بعد مرور يومان..
بعلت عبرتها وهي سامعاهو بوصي فيها..
معمر:قبل المغرب تصلي البيت ي إيڤا
اتنهدت:حاضر
معمر ابتسم:طيب وخلي بالك علي نفسك
إيڤا:طيب
معمر:حلااتو البسمع كلامي
م قدرت تضحك لأنو العبرة خانقاها..
معمر:إيڤووون
إيڤا:ح اشتاق
ضحك:وانا من هسي مشتاق ليك والله
مسحت دموعها..
معمر:اسبوعين بس وح اكون في وشك..م تبكي
إيڤا:طيب
معمر:طيارتي خلاص ح تقوم..لازم اقفل
إيڤا:طيب تصل بالسلامة
معمر:تسلمي لي..يلا
إيڤا:يلا
وقفلت التلفون..
رمتو بي زهج وهي بتمسح دموعها..
حاسة سفرتو دي بداية لي بُعادو عنها..
بي جهة معمر..
ابتسم وهو ناوي اول ما يصل يفتح الموضوع مع امو..
انو عايز يعرس إيڤا..
تحديدا هي بس..
اساسا الموضوع المسافر ليهو من هنا..
بس داير ياخد الموافقة من اهلو بعداك يوريها..
م عايز يقول ليها بحبك قبل تبقى بينهم علاقة شرعية..
بحري..
يوسف قاعد وبحضر في التلفزيون..
وجنبو ملاذ وامو بتونسو..
م من طبعو
يتنصت علي الكلام بس لفت انتباهو اسم عهد الذكرتو ملاذ..
سمعها بتوصفها لي امو..
هادية ومسالمة زيادة عن اللزوم..
جميلة ومحتشمة..
حرفيا انسانة مثالة..
وبرضو حكت قدر شنو بتكرها وجواها حاجة نافرة اتجاها..
ضحكت امو وسألتها كيف تقدر تكره انسانة جميلة ومحبوبة زي دي..
سرح بي خيالو..
انسانة مثاالية ومحبوبة..
هادئة..
محتشمة..
كل الصفات دي بتذكرو بي زولة هو بعرفها كوييس..
بعرفها اي شي فيهو عقلو اللاواعي وقلبو وبتعرفها مشاعرو..
لكين عقلو ناسيها..
غمض عيونو..
اتلخبطت قدامو عدة لقطات..
شافع وشافعة بلعبو سوا..
وبدندونو هودنا..
صوت المرا يوم السوق الكوركت عهوود اركبي من الشمس دي..
صورة البت الشاف ظلها من ورا القزاز المُظلل..
فتح عيونو و وقف علي حيلو طالع، عسى ولعل يتذكر شي او على الاقل يتخلص من المواقف البتخلط ليهو مع واقعو دي..
مواقف هو بعتبرها مجرد دهاليز وهو م عارف انها حياتو القديمة..
مساءً...
في العاصمة القطرية..
ابتسم وهو بشيل ولد اختو..
رشا من بعيد:تعال ي دود خلى خالو يرتاح
معمر:صحيت خلاص انا
جات داخلة:اجي دي نومة شنو دي؟! من اتعشيت ودخلتا م تميت ساعة
ابتسم:تقولى شنو بس
ابتسمت..
سألها:بتعرفي الحب البحمي عيونك النوم؟!
ضحكت:بعرفوو
معمر:بس..حاليا عايشو انا
جات قعدت:لا دي دايرة ليها قعدة..احكي لي كيف ومتين وليه؟!
ضحك:فجأة..من يوم شفتها في بحري و وصلتهم بالعربية
ابتسامتها اختفت:يعني دي م إيڤا؟!
ضحك:ياها..هوفي غيرها؟!
ضحكت بفرح:ولا ينفع يبقى غيرها اصلا..اها وريني
معمر:اوريك شنو ي بت..بحبها وعايز اعرسها
طيرت عيونها بخلعة:عايز تعرسها؟!!!!
حرك راسو:عايز اعرسها
ضحكت:د يبقى يوم المُنى والله
ضحك:حاي مخصوص عشان اكلم امي..بعداك ارجع اتقدم واجيبها هي وشهادتي واجي
ضحكت:لعيب ي ولد
ضحك:كييف د كلامك؟!
رشا:طيب كلم امي طوالى
معمر:اي بس اروق
رشا:طيييب ح ادق ابارك لإيڤا
معمر:لا لا لا اوعا..إيڤا معارفة اي شي
عقدت حواجبها:كيف؟!
معمر:عديل..انا م موريها اني بحبها وكد
رشا:سجمي ي معمر كان طلعت بتحب غيرك
معمر:تؤ..مثبتها انا
ضحكت:مش قلتا ليك لعيب؟!
ضحك:هي كمان م هينة..لو تعرفي تعبتا كيف عشان اثبتها
رشا:اتعب للنادر وخلي العادي للباقين
ضحك:بالضبط كد
رشا:والله الف مبروك وربنا يتم ليك على خير..وسرعة تعرسها تجيبها لي
معمر:شايفك بتحبيها
رشا:شديد ياخ..بت مزة وراقية
معمر:انا كد ح اغير
ضحكت:اسكت ي مستهبل
ضحك..
وقفت على حيلها:طب اخليك تتم نومتك بعد د ابونا ح يجي
ضحك:هو ما فيها نوم بعد اتذكرتها
ضحكت:والله وقعتا ومحد سمى عليك
معمر:مش كد؟!
رشا:ايوة
وطلعت...
رقد وهو مبتسم..
كد ضمن رشا..
فضل ابوهو وضمانتو هينة..
الصعبة ياها امو..
