أخذ ليل مقعدًا بعدما جذب انتباه الجميع إليه وبدأ مخاطبة جاد بجدية واهتمام :
_كل اللى كان مكتوب إنك تجيب أى قطعة حرير ، زى المنديل اللى كان معانا ده مثلا ، ونحطه ف شوية من التربة اللى كان مدفون فيها الحجر الأبيض مع شوية من دمك ، وبعدين تمسح ايدك بيه .. وهوب ابراكدابرا بقيت إنسان طبيعى !
صمت جاد للحظات وهو يتطلع فى الأنحاء باستغراب ، ثم قال بعدما أعاد نظره له :
_طب الحرير سهل .. والدم موجود .. إنما التربة دى نجيبها منين !؟
أردفت حورية بملل :
_هو بيعجّزنا ولا ايه!؟
هتف ليل بهدوء :
_على حد علمى بدر لقى الحجر ف البحر الاحمر ، ممكن رملته تبقى دى التربة المقصودة
سأله هادى بفضول :
_وانت عرفت منين؟
_هو قال لى زمان
فقالت حورية باستنكار وعدم استيعاب :
_يعنى احنا المفروض دلوقتى نروح لحد البحر الاحمر عشان نجيب شوية رملة؟!
رد ليل وهو يحرك كتفه بقلة حيلة :
_يستاهل المحاولة ..
باغتهم صوت فاتح وهو يصيح بضحكة عريضة كادت تقترب من أذنيه من وسعها :
_يعنى احنا طالعين مصيف؟!
نهض سريعًا واتجه إلى غرفته وهو يقول :
_اشطا انا هروح اجهّز شنطتى
حدقوا جميعًا بطيفه بذهول حتى اختفى بالداخل ،عدا ليل الذى بدا عليه اليأس من عقل صديقه الذى يسبح بعالم آخر ولا يستطيع النظر لجدية الأمور ....
*
*
*
عاد بدر إلى المشفى ،بعدما انتهى من أخذ حمام طويل بمنزله نظف به جسده جيدًا ،وقد رجع إلى أناقته ،وبدّل ملابسه بأخرى نظيفة ..
أو للدقة ،تخلّص منها ؛فبالطبع لن يترك قميصًا مغمورًا بالدماء فى المنزل هكذا ..
لاحظ خروج إحدى الممرضات من غرفتها ،فأوقفها وسألها :
_لو سمحتى ،هى مفاقتش؟
_لا للاسف لسة
ظهر عليه الإحباط واومأ بحزن ،فتركته الممرضة وتابعت طريقها ......
*
*
*
أشرقت شمس اليوم التالى ..
وقد تحضّر الجميع للذهاب إلى العين السخنة ، فوقف ليل خلف صندوق السيارة يضع بها حقيبتين سفر ،أثناء مشاهدة حورية له وهى تقف بجانبه وتصيح بتذمر :
_طب شنطة صغيرة ياليل !
رد بصرامة :
_لا ياحورية ، واحمدى ربنا إنى اتنازلت وخلّيتهم شنطتين بدل شنطة
_بس انا ناقصنى حاجات كتير مخدتهاش
_احنا مش طالعين رحلة يادلّوعة !
نظرت له بمنتهى القرف ، فبادلها نفس النظرات,وكأنهما طفلين يعاندان بعضهما .. ثم هبّت بوجهه فجأة :
_مش كفاية إنى اتنازلت وهاخدكوا بعربيتى وهخلّيك انت اللى تسوق كمان ؟!
أنت تقرأ
صراع مع التوأم المزيف (مكتملة)
Fantasyلمَ يتمتع غريب الأطوار هذا بسِمات مخيفة لا يمتلكها البشر؟ ولمَ يصبح الحجر الأبيض لعنة رغم مميزاته المدهشة؟ •'صراع مع التوأم المزيف (لعنة الحجر الأبيض)'• - جميع الحقوق محفوظة للكاتبة شهد مدحت
