مساء اليوم التالى..
امدرمان..
بتتكلم بي التلفون:وبس..هسي بكرة شكلو ح يوريني الموضوع
عاصم:الموضوع شنو هو؟!
إيڤا:مبعرف..لكين خايفة
عاصم:من شنو؟!
إيڤا:يعني..هو ح يرجع قطر خلاص
عاصم:ويمكن م يرجع
إيڤا:ي ود هو قال اصلا معندو هنا غير شهادتو وح يستلمها الايام الجاية..وح يسافر
عاصم:م تخافي ي إيڤا..ان شاء الله الامور كلها ح تتسهل
انتهدت:بالجد؟!
عاصم:وحات حلاوتك دي..كلو بزبط
ضحكت:احلف ليك بي حاجة احسن
ضحك:ماف احسن من كد
ضحكت زيادة..
عاصم:طيب..ح اقفل عشان واقع من التعب
ابتسمت:يحليلك يخ..دوام السمستر الجديد ضاغط
عاصم:ضاغط بي كلو
إيڤا:طيب امشي نوم..وثانكس يعني وكد
عاصم:علي شنو ي بت
إيڤا:انك دايما معاي..وكلام بطمني ي بست
ضحك:العفو يخ..دايما موجود يا زباديوو
ضحكت:طيب يلا
عاصم:يلا
قفلت وهي مبتسمة..
حرفيا عاصم د دايما معاها..
بي جهة عاصم..
قفل التلفون وختاهو جنبو..
دمو بغلى لمن إيڤا تحكي ليه عن معمر..
لكين يعمل شنو..
بتهمو إيڤا وكل تفاصيلها..
وللأسف معمر هو كل تفاصليها..
غمض عيونو وفتحهم..
بكرة معمر قال عندو موضوع م إيڤا..
شكلو ح يودعها عشان يرجع قطر خلاص..
اتنهد..
وكد ح يكون ارتاح منو..
وبعدها ممكن..
شال تلفونو بسرعة وكتب ليها باصباع خفيفة
"بكرة بعد تخلصي من موضوع معمر عايز اقول ليك حاجة"
ابتسم وقفل التلفون ورقد..
بعد تخلص من موضوع معمر ح يطرح ليها موضوعو..
بحري..
حرك راسو بإضغاء وهو بسمع في امو بتحكي ليهو..
امو:حاج اسماعيل بعد طلع وقفل دكانو..لقاك راقد قدام واحد من الدكاكين
سألها:كان دكان منو؟!..يمكن اهلي جو اشترو منو وخلوني هناك
امو:دكان قديم مقفول ليهو اكتر من سنتين..بس فيهو فرشة كد رجال السوق كانو بقعدو قدامو..شكلها فترتا ورقدتا فيها شوية
يوسف:اها
امو:حاج اسماعيل جاك وحاول يصحيك لكين م صحيت انت
غمض عيونو وفتحهم..
امو:شالك وجرا بيك علي اقرب مستشفى..وقالو انك مضروب في راسك وفاقد الوعي
عاينت ليهو بي حنية:رقدتك ديك م كانت نومة
بلع ريقو وهو بسمع فيها
امو:رقدوك عنبر واخدتا قريب يوم عشان تفيق..وياهو
عقد حواجبو ونزل عيونو وهو بسمع فيها
بتقول:من صحيت..صحيت كد..فاقد الذاكرة
شال نفس عميق وختاهو..
امو مسحت راسو بورا:لكين وريني..الذكرك بالموضوع د شنو ي ولدي؟!
عاين ليها:هو انا نسيتو اصلا؟!
امو سكت..
سألها:وم حاولتو تفتشو اهلي ترجعوني ليهم؟!
امو:حاولنا وفتشنا..حاج اسماعيل د حِفا ورا اقسام بحري دي كلها عشان يلقى اهلك وم لقى..بعدها انا وقفتو
مسكت وشو بي يدينها الاتنين:قلتا ليهو..د ولدي الرسلو لي ربنا..د جناي الم جبتو من بطني
عاين ليها مسااافة..
عشان هي م عندها اولاد في وقتها مسكتو..
عشان بس تحقق حلمها انها تبقى ام..
خربت حياتو وم رجعتو لأهلو..
امو:وبعد جيتك بيتنا..جانا الخير كلو..وبعد كم سنة جانا منذر اخوك
ابتسم..
منذر..
اكتر حاجة بحبها ومصبراهو علي حياتو دي..
باست راسو مسافة:م تجري ورا الذكريات ي ولدي..براها بتجيك لحدي عندك
عاين ليها:متين لكين؟!..انا لي متين ح اكون كد؟!
امو:الله يهون ي ولدي
حرك ليها راسها نظام اي وقام من جنبها..
