دخل فارس خايف ما يعرف شو مستوي ، قعد عدال روضه و شمسه ؛
فارس : شو فيكم ؟ ترا والله هب مسوي شي
روضه : لا داخل علينا متروع اكيد مسويّ
فارس : والله اني ما اعرفهم
شمسه : هيييه
فارس : هم قربوا صوب البنات و انا هددتهم ما صار اي شي ثاني
شمسه : هب ربعك ؟
فارس : لا حشى
( روضه و شمسه يضحكن على الحاله الي وصل لها فارس )
روضه : نحن هب منادينك عشان هذا الموضوع
فارس : عيل ؟
شمسه : لقينا لك بنت الحلال الي تستاهلها و تستاهلك
فارس : ما اريد اعرف منو هالبنت و انا هب مستعد للزواج ولا ابا اتزوج
روضه : على الاقل بس بنخطبها
فارس : مابا لا خطبه ولا حجز ولا شي
شمسه : في وحده في خاطرك ؟
فارس : لا
روضه : انزين في وحده ترمسها ؟
فارس : ليش تشوفيني خروف اربع ورا البنات
شمسه : يا. فارس فكر البنت ما تتطوف
فارس : ما بفكر ، قلت لا يعني لا
شمسه : كيفك بشوف الشباب
* * *
دقت شمسه على نادر عشان يطرش لها رقم سعود ، دقت شمسه على سعود و قالت له ايي ياخ ذها من بيت ام خليفه ، حس سعود ان شمسه بتكلمه في موضوع ، خاف و قال اكيد الموضوع يخص ناصر و قعد يفكر ناصر شو ممكن يكون مسوي !! ، وصل سعود و ركبت شمسه معاه نزلوا مزيرعه ياخذون هوت شوكلت و هي طول الطريق تتكلم عن الحياة و الزواج و ... ، خذو الهوت شوكلت و وقفوا في مكان عشان يشربون و يكملون موضوعهم ؛
شمسه : سعود كم عمرك ؟
سعود : عمري 26
شمسه : ما شاء الله عيل عمر كم.
سعود : عمر 29
شمسه : العمر كله ، انزين شوف يا سعود
( التفت سعود لـ شمسه و حط عينه في عينها عشان يسمعها )
شمسه : انا لقيت بنت الحلال و ماباها تروح من ايديكم ييت برمس فارس قال مابا عرس ، عاد الحين ما في غيرك
( صمت لمدة دقيقتين )
سعود : عاد انا الحين موظف هب مثبت
شمسه : موضوع الوظيفه خله عليه ، انا بس الحين ابا موافقتك عشان اخطبها لك
سعود : خلاص انا في شورج
شمسه : بنخطب لك ميره بنت فلان بن فلان
سعود : و نعم والله ، خوانها كل يوم عندنا في ميلس عميه
شمسه : هيه ربع عمك ، و البنت ما شاء الله اخلاق و حشمه و جمال
سعود : شكراً لانج فكرتي فيني
شمسه : لا تشكرني ولا شي انا بحسبة امكم و الي في خاطره عسر ولا شي يرمس
سعود : امنا الصغيره
شمسه : هيه امكم الصغيره
سعود : ترا حتى عمر في خاطره يعرس
شمسه : من عيوني بدور له بنت الحلال الي تستاهله
سعود : لا يبالج تقعدين معاه لان عنده شروط
شمسه : بنقعد ليش لا
* * *
وصلوا البيت و قبل ما تنزل رجعت اكدت عليه و قال لها خلاص دقي و اخطبي ، نزلت شمسه و راحت تبشر روضه انها بتخطب ميره حق سعود ، في الجلسه كل ما يالهم ينقصون ، قعدة سلمى عدال ابوها ؛
سلمى : بابا عادي نطلع نمشي
زايد : من عيوني ، بس ثواني
( بعد ما انتهى زايد من موضوعه مع فارس ، قام و طلع يمشي مع سلمى )
سلمى : باباه
زايد : يا عيون ابوج
سلمى : ليش امممم هي ليش انتوا ما كنتوا تدرون ان عندكم اخوان من ام ثانيه
زايد : لان ما قد انذكر لنا او حتى حسينا
سلمى : انزين بابا الحب عادي ؟
زايد : هيه عادي حبي و عيشي حياتج
سلمى : بابا انا ما اباك تزعل مني في يوم من الايام
زايد : ما بزعل منج اصلاً مستحيل ازعل منج
سلمى : فارس دوم يهاوشني اذا شافني مع نادر
زايد : عادي يمكن فارس ما يعرف نادر عدل عشان جي يخاف عليج منه
سلمى : و انت ؟
زايد : انا شو ؟
سلمى : ما تخاف علي من نادر
زايد : انا اثق في نادر و كلي ثقه انه مستحيل يسوي فيج شي حتى لو ترقدين معاه في سرير واحد ما بييه الشيطان
سلمى : سويتها
( مسك اعصابه و خذ نفس عميق قبل ما يتكلم )
زايد : سلمى غلط الي تسوينه غلط
( وقفت و حضنت ابوها )
سلمى : بس والله ارتاح يوم انسدح في حضنه
زايد : باباه والله ما يجوز الي تسوينه
سلمى : ليش ما يجوز اذا انت تثق فينا
زايد : لانه حرام ، اقلها خليه يخطبج
سلمى : و اذا خطبني
زايد : وقتها محد بيقول لج شي
* * *
داروا على المحضر كامل و هم من موضوع لـ موضوع ، وصاها ان كل ما يطلعون يمشون في المحضر ما تعطي حد ويه ولا تسمع للقيل و الاقل و اذا حد من الشباب قرب منها ما تلتفت له و تكمل مشي لين ما يروح و اذا ما راح تتصرف بطريقتها ، و هم يمشون في طريقهم للبيت و عدال البيت تحديداً ، مرت عليهم عيوز مع بناتها و عيوز عينها على زايد تبا تتأكد اذا هذا زايد ولا لا وقفت العيوز و وقفوا بناتها ؛
العيوز : انت زايد ولا غيره ؟
زايد : هي نعم زايد
العيوز : الحمدالله على سلامة ام العيال و مبروك الخطوبه و متى العرس بنحضر بنشوف منو هاي الي خذيتها على شمسه
وحده من بناتها بصوت ما ينسمع : فسخ الخطوبه فسخها
زايد : الله يسلمج
البنات : الحمدالله على سلامة شمسه
زايد : الله يسلمكن
العيوز : هييه عيل الخطوبه فسختوها
زايد : هالله هالله
العيوز : زين سويت والله شمسه حرمه محد شراتها
زايد : صحيح
العيوز : موجوده في بيتها ولا ؟
زايد : لا هني قاعدين في بيت ام خليفه
العيوز : نقدر نحدر و نسلم ؟
زايد : حياكن
* * *
تقدموا زايد و سلمى عنهم و دخل زقر شمسه عشان تطلع تسلم عليهن ، تحفتهن و سولفن شوي و زقرت العيوز زايد توصيه على شمسه ؛
العيوز : زايد هالله هالله بـ شمسه
زايد : شمسه قلبيه ما يحتاي حد يوصيني عليها
العيوز : و القلب تعبان
زايد : و الله العظيم نحاول فيه
العيوز : ربي يخليكم و يحفظكم و يحفظ عيالكم
: امين يارب
* * *
<< يتبع >>
شو توقعاتكم للبارتات اليايه ؟؟ لا تقول عن سلمى شي ترا م ارضى عليها 🥲❤️🔥❤️🔥
