نسيان و لكن

١٧

بعد مرور ما يُقارب شهر..
بحري..
اتصلح في قعدتو:انتي ي ملاذ
اتلفتت عليه بي إهتمام عشان تسمعو..
كمل:متذكرة كان حكيتي لي عن بت في جامعتكم وانتي م بتريدها وكد؟!
ابتسمت لمن حست بيه متهم بي تفاصيلها:اي..مالا؟!
يوسف:احم..اسمها منو؟!
ملاذ:عهد ليه؟!
يوسف:ساكنة وين؟!
عقدت حواجبها:في امدرمان..ليه؟!
يوسف عقد حواجبو..
بدت تتكون في مخيلتو صورة بيت ارضي واسع..
لكين اتشتت بي صوت ملاذ وهي بتسألو:مالك قال مهتمي بي موضوع البت كد؟!
نيزو اتحمحم بي صوت مسموع..
يوسف:لا ابدا خطرت في بالي فجأة
ملاذ وهي بتخت في فنجان القهوة:امممم
عاين ليها وهي بتقوم وبتقول:انا امشي بعد د
نيزو سألها:مالك يخ يداب جاية
ملاذ:لا لا..اخير امشي اخد لي نومة
عاينت لي يوسف:احسن من الونسة الم عندها طعم دي
نيزو ابتسم ونزل راسو
يوسف ابتسم ببرود:نوم العوافي
ملاذ ابتسمت بي غيظ:الله يعافيييك
ومشت..
نيزو قعد يضحك:فرستا البت
يوسف عاين ليها ببراءة:كيييف؟!
نيزو:البت جاية تتونس معاك تقعد تسألها عن بت تانية؟!
يوسف:وفيها شنو؟!
نيزو عاين ليه مساافة:يوسف انت ناقش ملاذ بتحبك صح؟!
يوسف عاين ليها مسااافة وم عرف يقول ليه شنو..
ودخلة امو نجدتو..
خلاها تسأل نيزو من ملاذ وطلع..

مشا علي باب الشارع وهو بردد:عهد..ساكنة امدرمان
وقلبو بدغدغو كل مرة يقولها فيها..

امدرمان..
ابتسمت وهي بتسمع في اختها بالتلفون بتحكي:يخ خالتو مجيدة دي تعبتا معاها عديل..قدر ما اعمل ما عاجبها ودايما حاشرة نفسها في خصوصياتنا انا ومعمر..احي بس مدايرة اقطع في حماتشي
ضحكت:هو انتي م خليتي ليها شي
ضحكت:اعمل شنو لكين ي وعود..مفروسى منها
وعد ابتسمت:معليش..فترة وح تعدي وح تزبط معاك..الفترة الاولى دي فترة اختبارات..لازم تصبري
إيڤا:صابرين..لمن نشوف نهايتها
وعد:ومعمر كيف؟!
إيڤا:معمر زابط ورشا وعمو كلهم زابطين..بس مشكلتي هناية دي
ضحكت:هناية دي ح تكسبيها بي المعاملة السمحة والكلمة الطيبة
إيڤا:احي بس
وعد:اوعا من جنك داك..عارفاك لو قمتي كعبة
إيڤا ضحكت:لا لا يخ..في النهاية دي حماتشي وام الغالى
وعد:ايوة كد..عشنا وشفنا إيڤا مرا والله
ضحكت:هوي يلا..انا الليلة ح اطبخ ليهم
وعد:اول مرة ولا شنو؟!
إيڤا:اي..بعد مرات كنتا بعمل ليهم حاجات خفيفة خفيفة..الليلة ح ازبط الغدا كلو
وعد:اوكيه بالتوفيق
إيڤا:امين..بوسي لي تلو لمن تصحى
وعد:طيب
إيڤا:يلا
وعد:يلا
وقفلت...

قطر..
الدوحة..
قفلت التلفون من اختها وهي مبتسمة..
الكلام مع وعد غير ليها من نفسيتها شوية..
دخلت الانستا..
لقت منشورات كتيرة جديدة..
تواجدها في مواقع التواصل عموما قل شديد الفترة دي..
ح تشوفهم لمن تفضى..
ختت تلفونها ونزلت عشان تجهز الغدا زي ما قالت لوعد...