"صدقنى الموضوع مش زى مانت فاكر"
هكذا أردفت صفا وهى محاصرة بين الحائط والخنجر المرفوع على رقبتها ، فرد ليل بغضب مكتوم وقد قرّبه من عنقها أكثر :
_عارفة السكينة دى لو دخّلتها ف قلبك هتعمل فيه ايه!
فهتفت بحنق :
_انت عارف إن دى مش أساليب بدر يا ليل ! ، حتى لو كنت معاه مكانش هيبعتنى امثّل عليكوا ويضيّع وقته .. بدر مش جبان ولو عايز يخلص منكوا هيجى يعملها بنفسه مش هيبعت حد
وأضافت :
_سامى طاردك عشان كان واخد الموضوع شخصى بعد ما ربطته وضربته ، بدر ميعرفش أساسًا أنه عمل كدا .. وانا قتلته هو واللى معاه عشان محتاجة حد زيك يقف معايا مش عشان امثّل عليك الجدعنة واقرّب منك
لم يساورها الخوف من وضعية الدجاجة التى وقعت بها تحت خنجره ،بقدر الثقة التى تحدثت بها أمامه وهى تواصل كلامها :
_وبعدين مين قال لك ان كل النسخ مبتمشيش خطوة إلا بأمر بدر ؟!
_لإنه عاملهم أصلا عشان كدا !
_بس مش كلنا راضيين .. مش انا لوحدى اللى ضده ياليل ، دول كتير .. جواهم غل وحش ناحية بدر و مش عاجبهم إنه الرئيس عليهم .. عايزين يمشوا يعملوا اللى هما عايزينه ، مش عايزين ياخدوا أوامر ولا يمشوا على قوانين ، وبيتفقوا عليه كمان ف السر
لوى ثغره بسخرية :
_طبيعى .. محدش هيحب يبقى عبد عند حد
هزت رأسها نفيًا وقالت بيقين :
_النسخ بالذات مينفعش يمشوا من غير رقيب ، مقارنة بالبشر العاديين همّا أقل إنسانية وعاطفية ومعندهمش مشكلة يقتلوا أى حد يضايقهم ولو بكلمة صغيرة .. لو سرحوا مع نفسهم ومشيوا بمزاجهم هتبقى حرفيًا كارثة ،وأسوأ كمان !
حدقها ليل بتعجب مما سمعه ، ثم استطردت هى قائلة :
_ليل انا حتى معملتش حاجة تلمّح أنى عايزة اضرّك .. مش زى أدهم اللى كان بيقول ف وشك زمان إنه هيقتلك ومع ذلك دلوقتى بقيت تثق فيه
ثم تابعت:
_أيًا كان انا مش بقولك ثق فيا انا عارفة إنه مش سهل ، بس ع الاقل ادّينى فرصة ! .. انا قرّبت أوصل لجاد على فكرة وقولتلك انّى هثبتلك ولائى وهوصّلك بيه
تطلع لها مطولًا بصمت تام ، ثم حسم قراره وابتعد عنها وهو ينفخ بملل ،ثم قال :
_حاسس انّى هندم بس ماشى ... لما نشوف آخرتها
*
*
*
جلس بدر بصحبة صديقه نادر بحديقة منزله ، فتحدث نادر باهتمام :
_ايوة انا بردو مفهمتش انت ايه اللى خلّاك تقعد ف القسم اسبوع؟
التفت له بدر وقال :
_عشان انت ضيق الأفق يانادر ..
ثم تابع معللًا :
_ دخلت عشان اشوف رد فعل الناس هيبقى ازاى لما يعرفوا أنى اتحبست ، و زى ماتوقعت كانوا رافضين الوضع ده .. أنا عرفت أكسب الناس ف صفّى ودى اهم حاجة
_وبعدين؟ ناوى تعمل ايه؟
_ناوى اضم ناس تانية معايا ، هنشوف مين أكتر واحد الناس مش طايقينه ومش قادرين يقربوا منه عشان حصانته وسلطته ،ونتصرف احنا معاه
أنت تقرأ
صراع مع التوأم المزيف (مكتملة)
Fantasíaلمَ يتمتع غريب الأطوار هذا بسِمات مخيفة لا يمتلكها البشر؟ ولمَ يصبح الحجر الأبيض لعنة رغم مميزاته المدهشة؟ •'صراع مع التوأم المزيف (لعنة الحجر الأبيض)'• - جميع الحقوق محفوظة للكاتبة شهد مدحت
