بعد مرور اسبوعين..
مطار الدوحة..
قعد في كرسي الطيارة بي إرتياح..
عاين بالشباك لي برا..
ابتسم وهو بتذكر موافقة امو الجات قبل تلاتة يوم من الليلة..
رغم كلامو الكتير معاها وكلام رشا برضو ابت تقتنع..
ف اضطرا انو يستعمل آخر ورقة رابحة وهي ابوهو..
وراهو..
ابوهو رحب بالفكرة جدا وكان ردو:انا م بعرف البت شخصيا لكين مدام من طرف خالد ود خالتك يبقى على بركة الله..ابشر بالخير بس
حتى وعد معمر انو ح يتكلم مع امو وح يقنعها..
وفعلا بعد كم يوم معمر لقى انو
بتسألو:هسي البت دي بعد العرس ح تجيبها معاك هنا ولا ح تعمل شنو؟!
معمر عاين ليها بخلعة:البت منو؟!
عاينت ليهو بي طرف عينها:البت القلتا عايز تعرسها دي..الجننتك دي
ضحك:إيڤاا
امو:ح تجي معاك هنا ولا ح تمشي ليها برضو؟!
ابتسم:م معروف..هسي هي خلصت اولى ح اشوفها ونتفق
امو:مشمم
مشا عليها:كلو هيين وبدبر اهم شي انك وافقتي ي ست الكُل
وباس راسها..
امو:اي غشني..بكرة تعرسها وتقلبك علي
معمر:ولا الف وحدة تقدر تقلبني عليك
ابتسامتو اتسعت..
هه..
دي غيرة..
شكلو ح يتعب عشان يرضيهم الاتنين..
اتمردت من خشمو ضحكة خفيفة لمن اتذكر ردة فعل مجتبى لمن عرف انو إيڤا ح تكون مرا اخوهو..
مجتبى:بل بل بل..إيڤا عديل كد
معمر:ايوون
مجتبى:دييم يخ كد الواحد يصحى يصطبح بي قمر معاهو في البيت
امو:ي ود عيب دي ح تكون مرا اخوك
مجتبى حضن معمر:احلى اخو واحلى مرا اخو
ابتسامتو اختفت لمن اتذكر انو رفا رافضة الفكرة تماما..
اتنهد بي تعب..
هو ما صدق امو رضت عشان تجيهو رفا..
لكين م مشكلة هو ح يعرف يرضيها كيف...
مساءً..
بحري..
حرك راسو وهو بسمع في كلام الدكتور بالتلفون:ممكن عادي تسترجع ذاكرتك وم ح تكون في خطورة على صحتك لأنو انت فقدتها وانت صغير شديد واخدت سنين طويلة وانت زاتك استوعبتا الفكرة واتقبلتها..يعني اهلك القاعد معاهم ديل م دسو منك
سألو:طيب ي دكتور ح استرجعها كيف ومتين؟!هل في وقت محدد بعدها ح اتذكر اي شي؟!
الدكتور:ماف وقت معين..انت اول ما تشوف حاجة قوية كانت رابطاك بي ماضيك ح تتذكر..بس ضروري الحاجة دي تكون قوية
يوسف:طيب تمام تسلم ي دكتور..واسف لأني ازعجتك في وقت زي د
الدكتور:العفو م عملنا غير الواجب..وانا موجود في اي وقت
يوسف:م بتقصر والله
وقفل..
اتنهد وهو بعقد حواجبو..
ح يتذكر..
بس لمن يشوف حاجة قوية تربطو بي ماضيهو..
ضروري تكون قوية..
امدرمان..
قعد في سريرو وفتح تلفونو..
داير يدق ليها كد خالد دقا ليهو..
ردا:اوو وين ي دفعةة
خالد بتوتر:وعد بتولد ي معمر وعد بتولد
ضحك بحماس:قول اوقسم..بالسلامة ياخ
خالد:بالسلامة شنو انا خايف
معمر:ليه انت العاوز تولد؟!
خالد:ميتينك ياخ..هسي ودوها المستشفى وانا ماشي عليهم..جيب امي وتعال
معمر:تم
خالد:يلا
وقفل الخط..
عاين لي تلفونو مسااافة..
يدق يوريها انو جا ولا يمشي المستشفى ويخلعها؟!..
