صباح اليوم التالي..
سِمع ريكودات إيڤا للمرة الخامسة..
قفل التلفون ورماهو بزهج..
معمر قال ح يتقدم ليها..
وهي..
ح توافق..
مسح وشو..
وهو؟!..
وموضوعو الكان ح يطرحو ليها؟!..
هه..
عاين لسقف الغرفة مسااافة..
واتنهد..
موضوع د يدفنو قبل ما يرفع راسو..
تلفونو دقا..
رفعو لقاها هي.. عاين لي اسمها المنور في الشاشة..
ح يرد؟!..
طب ح يقول ليها شنو لو ردا؟!..
ح تسألو توافق ولا لأ..
ح يقول وافقي؟!.. ويبارك ليها؟!..
ح يسلمها لي راجل غيرو بي يدو؟!..
ضغط مفتاح البور عشان يكتم صوت المكالمة ورما التلفون..
بي جهة إيڤا..
انتظرت لحدي الجرس ما انتهى..
عاينت لي تلفونها مساافة..
مرسلة ليه ريكودات من امبارح و سمعها وم ردا ليها..
وقبل دقايق كان اون لاين وهسي لمن دقت ليه م ردا..
غمضت عيونها وفتحتهم..
اتذكرت معمر وكيف امبارح كان مُصر يعرف جوابها..
لكين هي اتهربت واتحلت منو بي قدرة قادر..
بتحبو وموافقة تتزوجو..
ولكن..
وهسي هدا عاصم م داير يرد عشان يوريها تعمل شنو..
ختت تلفونها وطلعت من غرفتها..
دقت باب غرفة عهد ودخلت..
لقتها مافيشة..
اوف..
ح تكون مشت الجامعة..
مشت خطوتين على غرفة وعد..
تاني وقفت..
لو مشت..
ح تحكي ليها الحصل..
ولو وعد عرفت ح تلح عشان تعرف ردها..
وهي ردها..
مربوط بي حاجة تانية..
ردها م ح تقدر تقررو الا ترجع لي عهد..
اتنهدت ورجعت غرفتها..
جامعتها زاتا اجزت..
عشان اسبوع الريدنغ...
مساءً..
في غرفتها بتتكلم بالتلفون..
نزلت راسها لمن سمعتو بقول ليها:إيڤا انتي م عايزاني!!
ردت:عايزاك ي معمر..بس مشوشة شوية
معمر:مشوشة ليه؟!
إيڤا:يعني..خايفة اولا
معمر:مني؟!
إيڤا:من اننا م نتفق..اننا نكون اتسرعنا..انت عارف انا كنت كيف ويمكن انت
معمر:إيڤوو..نحنا اتكلمنا في الموضوع د قبل كد..قلتا ليك الفات مات وح ننساهو..صح؟!
إيڤا:صح
معمر:طيب يلا..م تخافي من النقطة دي بالذات
ابتسمت:طيب
معمر:فالحة حبيبتي..يلا اخليكي تكملي قرايتك عشان تنومي
ابتسمت:حاضر
معمر:وح امدد ليك مدة التفكير لي بكرة الصباح ااا؟!
ضحكت:تكون م قصرتا
ضحك:الديموقراطية اهم شي عندنا
ضحكت:ايوة صاح
ابتسم:يلا
ابتسمت:يلا
معمر:خلي بالك من نفسك وبحبك
ابتسمت:حاضر
وقفلت..
غمضت عيونها وفتحتهم بارتيااح..
د معمر..
حبيبها..
معاها..
ولكن..
عقدت حواجبها لمن اتذكرت الموضوع الشاغلها..
رفعت تلفونها ودقت لي عاصم..
مكالمة كاملة م ردا..
اتنهدت وقامت علي حيلها..
دقت الباب ودخلت بعد سمعت كلمة:خُشي
مدت راسها:صاحية؟!
عهد:لا بتكلم معاك وانا نايمة
ضحكت ودخلت..
جرت الكرسي جنب السرير وقعدت..
عهد استعدلت قعدتها:اها
إيڤا:اها شنو؟!
عهد:مهو انتي من جيتك دي ظاهر عندك كلام
إيڤا ابتسمت:كتير
عهد:معمر؟!
حركت ليها راسها نظام اي..
عهد:مالو..لسه م رديتي ليهو؟!
إيڤا:لسه
عهد:ليه؟!
إيڤا اتنهدت:مبعرف قلتا يعني م ظريفة انك تكوني قاعدة وانا افكر في العرس
عهد عاينت ليها مسااافة بعدها فجرت الضحكة..
إيڤا:بتتضحكي ليه؟!
عهد:بضحك في تفكيرك ال لوكل د..ي بت دي شنو العوارة دي؟!
إيڤا:م عوارة..يعني انتي الكبيرة وكد
عهد:انا الكبيرة..وانتي الصغيرة وكل وحدة فينا ربنا كاتب ليها قسمتها ورزقها براها يعني لو عرستي قبلي ولا بعدي م ح يأثر
إيڤا:ونعمة بالله..لكين يعني الحركة م حلوة
عهد:إيڤا انتي جنيتي!!..من متين نحنا بنفكر كد؟!
إيڤا:عهد يعني..
قاطعتها:ولا يعني اي شي..توافقي بي معمر وتعملو العرس وقت انتو عايزين..انتي ي بت شايفني بايرة ولا شنو؟!
إيڤا ضحكت:م بايرة يخ
عهد ضحكت:طيب م تتكلمي لي زي الحبوبات كد
إيڤا ابتسمت..
عهد:انا بالجد ح ازعل منك لو تاني قلتي كلامك د..مهو م عشان انا الكبيرة ح اقيف في طريق سعادتك..تتزوجي وتعيشي حياتك وانا كمان ربنا كاتب لي قسمتي
إيڤا عاينت ليها مساافة:جيبي بوسة ي بت
ضحكت:يعني عشان كد انتي م وافقتي؟!
إيڤا حركت ليها راسها نظام اي..
عهد ضربتها:غبية بس
إيڤا:م تنبزي
عهد:غبية والله..انا قلتا متأخرة في الرد عشان بتستخير ولا كد نهاي م اتوقعتك تفكري بي السطحية دي..هسي استخرتي انتي؟!
إيڤا:لا
عهد:دايرة تعرسي من غير استخارة؟!
إيڤا:لا بس
عهد:ولا بس ولا بسين..قومي استخيري وبكرة ادي معمر الرد..يلا عشان عايزين نهجج ياخ
إيڤا ضحكت:د كل همك!!
عهد:طبعا
إيڤا ضحكت وحضنت اختها:شكرن
عهد:م عملتا شي
إيڤا وقفت علي حيلها:تصبحي علي خير
عهد:تلاقي الخير
طلعت من غرفة اختها وهي مرتاحة..
