صباح اليوم التالي..
في احد احياء بحري العتيقة..
قاعد في دكان الاسبيرات وبرص فيهم في الرف..
ابتسم وهو بدندن:هودنا يا هودنا..كسرة قديمة عندنا..بت العكسر تمشي وتسكر..يا قلبي قص دربي اعرف البيت القاعد في
اتنهد..
الغنية دي ليه معلقة معاهو؟!..
ولي ببتسم لمن يكون بدندن فيها؟!..
الغنية دي سرها شنو؟!..
ركبت العربية وقفلت الباب..
عاين ليها بزهج وهو بقول:بتبالغي ي إيڤا
نزلت الفريم من عيونها:بتبالغ انت ي دِكس..مُطلعني من البيت من 9 زي الماشة المدرسة
جراها:اشتقت ليك اعمل شنو؟!
زحت منو لورا:وانا كمان
زحا لورا:م باين لكين
عاينت ليهو..
دِكس رخا صوتو:في زول بقابل دِكس حبيبو بالوش د؟!
اتنهدت:ما دِكس حبيبو هو الكورك فالبداية
جرا يدها:اسف حبيبي
عاينت ليهو مسااافة وابتسمت:م مشكلة
جا عليها:راضي عننا ي جميل؟!
ابتسامتها اتسعت:ايوة
باس خدها:اموت انا في الرضى
ضحكت:جعانة شديد انا
دور العربية وهو بقول:طوالي نمشي مطعم ناكل..عندي كم إيڤا انا عاجباني ومكسرة ضلوعي
ابتسمت وهي بتتكل راسها في الشباك..
اتذكرت معمر..
لا اول ولد ولا اخر ولد يوريها انها عاجباهو ومكسرة ضلوعو..
خلخلت اصباعها في مقدمة شعرها وهي حاسة بفخر..
من هي صغيرة قامت علي فكرة انها جميلة وعاجبة الناس كلهم..
في البيت وفي الحلة وفي المدرسة..
ود حاجة قوت ليها شخصيتها شديد وبقتها انسانة قوية وم بتعمل غير الفي راسها..
عاينت لي دِكس..
دِكس د كان بالنسبة ليها تحدي وهي فازت بيهو..
من زمن كانت شغالة كورس تالت..
طالب جامعي كان بجيهم مع صحبو استاذ بعملو ليهم فعاليات..
وبنات المدرسة كلهم مكسرين فيهو..
طبعا ختتو في راسها..
وحتي قبل ما تعمل اي شي جاها..
لأنها ببساطة حاجة ملفتة للنظر بين بنات المدرسة..
جسمها المقسم والهي مجتهدة فيهو وزايداهو تزبط..
لونها..
شعرها..
طولها..
وملامحها واي شي فيها زابط..
والزابطها اكتر شخصيتها..
اتنهدت وهي بتشيل تلفونها من طرفها وبتنزل معاهو للمطعم..
صلحت اسكيرتها الهاي وسط الزرعي الواصل لنص الساق..
وصلحت شكة البلوزة السودا النص كم..
شعرها اصلا كان ضفيرة واحدة ممتدة علي طول ضهرها..
نهايتو ميج كركداوي غامق كد..
بدون طرحة وكلام كتير..
بس استكيرتي وبلوز وشبط زحاف بالبيج..
مع الحجل ومنكير الكرعين واليدين الاسود والختم الكتيرة..
المطعم كلو بقا مركز معاها..
دِكس مسك يدها..
نظام يوري الناس انها حبيبتي وكد..
زحا ليها الكرسي الجوة..
قعدت وقعد جنبها..
الجرسون جاب ليهم المنيو..
طلب ومدا ليهو المنيو..
الجرسون:والقمر د ياكل ايه؟!
دِكس حدر ليهو:نفس طلبي
الجرسون مشا..
دِكس جرا منها التلفون..
عاينت ليهو:دِكس ياخ
ختاهو في التربيزة وختا يدينو فوقو:اسمعي الدار اقولو د
ختت يدها في خدها:هااا
دِكس:الشباب طالعين بعدين
فهمتو عايز يقول شنو وبقت تعاين ليهو..
دِكس:حاولتا معاهم عشان يأجلو الشغل او حتي يمشو من غيري بس م رضو..طبعا انتي عارفة الطلعة م بتزبط من غيري
حركت ليهو راسها نظام اي..
دِكس:فااا بس..ح اتطرا اكسر حنك طلعة صحبتك وامشي معاهم
زحت يدها من خدها:لكين كد ح نكون اجلناها كتير ي بيبي
دِكس:عارف ي بيبي..عشان كد م تأجلوها..امشو انتو وانا بطلع معاكم مرة تانية
بقت تعاين ليهو..
ابتسم ليها:م بي يدي حبيبي
م ردت ليهو..
رجعت لورا شوية لمن الجرسون بدا يخت الاكل..
دِكس عاين ليها وهي بتاكل في سُكات..
بدا هو زاتو ياكل..
بعد خلصو وشربو حاجة..
في العربية سألها:انزلك فبيتكم ولا بيت ناس نور؟!
اتنهدت وم ردت..
تاني قالت:دِكس ياخ خلي طلعة اصحابك وتعال معاي..نور ح تكون جايبة حبيبها وانا م ظريفة اكون براي بعدين هم نفسهم يتعرفو عليك
دِكس وهو مركز مع الطريق:وانا كمان نفسي اتعرف عليهم..لكين ي بيبي م بتتجازف والله
لوت خشمها:وانا كمان محضرة لبستي علي اساس ح نطقم سوا
جرا يدها باسها:اسف حبيبي
م ردت ليهو..
اصحابو اصحابو وطلعاتهم..
ديل اهم شي في حياتو..
وقف العربية قدام بيتهم لكين بعيد شوية:اسف لأني م ح اقدر اطلع معاك الليلة..بس الجاي احلا..ظط؟!
حركت ليهو راسها نظام ظط..
باس خدها:يلا ي جميل لي بكرة
ابتسمت ليهو وشالت شنطتها السلسل البيج المعلق وتلفونها ونزلت..
لبست الفريم وهي متجهة علي بيتهم..
اول ما دخلت دقت لي نور..
نور:ساندريلا دِكس
ابتسمت:ازيك؟!
نور:كويسة حمدلله..وانتي؟!
إيڤا:حمدلله
نور:وين من الصباح م ظاهرة ف السوشل؟!
ختت شنطتها في الصالة وقعدت:كنتا مع دِكس..فطرنا سوا
نور ضحكت:حلووووو
إيڤا:امممم
نور:اها طلعة بعدين كيف؟!
إيڤا:قدام ان شاء الله..بس يمكن دِكس م يقدر يجي
نور:ليه؟!
إيڤا بكذب:ااا..عندهم عزومة تقريبا
نور سكتت مسااافة:طيب..بنجي نسوقك انا واحمد
إيڤا:نور لو عايزة تطلعي انتي واحمد براكم عادي يعني..ومرة تانية نطلع معاكم انا ودِكس
نور:لا طبعا ي بت..يعني انتي ح تخلي الطلعة عشان هو م جاي؟!
اتنهدت..
نور:ح نطلع وح تزبط ان شاء الله ونتصور ونختها استيت وهو يعرف انها فاتتو
إيڤا:نور ماف داعي للمغارز
نور:في داعي..هو غياظ ياخ
إيڤا:م غياظ..مشغول
نور:م ح نتناقش لأنك م ح تغلطيهو نهائي..لي بعدين..بدق ليك لما ابدا اجهز ظط؟!
اتنهدت:ظط
قفلت الخط رمتو بزهج..
عهد جات طالعة من المطبخ:جيتي متين انتي؟!
إيڤا:قبل شوية..ماما في؟!
عهد:لا طلعت لي خالتو ايناس
إيڤا اتنهدت وقامت لي عهد:اتخيلي دِكس قال م يطلع معانا بليل
عهد:احسن
إيڤا اتأفأفت..
عهد:ليه مالو قال؟!
إيڤا:عندو عزومة..بتاعو اصحابو
عهد رفعت حواجبها:ما ممكن يأجلها؟!
إيڤا:قال م بقدر
عهد عاينت ليها مساافة:طب انتي مالك متضايقة؟!
إيڤا:م دار اطلع معاهم براي ياخ
عهد:طيب اعتذري منهم بس
إيڤا:نور ح تزعل..اصلا هسي ردحت لي ولي دِكس
عهد اتنهدت:إيڤا م تربطي حياتك بيهو..هو ح يطلع ويتونس مع اصحابو انتي كمان اطلعي واستمتعي
عاينت ليها مسااافة..
عهد:ولو خففتي طلعاتك دي يكون احسن
إيڤا اتنهدت ودخلت الغرفة..
اترمت في السرير نامت..
