مساء نفس اليوم..
بسمع فيها وهو بوقف العربية قدام بيتهم..
ختمت كلامها ب:بس من صحيت من النوم م دخلتا ميديا
عاين ليها:طيب..نستكين بس ونشوف المواضيع ح ترسى على شنو
عاينت ليهو:اي د الح اعملو
عاصم حرك ليها راسو:لحدي الوقت داك تيك كير
رفعت حاجبها:من معمر؟!
عاصم:يعني..م تتعلقي بيهو كتير وكد
حركت راسها:اوكييه..يلا بنتلاقى
حرك ليها راسو:يلا
فتحت الباب ونزلت..
مدا ليها راسو بي الشباك:م تنسي ترسلي لي الصور اا؟!
إيڤا ضحكت:بعد تدفع قلنا
ضحك وهو بدور العربية يمشي..
دخلت لقت ابوها في الصالة..
إيڤا:سلام عليكم
ابوها:وعليكم السلام..مش اتفقنا تجي بدري عشان بكرة عندك جامعة؟!
إيڤا:ما هدي جيت بدري
ابوها:شايفة الساعة كم؟!
عاينت لي ساعة الحائط:تسعة وربع..م بدري؟!
حرك ليها راسو نظام لا..
اتنهدت ومشت عليهو..
قعدت جنبو وهي بتخت شنطتها في حجرها:كنتا مع اصحابي..قعدة وداع اننا تاني م ح نفضى لبعض في الجامعة وكد ومنها نطمن بعض للجامعة
ابوها وهو عيونو في التلفون:م مشكلة المرة دي..تاني م تتأخري
عاينت ليهو مسااافة حست بيهو م سمع كلامها..
اتنهدت:طيب
قامت اتحركت من جنبو في سكات..
مدت راسها لي غرفة عهد لقتها فاضية..
عاينت للصالة وفكرت تسأل ابوها من عهد وامها..
تاني قالت اكيد ح يكونو مع خالتو ايناس..
دخلت غرفتها..
ختت شنطتها وشالت غيارها ودخلت الحمام..
جات طالعة وهي بتنشف في اضانها بالمنشفة..
قعدت في الكرسي وفتحت تلفونها..
فتحت الشبكة لقت رسايل كتييييرة..
فتشت معمر لقتو مرسل ليها
"وصلتي كيف؟!"
ابتسمت وردت
"كويسة حمدلله"
لقتو م داخل..
عاينت لوقت الرسالة لقتها من الصباح بعد رجعت من بيتهم بي ساعة..
اتنهدت ورسلت الصور لعاصم..
فتشت صورة ليهم كد ختتها استوري وكتبت
"زبادي بست🌚♥️"
طلعت من الواتس ومشت الانستا وفيس بقت تقلب...
شوية كد وجاها معمر شاهد حالتك..
لوت خشمها وهي منتظراهو يرسل ليها عشان تخش الواتس ترد..
م رسل..
دخلت الواتس ودايرة تخش تشوف اخر ظهور ليهو دقا..
رمشت مرتين بتوتر وانتظرت مسافة وردت..
اول كلمة قالها:ظاهر انك وصلتي كويسة لمن بتطلعي كمان
ابتسمت:نمتا النهار كلو والله
معمر:وصحيتي المسا طلعتي
إيڤا:الطلعة جات فجأة والله..كنتا..
قاطعها:فجأة كيف؟!..فجأة لقيتي نفسك في العربية؟!
ابتسمتها اختفت:شبه كد
معمر:وطبعا م وريتي زول
إيڤا:وريت..ناس البيت وريتهم
معمر:وغير ناس البيت؟!
إيڤا:تاني في منو يعني اوريهو؟!
سكت مسافة:ماف زول
سكتت..
معمر:انا قايم اتغدا..يلا
إيڤا:تمام
قفل الخط..
لوت خشمها بزعل..
هسي مالو قال متضايق قدر د؟!..
ختت التلفون وطلعت برا لمن سمعت امها و عهد جو..
دخلت غرفة عهد..
عهد قالت ليها:ااهلا اهلا..إيڤا البقينا م بنشوفها كتير
إيڤا ابتسمت:انا ولا انتي؟!..امبارح صحيت من الصباح لقيتك في الجامعة
عهد:وانا لمن جيت لقيتك مافيشة وجيتي الصباح بعد طلعتا الجامعة ولمن جيت لقيتك مافيشة
إيڤا:وهسي انا جيت لقيتك مافيشة..منو فيها مختفي؟!
عهد اشرت ليها:الاتنين
ضحكو..
عهد:اها اليوم كان كيف مع وعود!!
إيڤا:كويس..فقدناك بس
عهد:يحليلا والله
إيڤا:جات هنا الصباح
عهد:م لاقيتها..ماما قالت لي طلعت قبل اجي بي شووية
إيڤا حركت راسها..
عهد:الجامعة بكرة
إيڤا اتنهدت:اي
عهد:جاهزة؟!
إيڤا:نوعا ما
عهد ضحكت:م تخافي من شي..صح اول ايام بتكون تقيلة تاني ح تحبيها وتتعودي عليها
إيڤا:ان شاء الله
