بعد مرور ما يُقارب شهر..
امدرمان..
بعلت ريقها وهي بتعاين لإيناس
البتقول:لكين ي عهد ي بتي بعد غيبتو السنين دي كلها لسه راجاهو..وداعية المولى يجمعني بيهو
عهد رددت:امين ي رب
سلافة ختت صينية الجبنة وعاينت ليهم وقالت:هوي انتو كل ما تقعدو ما بعض ح تتذكروهو وتبكو؟!
عهد ابتسمت..
إيناس:اشتقنا ليهو عاد..نسوي شنو؟!
سلافة قعدت جنب امها:م تسوي شي غير تدعي ربنا يرزو ليكم..وان شاء الله ربنا يستجيب دعوتك وتفرحي بي عرسو هو وعهدون
إيناس:اريتووو..د يكون يوم المُنى
عهد ابتسمت وم ردت..
من قامت بقولو ليها انو ح يعرسها..
خلاص فكرة ارتباطهم دي بقت مسلمة من مسلمات حياتها..
اخدت ونستها معاهم ورجعت بيتهم زي واحدة ضهر..
صلت وكد ورقدت..
فتحت الواتس وكتبت
"اللهم بشرني برجوعه كما بشرت يعقوب ب يوسف♥️"
في الغرفة المجاورة..
إيڤا كانت فاتحة الواتس اصلا..
شافتها سرعة وكتبت ليها
"اللهم اميين🙂♥️"
تلفونها دقا..
وكان معمر..
اخدت مسافة وردت:الوو
معمر:ازيك يجميل؟!
ابتسمت:كويسة حمدلله وانت؟!
معمر:والله كلو زابط حمدلله
إيڤا:رجعتا البيت؟!
معمر:يداب دخلتا والله
إيڤا:كويس..عشان تودي ناس بيتكم المطار
معمر:اي..بي مناسبة المطار د رشا قالت ليك تعالي ودعينا
إيڤا:انا؟!
معمر:اي ي إيڤا
إيڤا وهي بتزح التلفون من اضانها عشان تشوف الساعة كم:م ح الحق البس وكد لأنو قلتا طيارتهم اربعة
معمر:هاك ليها اتفاهمي معاها
إيڤا:هاك منوو؟!
رشا:إيڤووو
ابتسمت:اهلين شوشو..خبرك؟!
رشا:كويسة حمدلله وانتي؟!
إيڤا:كويسة برضو حمدلله
رشا:حمدلله..اها مالك م عايز تجينا؟!
إيڤا:م قصة م عايزة..لكين طيارتكم اربعة وهسي بعد د م ح الحق البس وبتاع
رشا:تعالي لينا المطار طيب
إيڤا سكتت مسااافة..
رشا:يلا بلا اعذار..كلمي خالتو وكد وح ارسل ليك معمر يجيبك
إيڤا ضحكت:طيب اوري ماما واديك خبر
رشا:منتظرينك ي حلوة
إيڤا ابتسمت:طيب يعسل انتي
رشا ضحكت وقفلت الخط..
مدت التلفون لمعمر:قالت ح تشوف امها وتورينا
معمر عامل فيها م مهتم:طيب
رشا عاينت ليهو مساافة:لو بقت جاية ح نمشي نجيبها..ولا نخلي خالد و وعد يغشوها معاهم؟!
معمر:لا لا نجيبها نحنا
رفعت ليهو حاجبها..
معمر:قصدي يعني ماف داعي نتعب خالد ساي
رشا ضحكت:انا زاتي قلتا كد
ومشت خلتو مبتسم ببلاهة وبحك راسو..
بعد مرور ساعتين..
وقفت قدام المراية وهي بتعاين لي روحها..
لابسة اسكيرت هاي لونو بيج فااتح..
فيهو زراير كبيرة بي قدام بي طولو..
لحدي نص الساق..
شاكاهو مع بلوزة بيضا سادة فيها خطوط منها وفيها..
ربع كم كد..
وطرف كمها مُموّج..
واسبورت ابيض وحجل فضي..
ومنكير ابيض والختم الكتيرة ديك..
احتارت تسرح شعرها كيف..
رفعتو كعكة وطلعت البيبي هير..
جرت ايلاينر رفيييعة..
وحددت خشمها بالبني وفوقو ليب قلوس..
ابتسمت ورسلت لي روحها بوسة وجرت علي تلفونها لأنو سمعتو بدق..
ردت: الووو
معمر:اها..نحنا تحت
استغربت:انت ومنو؟!
معمر:انا ورشا
إيڤا وهي بترش العطر:طيب نازلة انا
معمر:طيب
قفلت الخط وطلعت مستعجلة..
امها من المطبخ:ي بت اتغدي واطلعي
إيڤا:بمشي وبجي اتغدا..باي
امها:الله يسلمك ي بتي
