بعد مرور عدة أشهر..
بحري..
قاعد في مصلياتو وبفكر..
عهود..الساكنة امدرمان..
ليهو شهور تفكيرو مُعلق معاها..
حاسي انها عندها علاقة بي ماضيهو..
وحاسي انو ح يلقى بيها غايتو الضايعة من سنين طويلة..
قام من مصلياتو وطبقها وهو مقرر..
لازم يشوفها بي اي طريقة..
وماف غير ملاذ يساعدو..
ولكن..
قطر..
الدوحة..
فتحت قصة عاصم في الانستا..
شافت صورتينو الخاتيهم من غير ما يكتب شي..
اتنهدت وقفلت الانستا..
ليها كم سهر بتشوف قصصو في الانستا..
في البداية كان بخت كل كم يوم قصة..
ومن لاحظ ليها بقت تشوفهم بقى يخت صورو اكتر من المعتاد..
فاقت من شرودها بي صوت معمر..
عاينت ليهو..
سلم عليها..
ردت ب:وعليكم السلام
معمر:الغدا جاهز..انزلي
عاينت ليهو:وانت؟!
معمر:بستحما وبلحقك
حركت راسها نظام طيب..
وكانت ماشة لكين وقفت لمن
سألها:انتي لسه زعلانة؟!
اتنهدت وهي بتتذكر شكلتهم الكانت قبل كم يوم..
حركت راسها نظام لا:م زعلانة
حرك ليها راسو نظام طيب..
نزلت تحت عشان تتغدا..
وهي بتدعي انو رشا تجيهم..
لأنو البيت بقى خانق شديد و وجود رشا شوية بخفف عنها..
نزلت واتغدت وكد وطلعت قعدت في الجنينة..
اصلا يوسف لابس وح يطلع لي اصحابو هسي..
حست بي زول بقعد جنبها..
عاينت ليها لقتها رفا..
عاينت قدامها من غير ما تقول شي..
رفا سألتها:ح توري معمر السمعتيه امبارح؟!
إيڤا:السمعتو ياتو؟!
رفا:انو انا وباسل مربطين
إيڤا عاينت ليها مساافة:لو كنت عايزة اوريهو كنتا وريتو موضوع الملح الزايد
رفا طيرت عيونها:انا..انا
إيڤا:م وريتو ولا ح اوريهو..لأنك اختو الصغيرة وم ح استفيد شي لمن اخت راسي بي راسك
رفا نزلت راسها:إيڤا بالجد معليش شديد..انا بالجد كنتا شايفاك شلتي اخوي وم كنتا اتعاملتا معاك..لكين والله من زمان دايرة اعتذر ليك
إيڤا:حصل خير
رفا:بالجد ي إيڤو؟!
إيڤا حركت ليها راسها نظام اي..
رفا مدت ليها يدها:ممكن نبدا صفحة جديدة؟!
إيڤا صافحتها ببرود:ممكن
رفا ضحكت بي حماس وهي بتنط في إيڤا تحضنها..
إيڤا ابتسمت..
رفا فكتها:تعالى احكي ليك انا وباسل مربطين من متين
إيڤا:اممممم..من ايام عرس وعد؟؟..يوم كنا في المزرعة وشفتكم سوا بورا القطاطي
رفا ضحكت:هييييي..صح انتي كنتي شفتينا..لكين والله الوقت داك م كنا مربطين
وبدت تحكي ليها عن علاقتهم هي وباسل..
إيڤا بتسمع ليها بنصف عقل وعقلها الباقي مع معمر..
مساءً..
ختت يدها في خشمها وهي بتتثائب بي نعاس..
عاينت للساعة لقتها 11 وحاجة..
قفلت التلفون وختتو ورقدت..
عاينت للمكان معمر الفاضي في السرير..
متأخر الليلة..
زي كل مرة بقى يطلع ويتأخر في الرجعة..
ويوم سألتو كورك وقال انو بخفف مع اصحابو من ضغط الشغل وكد..
واتهمها بي انها م بتحس بي ضغوطاتو وبتاع..
في ساعتها سكتت وم حاولت تترادد معاهو كتير وهو زهجان..
سكتت بس اخدت زعلة صارمة خلتو يرجع يعتذر ليها تاني يوم..
زعلة لي هسي بواقيها قاعدة..
ليه يطلع يخفف برا؟!..
ليه يمشي لي اصحابو وم يجيها هي؟!..
ليه م معتبرها صحبتو؟!..
اتنهدت..
حتى هي معتبراه صاحبها..
حتى هي م قدرت تحكي ليه يوم عاصم جاها في الكوافير وقال بحبها..
م قدرت تحكي وحدتها الحست بيها يوم عرسها لأنو صحبتها الوحيدة مافيشة..
وحدتها البدت من يوم عرسها وكل ما ليها بتكبر..
في الشقة..
ومن جات هنا..
كل ما ليها بتكبر..
قعدت علي حيلها وفتحت تلفونها..
عايزة تدق لي عهد تفضفض ليها بس لا..
ح تكون نايمة هسي ومف داعى تقلقها..
عاينت للباب البفتح ومعمر بجي داخل..
رفع حواجبو الاتنين ك حركة تلقائية لأنو استغرب..
وسألها:صاحية لحدي هسي عندك شنو في التلفون؟!
إيڤا لوحت بتلفون بعدم اهتمام:ولا شي كنتا بتصفح ساي
حرك ليها راسو نظام طيب وهو بخت التلفون في التوليت وبقلع ساعتو يختها..
راقبتو وهو بفتح الدولاب بشيل هدومو وبمشي علي الحمام..
غمضت عيونها بتعب وفتحتهم..
ختت التلفون في الكومودينة وصلحت رقدتها..
جا مارق..
طفا نور الغرفة ورقد جنبها..
معمر:تصبحي علي خير
اتنهدت:تلاقي الخير
ونامو..
