( في بيت خليفه ( بو هزاع
الساعه 8 الصبح كان البيت هادي الي طلع لـ دوامه و الي راقد في غرفته ، دخلت فطيم من الباب الخلفي و معاها ثلاث شنط طلبت من العامله توديهن فوق لـ غرفتها ، على الساعه 10 نزلت العنود ( ام هزاع ) و دخلت المطبخ تسوي لها ريوق ، كانت العامله متردده تقول حق العنود ان فطيم يت الصبح بشنطها ولا تسكت ، كانت رايحه راده في المطبخ و واضح عليها التوتر و الخوف ؛
العنود ( ام هزاع ) : ايميلي شو فيج ؟
العامله ( ايميلي ) : I don't know madam ادي قول ولا لاءه
العنود ( ام هزاع ) : قولي شو عندج من العلوم ؟
العامله ( ايميلي ) : madam futaim came morning with three bags
العنود ( ام هزاع ) : فطيم ؟ وين في غرفتها ؟
العامله ( ايميلي ) : yes madam
* * *
خلت ام هزاع ريوقها و راحت فوق تشوف بنتها ، دقت باب الغرفه عشان ادخل لكن الباب مقفول ؛
العنود و هي ادق الباب : فطيم ماماه فتحي الباب
فطيم : اميه تعبانه ابا انام
العنود : انزين طمنيني عليج انتي بخير
فطيم : هيه اميه ، برتاح شوي و بنزل لج تحت
العنود : انزين اذا تبين شي دقي على ايميلي
فطيم : ان شاء الله
* * *
الساعه 12 دق فارس على امه ( شمسه ) و قال لها انه بييب امل عان ترضعها ، شافته روضه و هو شال امل و طالع ؛
روضه : على وين ان شاء الله
فارس : بوديها عند اميه ترضعها
روضه : عند شمسه هب شيخه
فارس : هيه عند شمسه
روضه : زين عيل اصبر بروح معاك
* * *
نزلت سلمى جاهزه بتروح الجامعه ، يوم شافتهم قاعدين في الصاله راحت لهم و يلست تتقهوى و نست ان نادر برا يترياها ، يلست عدال فارس توايق في تلفونه و شافته يكلم هذيج ، سحبة منه التلفون وهي تقول ( كم مره قلت لك لا تكلمها ) سحب فارس تلفونه منها و قال ( ما يخصج ) التفتن روضه و شمسه يشوفن شو صاير ، عصب فارس من حركة سلمى و طلع ؛