بعد مرور عدة أيام..
بحري..
اتنهد وهو بسمع امو بتقول:و مروحة البرندة كمان واقفة ليها كم يوم..الا نصلحها من قروش مدرسة اخوك
استعدل قعدتو:لا ي امي..قروش نيزو دي م ينفع نهبشها لأنو امتحاناتو كبست بعد د
امو:اها الحل شنو
عاين ليها مسافة تاني ابتسم:خليها علي بتتحلا ان شاء الله
امو عاينت ليهو:تتحلا كيفن وحاج اسماعيل حال دكانو واقف ليهو قريب شهر
مسك يدها:بتهون ي امي..هسي اهم شي ندفع لي نيزو عشان يطلعو ليهو رقم الجلوس من بدري..والباقي بهون
ابتسمت ليهو:ربنا يطيب خاطرك ي ولدي زي ما قاعد تطيب خاطري بي كلامك الطيب د
ابتسم ليها:وانا زاتي م داير غير خاطرك يكون طيب بس
ضحكت لمن اتذكرت شي:لوذة جاتك العصر؟!
ابتسم:لحقتني خلااص وانا بقفل في الدكان
امو:اها ولقت حاجتها؟!
يوسف:م لقتها عندي لكين بكرة من الصباح بمش اجيبها ليها من واحد معرفتي
امو ابتسمت:يعني برضو طيبتا خاطرها؟!
ابتسم..
امو:جاتني فرحانة ولمن سألتها قالت لي..اصلو متين يوسف رجعني غير طيبة خاطر
ابتسم:البت دي مسكينة وتستاهل كل خير
امو:مسكينة والله..تستاهلك ي ولدي
فكاها:يمة ياخ
ضحكت:سمح قمتا لي خجلك..الله يجعلها من نصيبك بس
وقف علي حيلو:اقوم انزل المروحة دي اشوفها
امو:تكفها كيف وانت كتفك كان واجعك الايام الفاتت
يوسف وهو ماشي علي البرندة:كتفي بقا كويس يمة
امو:الله يديك العافية ي ولدي
دخل البرندة وقلع قميصو..
ركب في التربيزة وبدا يفك المروحة..
مرت في بالو الطفلة البتغني:هودنا ي هودنا
ابتسم وكمل الغنية:كسرة قديمة عندنا..بت العسكر تمشي وتسكر ي قلبي قص دربي اعرف البيت القاعدة فيه..
صباح اليوم التالي..
قعد قدام امو وابوهو وهو بمسح الموية من وشو..
ابوهو سألو:اها المروحة اتصلحت؟!
يوسف:دايرة ليها حاجة بسيييطة بس..عندي صحبي ورا السوق بوديها ليهو
حاج اسماعيل:خليها لمن يبقا عندنا قروش تصليحها
يوسف:لا م هو صحبي م بشيل قروش كتيرة
حاج اسماعيل اتنهد:الله يصلح حال الدكان د ياخ
يوسف:بتصلح ان شاء الله..قروش امتحانات نيزو قاعدة في الدولاب بوديها للراجل الح يدفعها وبمش السوق
حاج اسماعيل:خليها انا بوديها..انت امش مشوارك
يوسف:سمح يابا
امو ابتسمت وهي بتمد ليهو الشاي:امسك اشرب شايك قبل يبرد
شالو منها وهو مبتسم..
بعد مرور عدة ساعات..
أحد احياء بحري المروقة..
وقف جنب الباب واتلفتت علي امها وصحبة امها الجاين وراها..
وصلوها..
صحبة امها:كان تقعدو تفطرو معانا والله
امها:ي ريت والله..السواق واقف لينا تحت..وبعدين زاتو يداب نلحق نخش السوق قبل الدنيا تسخن
صحبة امها:اي والله بعد د وقتكم ضايق للتجهيزات
امها:ضايق شديد..وبناتي ديل م ملحلين خالص
ابتسمت..
صحبة امها:كلهم كد والله..ربنا يحفظهم بس
امها:اميين..يلا م نوقفك جنب الباب كتير
صحبة امها:يلا ي عهودة..نورتنيا والله
عهد ابتسمت:بنورك ي خالتو
صحبة امها:يديك العافية يقلبي..يلا
امها:يلا..راجنكم يوم الجمعة من الصباح اااا؟!
صحبة امها:ان شاء الله بنجيكم بدري والله
امها:ان شاء الله..يلاا
عهد:يلا ي خالتو
وطلعت من باب الشقة الواقفة فيهو ليها ساعة..
امها ودعت صحبتها وجات لاحقاها..
مسكتها وهي بتنزل في السلم:عليك الله م ظريفة صحبتي دي
عهد:ظريفة شديد والله
امها:م لاقيتي بناتها لكين م مشكلة ح تلاقيهم يوم خطوبة وعد
عهد حركت راسها نظام اي..
ركبت العربية وامها وراها..
امها للسواق:ودينا سوق بحري اول
عهد:يعني ي ماما ح نخلي امدرمان واسواقها كلها ونشتري من بحري؟!
امها:ي بتي م ضروري نشتري..نخش نتنور ساي ولو ماف شي عجبك نطلع
عهد:طيب ي ماما
امها:هسي اختك إيڤا السجمانة دي لو كان جات معانا كان الله عمل ليها شنو؟!
عهد اتنهدت:إيڤا ح تكون نايمة لي هسي ي ماما..انتي عارفاها ماف داعي تزعلي نفسك ع الفاضي
امها:عارفاها انا..بتي دي
عهد سكتت وهي بتعاين للطريق..
بحري دي م بتحبها نهائي..
من يوم يوسف راح فيها بقت م بترتاح الا تطلع منها..
السواق وقف العربية في طرف سوق بحري..
نزلت عهد مع امها عشان يشوفو تشكيلات الفساتين وي
تنورو زي ما قالت امها..
