( بعد مرور شهر و اسبوع )
انتهى زايد من كل اشغاله و فضى صار ما عنده شي ينشغل فيه ، كان يحوط في البيت يفكر طرت فكره في باله لكن قال بيطلع و بيستشير عيال اخوه في الفكره الي طرت في باله ، دخل و لقى عمر و سعود يلعبون سوني ، اول ما انتبهوا له و قفلوا القيم و قاموا يسلمون عليه ؛
زايد : ابا استشيركم في شي
سعود : الحل عند عمر
زايد : كنت افكر كيف افسخ الخطوبه ، وفكرت وايد و ما لقيت إلا حل واحد يطلعني من الموضوع و انا ما كسرت كلمتيه
عمر : الي هو ؟
زايد : اخلي البنت الي خطبتها هي الي تفسخ الخطوبه
سعود : انزين كلمها
زايد : و اطلع خاينها بالصوت
سعود : ما فهمت
زايد : انا ما خنت شمسه ولا بخونها لا بـ صوت ولا حتى نظره
سعود : بعدني هب فاهم ، بس كيف بتكلمها
زايد : الرقم عند سهيل هو بيكلمها
عمر : انزين خله يقول لها افسخ الخطوبه و لج الي تبينه
سعود : ليش ما يطرش لك الرقم و تخلي عمر يكلمها
عمر : ما اكلم حريم
زايد : يا ريال ما فيها شي
عمر : انت رمسها
زايد : انا وضعي غير
عمر : زين زين والله بس لانك عمي و تعز علي
***
كلم زايد سهيل و قاله يطرش رقمها حق عمر و طرشه ، قعدوا يركبون الكلام الي يبون يقولونه لها و طلعزايد عشان ما يسمع صوتها يخاف يخون شمسه بالسمع بعد ؛
عمر : السلام عليكم
الريم : و عليكم السلام
عمر : انتي الريم ؟
الريم : هيه منو معاي ؟
عمر : مش مهم خلينا ندخل في الموضوع الاهم
الريم : الي هو ؟
عمر : افسخ خطوبتج من زايد ، الريال ما يباج و مجبور
الريم : اتس اوكيه ، على الاقل انا اباه