مساء نفس اليوم..
ختت صورة ليها في جامعتها..
صورة سلفي..وشها ظاهر كامل وعيونها شوية اصغر من حجمهم الطبيعي بي سبب الشمس..
شعرها ضنب حصان ومطلعة البيبي هير..
وعاملة ماسكرة وروج بني فااتح..
كتبت
"
"لهفة البدايات ليست حُب..
لا يُحب الانسان بأسبوع او بشهر..
لا يمكنك ان تحب البحر وانت تقف علي الشاطئ..
يجب ان تغوص في اعماقه، تضربك امواجه ،تضرب قدمك صخرة وترى قاعه المُظلم..
فتلمس عيوبه وترى ظلماته وتعرف كيف تغضب..
وعندها فقط إما ان تحبه كله او تكرهه كله..
يبدأ الحب عندما ينتهي الحماس.."
ختتها قصة في الانستا..
بقت تعاين ليها مسااافة من برا..
اتنهدت وقفلت التلفون..
دي اول قصة تختها في السوشيل ميديا عموما بعد طلاقها..
ومعمر لي هسي م ختا شي..
حتى بقا م بخش كتير في الميديا..
عكسها هي المالية حياتها بي الميديا..
اتنهدت سمعت صوت زغاريت..
وقفت علي حيلها وطلعت بسرعة لي برا..
بقت ايناس وسلافة جو..
وامها وعهد واقفين..
سألتهم:الداير يعرس منو؟؟
ايناس:ولدي وبتي دايرين يعرسو
إيڤا عاينت لي سلافة:دايرة تعرسي منو انتي؟!
سلافة ضربتها:م انا ي عويرة..يوسف ح يعرس عهد
إيڤا عاينت لي عهد وهي مرفعة حواجبها بي دهشة..
تاني ابتسمت وفكت الزغورتة..
سلافة:كدي انتو روقو خلينا نشوف راي العروسة وام العروسة
ايناس:اها ي ليالي يا اختي..الليلة انا جاية وطالبة بد بتك لي ولدي
ليالي:د يوم المنى ي ليالي ي اختي
ايناس فكت الزغروتة
سلافة:اها ي العروسة نقول يوي؟!
عهد بي خجل:قولي يوي
سلافة وإيڤا فكو الزغاريت مع بعض..
يوسف في بيتهم ابتسم لمن سمع صوت الزغاريت زايدة..
د دليل علي موافقة عهد واهلها..
انتظر ابوهو يجي من الشغل وساقو مشا لي بيت عهد..
وفعلا طلبوها رسمي من ابوها..
وابوها واقف طبعا وقررو العرس بعد 30 يوم..
واتفقو علي باقي التحضيرات وطلعو..
إيڤا جات لي عهد:ابو دي سرعة زاتو
عهد ضحكت بي خجل..
إيڤا دقت لي وعد:ام تالا
وعد:الكعبة..مالك م جيتيني لي هسي
إيڤا:نزلتا جامعة يخ حالة صعبة..لكين بعد د انتي التجينا
وعد:ليه مالك؟! حامل؟!
إيڤا اتجاهلت بطنها الاتقبضت وقالت ليها:عرس اختك وكد
وعد:اختي منو؟!
إيڤا:في منو غيرها..الخسيسة كاتلة حيلها وجابتو يوسفي الهوى
وعد ضحكت:عليك النبي بتتكلمي جد؟؟
إيڤا:والله جد..هسي كانو هنا وعمو وابوي حددو العرس بعد شهر
وعد:سجمنااا د شنو السرعة دي؟!
إيڤا:نحن في عصر السرعة ي ماما
وعد:كان كدي بكرة الدغش بتلقونا انا وتلو في وشكم
إيڤا:حلااتا يخوانا اشتقت ليها زاتي
وعد ضحكت:يلا النمش نستف شنطتي
إيڤا ضحكت:هاك باركي للعروسة
وعد:لا لا خليها ببارك ليها بكرة لايف
ضحكو وقفلو الخط..
عهد سألتها:قالت شنو؟؟
إيڤا:جاياك بكرة هوا
ضحكو وكل وحدة دخلت غرفتها..
