وصل زايد لـ موقع العرس و طلع له المعرس يستقبله من الباب ، نادا المعرس اخوه و خذ منه البشت و لبسه زايد و دخلوا و الي يبا يسلم يا سلم ، التهى المعرس مع الضيوف شوي و عطى زايد البشت لـ سهيل و قال له يرده لـ راعيه ، قعد المعرس و قعد زايد عداله و خذتهم السوالف لـ وقت تسليم العانيه و يا دور زايد طلع مفتاح الرنج و الشيك و قعدوا يحلفون على بعض ، بعد العشاء استأذن زايد بيطلع ، طلع واحد من الشياب يناديه ( عم المعرس ) ؛
عم المعرس : زايد
زايد : لبيه
عم المعرس : طالبك طلبه و الريال ما يرد من يطلبه
زايد : تم ، و تامر امر بـ الي تطلبه
عم المعرس : بزوجك بنتي
( صار ويه زايد احمد و عيونه على الناس الي تصور حاول يتدارك الموقف و ضحك )
عم المعرس : و الله اني صادق في الي قلته و انت قلت تم
ابتسم زايد : إن شاء الله
***
طلع هو و سهيل من العرس و اتجهوا للفندق ؛
سهيل : ضنك صدق يتكلم ؟
زايد : هيه ما يمزح
سهيل : لو تشوف شمسه الفيديو شو بيصير
زايد : الحين برد البلاد ،على الاقل ينتشر الفيديو و انا طاير
سهيل ( يضحك ) : مافي دليل انك شفت الريال بعد العرس
زايد : هي والله
***
الساعه 9 الصبح دق زايد على غرفة سلمى و لميا الباب و قومهن عشان يطلع يتريق معاهن ، تجهزوا على السريع و نزلوا ركبوا السياره بس قبل لا يحركون قالت سلمى انها تبا الحمام و نزلت بسرعه و ردت لهم وصلوا لـ قاليريا مول و اول ما نزلوا قالت سلمى انها تبا الحمام و راحت الحمام ؛
زايد : لميا ، مش اول قبل ما نطلع دخلت الحمام
لميا : هيه باباه
زايد : شو فيها هب طبيعيه هالفتره وايد تروح الحمام
لميا : ما ادري و اوقات يصير لها Blood Pressure or Hypotension low
زايد : قولي هبوط و خلاص
***
بعد الريوق مره ثانيه قالت سلمى انها تبا الحمام و ودوها الحمام ، بعدها اركبوا السياره لكن الطريق ما كان لـ بيتهم و لا بيت يدهم استغربن؛