كدا مالكش دعوة بيا
نزل الكلب من فوق السرير بسرعة بمجرد شعوره بأن ذلك الشخص يضايق صاحبه فنبح بقوة واقترب من أدهم ليعضه بساقه فجأة ،فتألم أدهم بشدة وجذب قدمه من فم الكلب بعنف ،فأنقذ ليل الموقف سريعًا ورفع كلبه من على الأرض ليحمله بين يديه ،ثم أعاد أنظاره إلى أدهم الذى اختفت ملامح الألم من فوق وجهه تدريجيًا ،ثم زفر بعدم اهتمام وهو يقول :
_شرس وغبى اوى زى صاحبه بصراحة
_انت جاى هنا ليه !؟