فطيم : ابويه صدق بتسافر ؟
خليفه ( بو هزاع ) : هيه بنروح اسبوع نغير جو
فطيم : شلنيه معاك ابا اغير جو
خليفه ( بو هزاع ) : والله ما عندي مانع شاوري حامد و بحجز لج
روضه : الله ودي اسير
خليفه ( بو هزاع) : زين عظمها إلا أموله و حليلها هاديه و ما تسوي شي
* * *
( في الميلس الخارجي )
دخلت فطيم و سلمت على ام خليفه و الموجودين ؛
فطيم : مبروك الخطبه مطر
مطر : ما شاء الله شو دراج ؟
فطيم : و ابشرك بيوافقون
مطر : الله يسمع منج ، ان وافقوا لج مني هديه
فطيم : والله ماردها
مطر : و كلهم شاهدين
ام خليفه : و انتي شو دراج ؟
فطيم : بحكم اني بنت عمه سألوني عنه و ما قصرت فيه مدحته مدح على انه ما يستاهل بس ولد عميه لازم امدحه
ام خليفه: يعني جذبتي عليهم
فطيم : لا حشى قلت الصدق رمست عن المميزات و سكت عن عيوبه
مطر : انا كامل ولا فيني عيب
ليلى ( ام مطر ) : صحيح كامل و الكامل الله
* * *
دق نادر على سلمى يتطمن عليها ؛
سلمى : زين فكرت اتدق
نادر : شو فيج بتاكليني توني فضيت
سلمى : الساعه كم الحين ؟ تفكر تدق ؟
نادر: انتي ليش بس قاعده تدورين مشاكل
سلمى : انا ابا المشاكل ؟
نادر : المهم علومج ؟
سلمى : طيبه
نادر : ادري انج طيبه لو مش طيبه ما رديتي انا ابا علومج شو سويتي وين رحتي
سلمى : والله ماشي يتني مرت عليه موزاني شلتني من الجامعه و رحنا تغدينا و وصلتني البيت
نادر : هيييه ، زين طلعتي غيرتي جو ، الحين وينج ؟
سلمى : موجوده في البيت
نادر : انزين تجهزي بنطلع
سلمى : وين ؟ يعني اكشخ ولا ما اكشخ
نادر : عن الكشخه المبالغ فيها
سلمى : ان شاء الله ، شي اوامر ثانيه ؟
نادر : لا عيوني
* * *
طبعاً غياض حق نادر تكشخت و بالغت في كشختها ، نزلت و لقت انها في الصاله و كالعاده طلبت منها تشوف شو لابسه ؛
شمسه : كل هالكشخه على وين ؟ بيت موزه ؟
سلمى : لا
شمسه : عيل وين طالعه جي ؟
سلمى : مع نادر
شمسه : و نادر بيرضى جي يطلع معاج ؟
سلمى : لا الموضوع عناد و غياض
شمسه : ما يصير تتعاملين بهذا الاسلوب مع ريلج
سلمى : حد قاله يلهى عني
شمسه : الريال هب مجبور يكلمج اربعه و عشرين ساعه
سلمى : انا اباه يكلمني في الدقيقه عشر مرات
شمسه : لا والله عطيه فجه شوي حرام عليج ما يصير اتمين فوق راسه
* * *
طلعت و ركبت السياره ، انصدم نادر ولا كأنه قال لها لا تبالغين في الكشخه ، سكت ولا نطق بأي حرف ، وصلوا لتركات الكوفي الي قريبه من البيت و وقف قدام سدل طلب له كوفي و طلب لها ميلك شيك بعد ما استلم الطلب حرك لـ طريق البيت ؛
سلمى : ليش بنرد ؟
نادر : موصيج و قايل لج لا تطلعين جي معليه
سلمى : شو فيها ؟ ترا مثل كل مره
ضرب بريك و التفت لها يصارخ : اغار اغار يا بنت الناس قبل كنت اسكت ولا اقول شي لانج هب ع ذمتيه لكن الحين الوضع اختلف ، ما يصير اطلع معاج و كل من خطف ما قدر يشل عيونه منج انا ما طلبت وايد حتى الحجاب قلت برايها بتتحجب متى ما هي تبا بس انج تتعطرين و يشمج الي يسوى و الي ما يسوى و تتمكيجين جي هذا مايوز لي ، و ادري ان عناد فيني جي تسوين و تبيني اتعامل معاج باسلوب ثاني
