مساء نفس اليوم..
بلع ريقو وهو شايفها بتتخجا بالبكا:يمة بتبكي ليه..انا خلاص لقيت اهلى
زادت البكا:لقيت اهلك معناها ح تفارقنا خلاص
ابتسم:عمري م ح افارقكم..انا بس لازم امشي ليهم
حضنو عليها شديد:امشي ي ولدي ودعتك الله ورسولو..ربي يحفظك ويعدل خطاك محل ما تقبل
ابتسم والدموع بدت تتجمع في عيونو..
فكاها وعاين لي نيزو الواقف والعبرة خانقاهو..
نيزو:يعني كد خلاص؟!
يوسف:لا طبعا ي بليد..انت اخوي وهي امي وح تفضلو كد طول عمركم
نيزو حضنو:ح نشتاق ليك يخ
يوسف:هوي انا م ماشي من الليلة
نيزو ضحك:باعتبار ما سوف يكون يعني
يوسف ضحك:يلا يلا
وطلعو هو ونيزو..
غشو حاج اسماعيل في دكانو و ورهو انو يوسف ذاكرتو رجعت ليهو..
وانو عرف اهلو وعرف بيتهم وهسي ح يمشي ليهم..
حاج اسماعيل اتأثر شديد طبعا و ودعو وهو بدعي ليهو بالتوفيق..
طلعو علي الزلط..
يوسف ركب الحافلة المتجهة لي امدرمان ونيزو رجع بيتهم..
وكل واحد فيهم في قلبو شووق لي اخوهو الح يفارقو قريب..
يوسف في المواصلات..
اتذكر انو بعد فاق مشا لي بيتهم الفي امدرمان..
وقف قدامو وعاين ليهو مسااافة وم قدر يخش..
م قدر يبدا حياتو الجديدة قبل ياخد اذن امو وابوهو الربوهو..
رجع بيتهم..
وقعد امو وحكا ليها براااحة الحصل..
انو اتذكر انو اسمو يوسف احمد..
اهلو ساكنين في امدرمان..
وانو في يوم جو السوق ومعاهم بت جيرانهم..
وقالت ليهو انا عطشانة..
فقام اتحرك من حتتو بفتش في حفاظة موية يجيب ليها منها عشان تشرب..
بعداك تاه..
والدكاكين اتشابهت عليهو..
والوقت اصلا كان نهار..
وفي اثناء لفتو دي طقش ليه شافع اكبر منو بي كم سنة..
الشافع قام لزاهو بي حقارة لمن يوسف وقع..
يوسف خلا الولد يمشي خطوتين ولزاهو لمن وقع في الطين..
الولد وقف علي حيلو وجا جاري عليهو وهو بتوعد انو م ح يخليهو..
يوسف قام جاري..
لحدي ما لقى دكان مقفول وقدامو في كراتين كُتااار..
لزاها لي برا و وقف بينها وبين الحيطة..
وقف وهو بلهث من الجري..
لكين اتفاجئ لمن الكراتين بدت تهز..
بعداك وقعت في راسو لمن اغمي عليهو..
ود كان سبب فقدانو للذاكرة..
انها ضربتو في منطقة حساسة في راسو..
بلع ريقو بتوتر وهو ماشي علي باب بيتهم..
قلبو بدق بي سرعة..
رفع يدو ختاها في الباب..
قبل ما يدق سأل نفسو..
ي ربي ح يلاقوني كيف؟!..
ي ربي نسو انو عندهم ولد اسمو يوسف؟!..
يمكن امو لسه م نست..
منو فيهم عايش..
عايشين الاتنين ولا واحد فيهم مات..
منو فيهم لسه بي صحتو ونفس ملامحو الهو متذكرها..
غمض عيونو ومسح وشو بتوتر..
سمع صوت راجل من وراهو بقول:عليكم السلااام
اتلفت عليهو..
الراجل اتفاجأ بي الشايفو قدامو..
احمد كان راجع من صلاة العشا..
ولمن قرب على باب بيتهم لقى شاب واقف..
فقال ليهو وعليكم السلام كنوع من الاستفسار..
بس اتفاجئ بي عيون الشاب لمن اتلفت عليهو..
ياها ذاتا عيونو يوسف..
يوسف ولدو..
الشايل ملامحو زي ما شال اسمو..
همس:يوسف؟!
يوسف حرك ليهو راسو نظام اي..
جا عليهو خطوة..
احمد مشا عليو خطوتين..
يوسف:ابوي
احمد جراهو عليهو:ولدي
يوسف غمض عيونو عشان يمنع الدموع تجي نازلة..
احمد فكاهو ومسك وشو بين يدينو:كنتا وين ي ولد السنين دي كلها؟!
يوسف:كنتا فاقد الذاكرة..انتو الكنتو وين؟!
احمد بي نبرة ارهقها غياب يوسف:نحنا قلبنا عليك الدنيا وم لقيناك..كأنو الواطة اتشقت وبلعتك..حتي خفنا انك تكون..
يوسف حرك راسو نظام لا لا وقال:عايش ي ابوي انا
احمد حضنو تاني:الحمدلله انك عايش..الحمد للكريم ي ولدي
يوسف حرك راسو نظام اي..
فكا ابوهو وباس راسو ويدو..
احمد باس راسو مسااافة..
يوسف المرة دي حضن ابوهو..
غمض عيونو..
دفا عمرو م حس بيه قبل كد..
احمد:امك الليلة بتموت
يوسف ضحك:بعيد الشر عنها
احمد وهو بفتح في الباب بي يد وماسك يوسف بي اليد التانية:امك م نامت يوم قبل تدعي ربنا يحفظك ويرجعك ليها
فتح الباب:ادخل ي ولدي
يوسف حسا بي رعشة بتسري في اطرافو..
حوش بيتهم د جرا ولعب فيهو..
عاين لأبوهو البقول:خش عشان تسلم علي اختك وامك
يوسف:اختى منو؟!
في دا سلافة جات جارية وهي بتقول:بابا شكلك نسيت ال..
قطعت كلامها لمن شافت معاهو زول غريب..
رجعت خطوة بقت في طرف الصالة..
احمد:خلي الاندومي هسي..ياا ايناس تعالى
ايناس جات طالعة وهي بتمسح وشها من موية الوضو..
احمد:تعالي سلمي علي
قاطعتو:يوووسف..ولدي
يوسف ابتسم ومشا عليها بي خطوات سريعة متلهفة..
سلافة طيرت عيونها وهي بتعاين للشاب البسلم علي امها..
ايناس حضنتو وهي بتبكي:ااااه ي جناي...ااه ي كبيري وسيد حوشي..كنتا عارف انك بترجع..عارفاك بترجع ي ولد بطني
يوسف م قدر يكتم دموعو اكتر من كد..
اطلق العنان لي دموعو وهو في حضن امو المشتاق ليها عشرين سنة..
